AB News – သြဂုတ် ၁၇၊ ၂၀၂၅
ဒေဝီ
ပလက်ဝမြို့ရှိ ပလုပ်တောင် ရပ်ကွက်တွင် အာရက္ခတပ်တော် (AA) က သွေးလွန်တုပ်ကွေးနှင့် ငှက်ဖျားရောဂါတို့ကို ကာကွယ်နိုင်ရန် ခြင်ဆေးများ လိုက်လံဖြန်းပေးခဲ့ကြောင်း AB News က စုံစမ်း သိရှိရသည်။
ပလက်ဝမြို့တွင် သွေးလွန်တုပ်ကွေးနှင့် ငှက်ဖျားရောဂါများ အဖြစ်များနေသည့်အတွက် အာရက္ခတပ်တော်က ခြင်သတ်ဆေးများဆောင်ရွက်ပေးမှုအပေါ် ကျေးဇူးတင်ကြောင်း ဒေသခံတစ်ဦးက AB News သို့ပြောသည်။
“ပလက်ဝမှာ သွေးလွန်တုတ်ကွေးနဲ့ ငှက်ဖျားတွေ အရမ်းဖြစ်နေတာ။ အခုလိုလာဖြန်းပေးတော့ ကျွန်တော်တို့အတွက် အသက်ကယ်ဆေးတစ်မျိုးပါပဲ” ဟု ဆိုသည်။
ယင်းအပြင် အာရက္ခတပ်တော် ထိန်းချုပ်ထားသော ပလက်ဝဒေသတွင် အုပ်ချုပ်ရေး၊ ကျန်းမာရေးနှင့် ပညာရေးကဏ္ဍများကို တိုးတက်စေရန် ကူညီဆောင်ရွက်လျက်ရှိကြောင်း သိရသည်။
ပြီးခဲ့သည့် သြဂုတ်လ ၆ ရက်နှင့် ၇ ရက်နေ့များတွင်လည်း အာရက္ခတပ်တော် (AA) အပါအဝင်DELPS အဖွဲ့ဝင်များ၊ စစ်ဘက်ဆိုင်ရာဝန်ထမ်းများ၊ လူသားချင်း စာနာထောက်ထားရေးနှင့် ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) ဝန်ထမ်းများ၊ ပညာရေးဝန်ထမ်းများ၊ နှင့် ကျန်းမာရေးဝန်ထမ်းများ ပူးပေါင်းကာ ခြင်ဆေးဖြန်းခြင်းလုပ်ငန်းကို နံနက် ၈ နာရီမှ ညနေ ၅ နာရီအထိ လုပ်ဆောင်ခဲ့ကြသည်။
သွေးလွန်တုပ်ကွေးရောဂါသည် ခြင်ကျား (Aedes aegypti) ဟုခေါ်သော ခြင်အမျိုးအစားမှတစ်ဆင့် လူကို ကူးစက်စေပြီး ၎င်းခြင်များသည် ရေကြည်ရေသန့်များဖြစ်သော ရေအိုး၊ ရေပုံး၊ ပန်းအိုးများထဲတွင် ပေါက်ပွားလေ့ရှိကြောင်း သိရသည်။
ငှက်ဖျားရောဂါမှာမူ ခြင်နား (Anopheles) ဟုခေါ်သော ခြင်အမျိုးအစားမှတစ်ဆင့် ကူးစက်ခြင်းဖြစ်ပြီး ယင်းခြင်မျိုးစိတ်များသည် ရေညစ်ရေသန့်မရွေး နေရာအနှံ့အပြားတွင် ပေါက်ပွားနိုင်ကြကြောင်း သိရသည်။