ABN-ဟိန်းထွန်း
စက်တင်ဘာ ၁၆ ရက်
ရခိုင်ပြည်၊ ရသေ့တောင်မြို့နယ် ပေါက်တောရွာမှ ကျောင်းဆရာမတစ်ဦးကို အမည်မသိလူတစ်စုမှ မုဒိန်းကျင့် လှည်လှီးသတ်ဖြတ်ခဲ့ကြောင်း သိရသည်။
အဖ ဦးကျော်ညွန့်ဦး၏သမီး အသက် ၃၆ နှစ်အရွယ်ရှိ ဆရာမဒေါ်နှင်းယုနွယ်သည် ပန်းဖော်ပြင်ရွာတွင် အလယ်တန်းပြဆရာမတစ်ဦးဖြစ်သည်။
သူမသည် မနက်ပိုင်း ၉ နာရီကျော် ၁၀ နာရီအချိန်ခန့်တွင် သူ၏နေအိမ်မှ ပန်းဖော်ပြင်ကျောင်းသို့ စာသင်ပြရန်သွားရာ လမ်း၌ အမည်မသိ လူတစ်စုမှ အဓမ္မ မုဒိန်းကျင့်ကာ လည်လှီးသတ်ဖြတ်သွားခဲ့ကြောင်း ဒေသခံတစ်ဦးက ABN သို့ပြောသည်။
“၉ နာရီကျော် နာရီ၃၀ ဝန်းကျင်လောက်ဖြစ်ပါတယ်၊ သူ့အိမ်ကနေပြီး ကျောင်းကို စာပြဖို့သွားတယ်၊ အဲ့ဒီလမ်းမှာလူတစ်စုက အတင်းအဓမ္မမုဒိန်းကျင့်ပြီး လည်လှီးသတ်ဖြတ်သွားတာပါ “ဟု ဆိုသည်။
အဆိုပါဖြစ်စဥ်နှင့်ပတ်သက်၍ ရက္ခိုင့်တပ်တော်မှ ကျူးလွန်သူများကို စုံစမ်းရှာဖွယ်နေကြောင်း ၎င်းမှဆက်၍ ပြောသည်။
“ကျူးလွန်သူတွေကို AA က စုံစမ်းရှာဖွေနေပါတယ်၊ ဘယ်လိုဖြစ်လာမှာလဲမသိဘူး “ဟု ဆိုသည်။
မုဒိန်းကျင့်ခံရသည့် ကျောင်းဆရာမသည် အိမ်ထောင်မရှိသည့်အပြင် ရိုးသားစွာနေထိုင်သူဖြစ်ကြောင်းလည်းသိရသည်။
လက်ရှိတွင် ကျူးလွန်သူများကို ရက္ခိုင့်တပ်တော်၏ တပ်ဖွဲ့ဝင်များက လိုက်လံရှာဖွေလျက်ရှိကြောင်း သိရသည်။
