AB News – ဖေဖော်ဝါရီ ၁၇၊ ၂၀၂၄
ရက္ခိုင်ပြည်၊ ရမ်းဗြဲမြို့တွင် စစ်ကောင်စီ၏ လေကြောင်းအသုံးပြု ဗုံးကြဲတိုက်ခိုက်မှုကြောင့် မြို့ထဲရှိ နေအိမ် ၂၀၀ ကျော် အပြင်းအထန်မီးလောင်ကျွမ်း ပျက်စီးသွားကြောင်း AB News မှ စုံစမ်းသိရှိရသည်။
ယနေ့ ဖေဖော်ဝါရီလ ၁၇ရက်၊ မွန်းလွှဲ ၁၂နာရီခန့်အချိန်တွင် စစ်ကောင်စီက ရမ်းဗြဲမြို့ကို စစ်တိုက်လေယာဥ်များဖြင့် ဗုံးကြဲတိုက်ခိုက်ခဲ့သောကြောင့် အမှတ် ၄ ကင်းတဲရပ်ကွက်၊ အလယ်စု ချောင်းကမ်းနားတန်းတစ်လျှောက်တို့တွင် မီးအပြင်းအထန်လောင်ကျွမ်းခဲ့ကြောင်း ရမ်းဗြဲမြို့ခံ ၁ဦးက ပြောသည်။
“စစ်ကောင်စီရဲ့ တိုက်လေယာဥ်ဟာ ဒီနေ့ ၁၁နာရီ ၅၀ မိနစ်မှာ ဗုံး ၂လုံး ချခဲ့တယ်။ အဲဒီ ဗုံး ၂လုံးဟာ မပေါက်ကွဲခဲ့ဘူး။ ခဏအကြာမှာ စစ်ရဟတ်ယာဥ် ၁စီး လာပြီး မြို့ထဲကို မီးလောင်ဗုံးတွေ ချတယ်။ အဲ့အချိန်က စပြီးတော့ ကင်းတဲရပ်ကွက် မီးလောင်ကျွမ်းခဲ့တယ်” ဟု ဆိုသည်။
ညနေ ၅နာရီကျော်အချိန်တွင်လည်း စစ်ကောင်စီသည် Jet Fighter ၄စီးဖြင့် ရမ်းဗြဲမြို့ထဲကို ဗုံးကြဲတိုက်ခိုက်ခဲ့သောကြောင့် ရမ်းဗြဲမြို့အတွင်း ယနေ့ တစ်ရက်တည်းတွင် ဒုတိယအကြိမ်
မီးလောင်ခဲ့ကြောင်း ဒေသခံ ၁ဦးက ပြောသည်။
“ညနေ ၅နာရီကျော်အချိန်မှာ စစ်ကောင်စီရဲ့ Jet Fighter ၄နဲ့ ဗုံးလာကြဲတယ်။ အဲ့ဒါကြောင့် ကင်းတဲရပ်ကွက်နဲ့ အခြားရပ်ကွက်တွေ ထပ်မံ မီးလောင်ကျွမ်းခဲ့တယ်။ မြို့တွင်းမှာတော့ အခုထိ မီးလောင်ကျွမ်းနေတယ်” ဟုဆိုသည်။
နေ့လည်ဘက်တွင် စစ်ကောင်စီ၏ ဗုံးကြဲတိုက်ခိုက်မှုကြောင့် ကင်းတဲရပ်ကွက်မှ နေအိမ် ၁၅၀ ထက်မနည်း မီးလောင်ကျွမ်းခဲ့ရသည်။
ရမ်းဗြဲမြို့မှ ကင်းတဲရပ်ကွက်အပါအဝင် အခြားရပ်ကွက်များမှာ ယခုအချိန်ထိ မီးလောင်နေကြောင်း သိရသည်။
ပြီးခဲ့သည့် ဇန်နဝါရီ ၂၄ ရက် နံနက်ပိုင်းမှ စတင်ပြီးရမ်းဗြဲမြို့ သိမ်တောင်ကုန်းနှင့် ကိုယ်ရံတော်တောင် အနီးဝန်းကျင်တွင် ရက္ခိုင့်တပ်တော်နှင့် စစ်ကောင်စီတို့ တိုက်ပွဲများဖြစ်ပွားလျက်ရှိသည်။
ရမ်းဗြဲမြို့ကို စစ်ကောင်စီက ဖေဖော်ဝါရီလ ၁၄ရက်နေ့၊ နံနက် ၁၁နာရီ ၃၅မိနစ်အချိန်မှ စ၍ ယခု အချိန်ထိ Y12 စစ်ထောက်ပို့ရေးလေယာဥ်များကို အသုံးပြုကာ လေကြောင်းမှ ထပ်မံ၍ ဗုံးကြဲတိုက်ခိုက်နေခဲ့သည်။
ပြီးခဲ့သည့် ဖေဖော်ဝါရီလ ၁၃ ရက်နေ့ တစ်ရက်တည်းတွင်ပင် စစ်ကောင်စီသည် ရမ်းဗြဲမြို့နှင့် အနီးတစ်ဝိုက်နေရာများသို့ လေကြောင်းမှ ဂျက်ဖိုက်တာဖြင့် ၇ ကြိမ်ထက်မနည်း၊ Y12 ထောက်ပို့လေယာဉ်ဖြင့်လည်း ၃၇ ကြိမ်တိုင်လာရောက်၍ အကြိမ်ပေါင်း ၁၀၀ ကျော် အပြင်းအထန်ပစ်ခတ်တိုက်ခိုက်ခဲ့သည်ဟု ညီနောင် ၃ဖွဲ့က ထုတ်ပြန်ခဲ့သည်။
ဗီဒီယို-ရမ်းဗြဲမြို့ အမှတ် ၄ ကင်းတဲရပ်ကွက် မီးလောင်ပျက်စီးနေသည်ကိုတွေ့ရစဥ်/ABN
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL