ABN-ရှိုင်းမိုး
ဇွန် ၁၃ရက်
ရခိုင်တွင် မေလ ၁၄ ရက်နေ့က တိုက်ခတ်ခဲ့သည့် မိုခါဆိုင်ကလုန်းမုန်တိုင်းကြောင့် မျိုးစပါး ယခင်နှစ်ကထက် ယခုနှစ်ပို၍ စျေးတတ်နေသည်ဟု လယ်သမားများက ပြောသည်။
မြေပုံမြို့နယ် င/မန်းရဲကျွန်းဒေသဖက်တွင် မိုခါမုန်တိုင်းတိုက်ခတ်ခဲ့သောကြောင့် စုဆောင်းထားသည့် မျိုးစပါးများ ပျက်စီးသွား၍ ယခုနှစ်မျိုးစပါးဝယ်ယူရန်ခက်ခဲနေသည်ဟု င/မန်းရဲကျွန်း ဝကောက်ကြီးရွာမှ လယ်သမားကြီးဖြစ်သူ ဦးစံမြတင်ကပြောသည်။
“မျိုးစပါးက ဒီနှစ်ရှားမှာ၊ ဘာလို့လဲဆိုတော့ သိုလှောင်ထားတဲ့မျိုးစပါးတွေက မုန်တိုင်းကြောင့်မိုးမိသွားတယ်၊ တချို့လယ်သမားတွေက စပါးစိုက်ချိန်ရောက်မှဝယ်ယူကြတာရှိသလို၊ တချို့လယ်သမားတွေက စုဆောင်ထားတာမျိုးရှိတယ်၊ ဒါပေမယ့် ဒီနှစ်တော့မျိုးစပါးဝယ်ရမှာ ခက်ခက်ခဲခဲဖြစ်မှာ” ဟုပြောသည်။
လက်ရှိတွင် ပေါ်ဆန်းမွှေးမျိုးစပါး ၁ တောင်းကို ၂၀၀၀၀ ကျပ်ထိ ဈေးရှိနေကြောင်း၎င်းကပြောသည်။
“ပေါ်ဆန်းမွှေးမျိုးစပါး ၁ တောင်းကို ၂၀၀၀၀ ကျပ်ထိရှိတယ်၊ ပြီးခဲ့တဲ့နှစ်ကတော့ ၁၀၀၀၀၊ ၁၁၀၀၀ အဲလောက်ပဲရှိတယ်၊ ဒီနှစ်တော့မသေချာဘူး၊ ၂၀၀၀၀ ထက်ပိုပြီးလည်းတိုးလာနိုင်တယ်” ဟုဆိုသည်။
အဆိုပါ င/မန်းရဲကျွန်းသည် မိုခါမုန်တိုင်းကြောင့် ရေနစ်မြုပ်သွား၍ လယ်ကွင်းများတွင် ရေငန်နှင့် အညစ်အကြေးများတင်သွားသည့်အတွက် လယ်လုပ်ရန် ခက်ခဲမည်ဟု ကြက်ရေကြီးရွာမှ ဦးမောင်ဖြူချေကပြောသည်။
“လယ်တော့လုပ်ကြမယ်၊ ဒါပေမယ့် လယ်ကွင်းတွေမာ ကွမ်းတွေသောင်တင်နေတာရှိသေးတယ်၊ ကျွန်တော်တို့အတတ်နိုင်ဆုံးလုပ်ထားတယ်၊ ကွမ်းကတော်တော်များတော့ လုပ်ရတာအဆင်မပြေဘူး၊ ဒါပေမယ့် လယ်မလုပ်လို့လဲမရဘူး” ဟုဆိုသည်။
ရခိုင်ပြည်အတွင်း တချို့နေရာများတွင် လယ်ထွန်နေကြသော်လည်း င/မန်ရဲကျွန်းတွင် မုန်တိုင်းကြောင့် လယ်ကွင်းများ ရေငန်ဝင်သွားသည့်အတွက် လယ်ထွန်ယက်စိုက်ပျိုးမှု နောက်ကျမည်ဟု လယ်သမားများက ပြောသည်။
မုန်တိုင်းဒဏ်သင့်ခဲ့သည့် မြို့နယ်တိုင်းတွင် လယ်ကွင်းများကိုဆားငန်ရေ ဝင်ရောက်သွားခဲ့သည့်အတွက် စပါးမဖြစ်ထွန်းမည်ကို လယ်သမားများ စိုးရိမ်လျက်ရှိကြသည်။