AB News – ဖေဖော်ဝါရီလ ၁၄၊ ၂၀၂၄
ရက္ခိုင်ပြည်ရှိ ရမ်းဗြဲနှင့် ကျောက်ဖြူမြို့တို့ကို စစ်ကောင်စီက လေကြောင်းတိုက်ခိုက်မှု အကြိမ်များစွာ ပြုလုပ်ခဲ့ကြောင်း သိရသည်။
ညီနောင်မဟာမိတ် ၃ဖွဲ့၏ ထုတ်ပြန်ချက်တွင် “အကြမ်းဖက်စစ်ရှုံးစစ်ကောင်စီ၏ Y-12 ထောက်ပို့လေယာဉ်တစ်စီးသည် ကျောက်ဖြူမြို့နယ်၊ ဂုံးချွိန်တိုက်နယ်၊ ငှက်ပျောချောင်းကျေးရွာနှင့် အနီးဝန်းကျင်နေရာများသို့ လေကြောင်းမှ ဗုံးအလုံးပေါင်း ၃၀ ထက်မနည်း လာရောက်ပစ်ချတိုက်ခိုက်ခဲ့သည်” ဟု ဖော်ပြထားသည်။
စစ်ကောင်စီအဖွဲ့၏ အဆိုပါလေကြောင်းမှ ဗုံးကြဲတိုက်ခိုက်မှုအတွင်း ဂုံးချွိန်တိုက်နယ်၊ ကုလာဘာကျေးရွာ၊ အူချေထောင့်မှ အပြစ်မဲ့အရပ်သားပြည်သူများ၏ နေအိမ် ၄ လုံးမှာ ရန်သူ့ဗုံးစထိမှန်၍ ပျက်စီးဆုံးရှုံးခဲ့ကြောင်း သိရှိရသည်။
ထို့ကြောင့် တိုက်ပွဲဖြစ်ပွားရာအနီးရှိ ကုလားဘာ၊ မင်းတတ်တောင်၊ နပျိုးချောင်း၊ ပြိုင်းစေ့ကေရွာများမှ ဒေသခံများမှာ စစ်ဘေးလွတ်ရာသို့ ထွက်ပြေးတိမ်းရှောင်နေကြရသည်။
ရမ်းဗြဲမြို့ကိုလည်း စစ်ကောင်စီက လေကြောင်းတိုက်ခိုက်မှု အကြိမ် ၁၀၀ကျော် ပြုလုပ်ခဲ့ကြောင်း ယမန်နေ့ ဖေဖော်ဝါရီလ ၁၃ရက်နေ့တွင် ညီနောင်မဟာမိတ် ၃ဖွဲ့က ထုတ်ပြန်ခဲ့သည်။
ထုတ်ပြန်ချက်တွင် “ရက္ခိုင်ဒေသတိုက်ပွဲများ၌ နေ့တိုင်းအရှုံးပေါ်နေသည့်စစ်ကောင်စီသည် ရက္ခိုင်ပြည်၊ ရမ်းဗြဲမြို့အား အငြိုးကြီးစွာဖြင့် ကြည်း၊ ရေ၊ လေ တပြိုင်နက်တည်းပစ်ခတ်တိုက်ခိုက်လျက်ရှိပြီး ယုတ်မာစွာဖြင့် မြို့အားဖျက်ဆီးလျက်ရှိပြီ ယမန်နေ့ ဖေဖော်ဝါရီလ ၁၃ ရက် တစ်ရက်တည်းတွင်ပင် စစ်ကောင်စီသည် ရမ်းဗြဲမြို့နှင့် အနီးတစ်ဝိုက်နေရာများသို့ လေကြောင်းမှ ဂျက်ဖိုက်တာဖြင့် ၇ ကြိမ်ထက်မနည်း၊ Y-12 ထောက်ပို့လေယာဉ်ဖြင့်လည်း ၃၇ ကြိမ်တိုင်လာရောက်၍ အကြိမ်ပေါင်း ၁၀၀ ကျော် အပြင်းအထန်ပစ်ခတ်တိုက်ခိုက်ခဲ့သည်” ဟု ဖော်ပြထားသည်။
သိမ်တောင်ဘုရားကုန်းထက်တွင် အခြေချတပ်စွဲထားသည့် စစ်ကောင်စီတပ်စခန်းမှလည်း ယမန်နေ့၊ နံနက် ၆ နာရီ ၅၆ မိနစ်မှစတင်၍ နေ့လယ် ၃ နာရီခန့်အချိန်ထိ လက်နက်ကြီးအရေအတွက် ၇၆ ကြိမ်ထက်မက ပစ်ခတ်တိုက်ခိုက်ခဲ့ကြောင်း ဖော်ပြထားသည်။
ထို့အပြင် ကလိန်တောင်မြစ်၊ တိန်ချောင်းဝနှင့် သလူချောင်းဝအကြားတွင် ရပ်နားထားသည့် စစ်ကောင်စီ၏ ဇက်သင်္ဘော ပေါ်မှ လက်နက်ကြီးများဖြင့် နံနက် ၁၀ နာရီကျော်မှစတင်ပြီး ညနေ ၃ နာရီခွဲကျော်ထိ ရာချီနီးပါးသော လက်နက်ကြီး အကြိမ်အရေအတွက်အား တောက်လျှောက်ပစ်ခတ်တိုက်ခိုက်ခဲ့သည်။
စစ်ကောင်စီ၏ ကြည်း၊ ရေ၊ လေတိုက်ခိုက်မှုများကြောင့် ရမ်းဗြဲမြို့ ကိုယ်ရံတောင်စေတီနှင့် အောင်ချမ်းသာစေတီအနီးပတ်ဝန်းကျင်နေရာများသို့ လက်နက်ကြီးကျည်များ ကျရောက်ပေါက်ကွဲခဲ့သကဲ့သို့ ရမ်းဗြဲမြို့ပေါ်ရပ်ကွက်အချို့မှ လူနေအိမ် အပါအဝင် အဆောက်အအုံတချို့မှာလည်း မီးလောင်ပျက်စီးခဲ့ရသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL