ABN-ရှိုင်းမိုး
ဘူးသီးတောင်မြို့နယ်တွင် ရက္ခိုင့်တပ်တော်နှင့် အကြမ်းဖက် အာဆာ(ARSA)အဖွဲ့ တို့ တိုက်ပွဲဖြစ်ပွားခဲ့ပြီး နှစ်ဖက်လုံးမှ ထိခိုက်ကျဆုံးမှုရှိသည်ဟုသိရသည်။
ယနေ့နံနက် ၉ နာရီကျော်အချိန်က ဘူးသီးတောင်မြို့နယ်ရှိ မယူတောင်ထဲတွင် AAနှင့် ARSA အကြမ်းဖက်အဖွဲ့တို့ တိုက်ပွဲဖြစ်ပွားခဲ့ကြသည်ဟု တိကျခိုင်လုံသည့် သတင်းရင်းမြစ်ထံမှသိရသည်။
အဆိုပါ တိုက်ပွဲဖြစ်ပွားမှုကြောင့် ARSAအကြမ်းဖက်အဖွဲ့မှ အလောင်း ၄လောင်းတွေ့ရှိရပြီး AAဖက်မှ ရဲဘော်တစ်ဦး ကျဆုံးသည်ဟုသိရရှိရသည်။
” တိုက်ပွဲက ဒီနေ့ မနက်ကဖြစ်တာပါ၊ AAနှင့် အကြမ်းဖက် ARSA အဖွဲ့တို့ဖြစ်ကြတာပါ၊ ထိခိုက်ကျဆုံးမှုကတော့ ARSA အဖွဲ့ဝင် ၄ ဦးရဲ့အလောင်းတွေ့ပါတယ်၊ နောက်ပြီး ရက္ခိုင့်တပ်တော်ဖက်က ရဲဘော်တစ်ဦးကျပါတယ်” ဟု၎င်းကပြောသည်။
ဇူလိုင်လ ၁၈ ရက်နေ့ ညနေ့ ၃နာရီကျော်အချိန်ကလည်း ထိုမယူတောင်မှ လက်နက်ငယ်ပစ်ခတ်သံများ ကြားရပြီး ယနေ့ ၁၉ရက်နေ့ နံနက်ပိုင်းကလည်း လက်နက်ငယ်များပစ်ခတ်သံကြားနေရဆဲဟု စိညှင်းပြား ( မူဆလင် )ရွာမှ အုပ်ချုပ်ရေးမှူးကပြောသည်။
“မနေ့က ၃နာရီကျော်လောက်က လက်နက်ငယ်ပစ်သံတွေကြားလိုက်ပါတယ်၊ ဘာဖြစ်တယ်ဆိုတာမသိပါဘူး၊ ဒီနေ့ မနက်စောစောကလည်း ထပ်ကြားပါတယ်၊ ကျွန်တော်ဘာဖြစ်ကြလဲဆိုတာစုံစမ်းနေပါတယ်၊ မယူတောင်ဖက်ကကြားတာ၊ သွားပြီးလည်းမကြည့်ဝံ့ပါဘူး၊ ဘာဖြစ်တာလဲဆိုတာမသိပါဘူး” ဟု၎င်းကဆိုသည်။
ထိုမယူတောင်ထဲတွင် စစ်ကောင်စီတပ်စခန်းတခုလည်း တပ်စွဲနေထိုင်သည်ဟု သိရသည်။