ABN-ထက်မြတ်ခင်
စက်တင်ဘာ ၂၂ ရက်
ရခိုင်ပြည်၊ ကျောက်တော်မြို့နယ် အပေါက်ဝကျေးရွာမှ ရက္ခိုင့်တပ်တော်နှင့်ဆက်စပ်ပြီး မတရားအသင်းဆက်သွယ်မှု ပုဒ်မ ၁၇ (၁) ဖြင့် တရားစွဲဆိုခံထားရသည့် ကိုမောင်ချေ(ခ)မောင်သက်စိုးအား အမှုမှန်ကို အမြန်ဆုံး စစ်ဆေးပေရန် ဇနီးဖြစ်သူက တောင်းဆိုလိုက်သည်။
ပုဒ်မ ၁၇(၁) ဖြင့် တရားစွဲဆိုခံထားရသည့် ကိုမောင်ချေ(ခ) မောင်သက်စိုးကို ယမန်နေ့ မွန်းလွဲ ၁နာရီအချိန်က စစ်တွေမြို့နယ်တရားရုံးတွင် (၂၃) ကြိမ်မြောက်ရုံးထုတ်ခဲ့ပြီး စစ်ကောင်စီဖက်မှ တရားလိုထပ်မံပျက်ကွက်ခဲ့သည်ဟုသိရသည်။
ထို့သို့ စစ်ကောင်စီတရားလိုမှာ ရုံးချိန်းသို့ တကြိမ်တခါမှ မရောက်ရှိသောကြောင့် ကိုမောင်ချေ (ခ)မောင်သက်စိုးအမှုမှာ ကြန့်ကြာနေပြီး မောင်သက်စိုး၏ဇနီးက လင်ယောင်္ကျားဖြစ်သူအမှုကို အမြန်ဆုံးစစ်ဆေးပေးစေလိုပြီး အပြစ်မရှိပါက ပြန်လည်လွှတ်ပေးလိုကြောင်းပြောသည်။
“ကျမယောကျ်ား အဖမ်းခံရတာ ၁၀လပိုင်းကို ရောက်ရင် ၁နှစ်ပြည့်ပါတော့မယ်၊ တရားလိုဖက်ကရုံးချိန်းတခါမှမရောက်တော့ အမှုကကြန့်ကြာနေပါတယ်၊ ကျမအနေနဲ့ပြောရမယ်ဆိုရင် အမှုကိုအမြန်စစ်ဆေးပေးလိုပါတယ်၊ အပြစ်မရှိရင်လည်းအမြန်လွတ်ပေးစေလိုပါတယ်” ဟုပြောသည်။
ကိုမောင်သက်စိုးမှာ ယခုလိုအချုပ်ကျနေသည့်အတွက် ဇနီးဖြစ်သူမှာ မိသားစု စားဝတ်နေရေးအတွက် အခက်ခဲများရှိနေသည်ဟုဆက်ပြောသည်။
“ကျမမှာ ကလေးတစ်ယောက်နဲ့ တဖက်မှာလည်း လင်ယောင်္ကျားအတွက် ငွေကတစ်လကို ၁ သိမ်းခွဲကုန်ပါတယ်၊ ကျမမိဘဆီမှာလည်း အမြဲတမ်းလည်း မတောင်းချင်ပါ၊ ငွေရေးနဲ့ပတ်သက်လာရင်တော့ မိသားစုစားဝတ်နေအတွက်ပါ အများကြီးအခက်ကြုံရပါတယ်” ဟုပြောသည်။
ကိုမောင်ချေ(ခေါ်)မောင်သက်စိုးမှာ ကျောက်တော်မြို့နယ်၊ ပေါက်ဝကျေးရွာ ချောင်းဖျားရပ်ကွက်မှဖြစ်ပြီး ဆန်စက်ပိုင်ရှင် ဦးလှမောင်သန်းနှင့်အတူ ၂၀၂၂ ခုနှစ် အောက်တိုဘာလ ၂ ရက်နေ့က ကန်စောက် တပ်ရင်းတွင် ဖမ်းဆီးခံခဲ့ရခြင်းဖြစ်သည်။
ယင်းနောက်တွင် စစ်ကောင်စီက ထိုသူ ၂ ဦးအား စစ်တွေမြို့ အကျဉ်းထောင်တွင် ဖမ်းဆီးချုပ်နှောင်ထားပြီး ကိုမောင်ချေ (ခ) ကိုမောင်သက်စိုးကို မတရားအသင်းဆက်သွယ်မှု ဥပေဒ ပုဒ်မ ၁၇ (၁)ဖြင့်တရားစွဲဆိုကာ၊ ဦးလှမောင်သန်းကို စစ်ပုန်ကန်မှု ဥပဒေ ပုဒ်မ ၁၃၁ ဖြင့်ပါ ထပ်တိုးတရားစွဲဆိုခဲ့သည်။
ထိုသို့ ပုဒ်မ ၂ ခုဖြင့်တရားစွဲဆိုခံထားရသည့် ဦးလှမောင်သန်းမှာ လွတ်ငြိမ်းချမ်းသာဖြင့် ပြီးခဲ့သည့် သြဂုတ်လ ၂ ရက်နေ့တွင် ပြန်လည်လွတ်မြောက်လာသော်လည်း ကိုမောင်သက်စိုးမှာ မလွတ်မြောက်လာသေးဘဲ ဆက်လက် မတရား ဖမ်းဆီးချုပ်နှောင်ခံထားရဆဲဖြစ်သည်။
ရခိုင်တွင် ရက္ခိုင့်တပ်တော် AA နှင့် ဆပ်စပ်ဖမ်းဆီး တရားစွဲဆိုခံထားရသူများကို စစ်ကောင်စီက ထောင်ချခြင်းများ ရှိလာနေပြီး အမှုအများစုမှာ စကစ ဖက်မှ တရားလိုမရောက်ဘဲ အချုပ်ထောင်များတွင် လရှည်စွာ ချုပ်နှောင်ခံထားကြရသည်။
ထို့အပြင် လက်ရှိတွင် AA နှင့်ဆက်စပ် တရားစွဲဆိုခံထားရသူများကို စစ်ကောင်စီက ထောင်ချမှုများလည်း ရှိလာနေသည်ကို တွေ့ရသည်။