AB News-ဟိန်းထွန်း
အောက်တိုဘာ ၂၁ ရက်
ရခိုင်ပြည်၊ မြောက်ဦးမြို့ရှိ ဘုရားပေါ်ရပ်ကွက်မှ နွားကျောင်းနေသည့် ဆယ်ကျော်သက်အရွယ်တစ်ဦး ကြိုးဆွဲချသေဆုံးသွားခဲ့ကြောင်း သိရသည်။
သေဆုံးသွားသူမှာ ဘုရားပေါ်ရပ်ကွက်မှ အဖ ဦးမောင်လှအေး၏သား အသက် ၁၃ နှစ်အရွယ် မောင်ကျော်ခိုင်စိုးဖြစ်သည်ဟု သိရသည်။
၎င်းသည်ယနေ့မနက်ပိုင်းက နွားကျောင်းသွားရာတွင် အုန်းတော၏ဘေးတွင်ရှိသည့် ကုက္ကိုပေါ်တွင် ကြိုးဆွဲချသေဆုံးနေသည်ကိုမြင်ခဲ့ကြောင်း ဘုရားပေါ် ဒေသခံတစ်ဦးက AB News-သို့ပြောသည်။
“မနက်က နွားကျောင်းဖို့သွားပါတယ်၊ ဘယ်လိုဖြစ်သွားလဲတော့မသိဘူး၊ ရွာသားတွေက နွားကျောင်းဖို့သွားတဲ့အခါ အုန်းတောရဲ့ဘေးနားမှာရှိတဲ့ ကုက္ကိုပင်မှာ ကြိုးဆွဲချသေဆုံးနေတာကို တွေ့ရတယ်” ဟု ဆိုသည်။
၎င်းသည် တဲတစ်ခုမှ နွားချည်ကြိုးဖြင့် လယ်ကွင်းအနီးရှိ ကုက္ကိုပင်တွင် ကြိုးဆွဲချ၍ သေဆုံးသွားခဲ့ကြောင်း ဒေသခံများပြောပြချက်အရ သိရသည်။
အဆိုပါသေဆုံးမှုနှင့်ပတ်သက်၍ ABN က အတည်ပြုနိုင်ရန်အတွက် ၎င်း၏မိဘများကို ဆက်သွယ်ခဲ့သော်လည်း ဖုန်းမရှိသည့်အတွက် အတည်ပြုရန် အခက်အခဲများရှိခြင်း၊ သားဖြစ်သူ အသုဘသို့သွားနေသည့်အတွက် ဆက်သွယ်၍ မရနိုင်ခဲ့ပေ။
မောင်ကျော်ခိုင်စိုးသည် ဆင်းရဲနွမ်းပါးသည့်အတွက် ငယ်စဥ်အခါကပင် မိဘကျောင်းမထားနိုင်သည့်အတွက်ကြောင့် ဟင်းခူး၊ ငါးရှာ နွားကျောင်းနေသည့်ကလေးငယ်တစ်ဦးဖြစ်ကာ ကျောင်းမထားနိုင်သည့် ကိစ္စများကြောင့်မိမိကိုယ်ကို အဆုံးစီရင်သတ်သေသွားခြင်း ဖြစ်နိုင်ကြောင်း ဒေသခံများက ယူဆနေကြကြောင်း သိရသည်။
သေဆုံးသူ၏အလောင်းကို ယနေ့ ၃နာရီကျော်တွင် ထိုရွာ၏ သုဿာန်တွင် သင်္ဂြိုလ်သွားမည်ဖြစ်ကြောင်း သိရသည်။