AB News – မတ်လ ၂၃၊ ၂၀၂၄
ရက္ခိုင်ပြည်၊ မြေပုံမြို့နယ် သရက်တောင်ရွာကို စစ်ကောင်စီက ဂျက်ဖိုက်တာ ၂ စီးဖြင့် ဗုံးကြဲတိုက်ခိုက်ခဲ့ရာ ပုဇွန်ကန်ထဲတွင်ကျရောက်ပေါက်ကွဲပြီး ပြည်သူ ၂ ဦးသေဆုံးခဲ့ပြီး ၁ ဦးဒဏ်ရာရရှိခဲ့ကာ ဆေးရုံလည်း ပြိုကျပျက်စီးသွားကြောင်း သိရသည်။
သေဆုံးသွားသူမှာ မင်းပြားမြို့နယ်၊ ခေါင်းလောင်းချောင်းကျေးရွာမှ အသက် (၅၇)နှစ်အရွယ် ဦးစိုးမြအောင် နှင့် သရက်တောင်ရွာမှ အသက် ၃၀ ကျော်အရွယ်(အမည်မသိရသေး)သူဖြစ်ပြီး ဒဏ်ရာရရှိသူမှာလည်း၎င်းရွာမှဖြစ်ကြောင်းသိရသည်။
ဦးစိုးမြအောင်မှာ ပုဇွန်ကန်တွင် အငှားလုပ်ကိုင်နေသူ ဖြစ်ကြောင်း ရွာသားများက ပြောသည်။
အကြမ်းဖက်စစ်ကောင်စီသည် ယနေ့ မတ်လ၂၃ ရက်နေ့လည် ၁၂ နာရီကျော်တွင် ဂျက်ဖိုက်တာ ၂ စီးဖြင့် သရက်တောင်ရွာတဝိုက်သို့ လာရောက်ဗုံးကြဲတိုက်ခိုက်ခဲ့ရာ ပုဇွန်မွေးမြူရေးတာထဲ တွင်ရှိနေသာ လူများ သေဆုံးသွားခဲ့ကြောင်း ဒေသခံတစ်ဦးက AB News သို့ပြောသည်။
“စစ်ကောင်စီက ဂျက်ဖိုက်တာနဲ့ဗုံး ၄ လုံးချသွားတယ်။ ပုဇွန်ကန်ထဲမှာရှိနေတဲ့ ၂ယောက်သေသွားတယ်။ တစ်ယောက်က ဒဏ်ရာရသွားတယ်” ဟု ဆိုသည်။
အကြမ်းဖက်စစ်ကောင်စီသည် တိုက်ပွဲဖြစ်ပွားခြင်းမရှိသည့် ရွာများသို့ဗုံးကြဲနေသည့်အတွက်ကြောင့် ဒေသခံပြည်သူများထွက်ပြေး တိမ်းရှောင်လျက်ရှိသည်။
စစ်ကောင်စီ၏လေကြောင်းရန်ကြောင့် အသက်အန္တရာယ်စိုးရိမ်မှုရှိနေသည်သာမက စားဝတ်နေရေးအခက်အခဲများဖြင့် ရင်ဆိုင်ကြုံတွေ့နေရကြောင်း ဆက်ပြောသည်။
“လေကြောင်းကနေ ဗုံးကြဲတိုက်ခိုက်တာက အသက်အန္တရာယ်စိုးရိမ်နေရပါတယ်။ အလုပ်ထဲသွားလည်း ဗုံးကြဲမှာကိုကြောက်နေရတယ်။ ဗုံးလာကြဲနေတော့ စားဝတ်နေရေးအခက်အခဲတွေနဲ့ ရုန်းကန်နေရတယ် ” ဟု ဆိုသည်။
ယမန်နေ့ မတ်လ ၂၂ ရက်၊ နေ့လည် ၁၂ နာရီ ကျော်တွင်လည်း စစ်ကောင်စီက မြေပုံမြို့နယ် ညောင်ကန်ကျေးရွာသို့ ဂျက်ဖိုက်တာ ၂ စီးဖြင့်လာရောက်ဗုံးကြဲတိုက်ခိုက်ခဲ့ရာ ရဟန်း ၁ ပါး၊ ကိုရင်ငယ် ၁ ပါးအပါအဝင် အရပ်သား ၅ ဦးထက်မနည်းဒဏ်ရာရရှိပြီး အိမ်ခြေအများအပြားပျက်စီးသွားခဲ့ရကြောင်း သိရသည်။
အကြမ်းဖက် စစ်ကောင်စီ၏ လေကြောင်းဖြင့် ဗုံးကြဲတိုက်ခိုက်လာမှုကြောင့် ဒေသခံပြည်သူများသေဆုံးမှု များပြားလာပြီး ဒဏ်ရာရရှိသူလည်း နေ့စဥ်ရက်ဆက်တိုးလာနေသည်ကိုတွေ့ရသည်။
ယခုညနေအထိ သရက်တောင်ရွာထဲတွင် မီးလောင်ကျွမ်းလျက်ရှိနေပြီး ဒေသခံပြည်သူများ မီးငြိမ်းသတ်နေကြောင်း သိရသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL