ရခိုင်ပြည် မောင်တောမြို့နယ် ဖားဝပ်ချောင်းကျေးရွာကို စစ်ကောင်စီတပ်က မီးရှို့နေကြောင်း သိရသည်။
ယနေ့ အောက်တိုဘာ ၁၃ရက်နေ့ ညနေ ၄ နာရီ ၁၅ မိနစ်ခန့်က ဖားဝပ်ချောင်း ကျေးရွာဝင်စမှ လူနေအိမ် ၃ အိမ်အား စတင်မီးရှို့ခဲ့ကြောင်း အမည်မဖော်လိုသည့် သတင်းရင်းမြစ်တစ်ဦးက ပြောသည်။
စစ်ကောင်စီတပ်ဖွဲ့ဝင်များသည် ဖားဝပ်ချောင်းကျေးရွာသို့ ယနေ့ နံနက်ပိုင်းက ရောက်ရှိလာခဲ့ကြခြင်းဖြစ်ပြီး ကျေးရွာသားများအားလုံးကို ဘုန်းတော်ကြီးကျောင်းတွင် စုထားပြီး ရိုက်နှိပ်စစ်ဆေးမှုများ ပြုလုပ်လျက်ရှိကြောင်း သိရသည်။
“ဗမာစစ်တပ်က ရွာထဲသို့ ဒီနေ့ မနက်ကတည်းက ရောက်လာကြပြီး ရွာသားတွေကို ဘုန်းကြီးကျောင်းမှာ စုပြီး စစ်ဆေးနေတယ်။ ရိုက်ပြီးတော့ စစ်ဆေးတာတွေလည်းရှိတယ်။ ညနေ ၄ နာရီ ၁၅ လောက်က ရွာအစက အိမ် ၃ အိမ်ကို မီးရှို့လိုက်ပြီ။ နောက်အိမ်တွေကိုလည်း မီးရှို့လာနိုင်တဲ့ အခြေအနေပါ” ဟုဆိုသည်။
ရခိုင်ပြည် ကျောက်တော်မြို့ အခြေစိုက် စကခ (၉) နှင့် စစ်ကောင်စီတပ်စခန်းများမှ တိုက်ပွဲ ဖြစ်ပွားခြင်းမရှိဘဲ ယနေ့ တရက်လုံး ရမ်းသန်း ပစ်ခတ်လျက်ရှိကြောင်း သိရသည်။
