ရခိုင်ပြည်၊ မောင်တောမြို့တွင် ယနေ့ နိုဝင်ဘာ၂၆ ရက်နေ့ နံနက်ပိုင်းတွင် ထွေအုပ်ရုံးစာရေးတစ်ဦးအား မောင်တောမြို့ ရဲတပ်ဖွဲ့မှ ဖမ်းဆီးသွားခဲ့ပြီး မြို့ထဲရှိ လူနေအိမ်များကို ဝင်ရောက်စစ်ဆေးမှုများပြုလုပ်ခဲ့သည်ဟု သိရသည်။
မောင်တောခရိုင် ရဲတပ်ဖွဲ့မှ ဒုရဲမှူးကြီး ကိုကိုလေး ဦးဆောင်သော တပ်ဖွဲ့ဝင်အင်အား ၂၀ ခန့်မှာ ယနေ့ နံနက် ၇ နာရီ ၃၀ မိနစ်တွင် မောင်တောမြို့ အမှတ် ၃ ရပ်ကွက် မြို့ဦးရွာနေ အဖ ဦးအောင်တင့်၏သား ကိုစိုးသီဟအောင် ၃၅ နှစ် မောင်တောခရိုင် ထွေအုပ်ရုံးစာရေးအား ဖမ်းဆီးသွားကြောင်းသိရသည်။
ယနေ့ နံနက် ၇ နာရီအချိန်မှ စတင်ကာ မောင်တောမြို့တွင် ဒုရဲမှူးကြီး ကိုကိုလေး ဦးဆောင်သော မြို့မရဲစခန်းမှ နယ်ထိန်းရဲများ၊ မောင်တော မူးယစ်တပ်စု ၄၆ တို့မှ တပ်ပါင်းအင်အား ၄၀ မှာ နှစ်ဖွဲ့ခွဲ၍ မြို့နေလူအိမ်များကို ဝင်ရောက်စစ်ဆေးမှုများ ရှိခဲ့သည်။
ထို့အပြင် ရဲတပ်ဖွဲ့ဝင်အင်အား ၂၀မှာ မောင်တောမြို့ အမှတ် ၄ ရပ်ကွက် ရွာသစ်ရွာနေ ဦးထွန်းလှချေ ၅၇ နှစ်၏အိမ်သို့ ဝင်ရောက်ကာ ၎င်း၏သား ကိုသားညီ ၃၂ နှစ်အား ရှာဖွေမှုရှိခဲ့သည်ဟု ဒေသခံသတင်းရင်းမြစ်၏ သတင်းပေးပို့ချက်အရ သိရသည်။
ကျောက်ဖြူမြို့တွင်လည်း ရပ်ကွက် အုပ်ချုပ်ရေးမှူးများနှင့် အစိုးရဝန်ထမ်းများအား စစ်ကောင်စီတပ်မှ ဖမ်းဆီးလျက်ရှိနေသည်။
ဓာတ်ပုံ-RFA
