AB News – ဖေဖော်ဝါရီ ၂၇ ၊ ၂၀၂၄

မင်းပြားမြို့ကမ်းနီရွာအနီး စစ်ကောင်စီ၏ အမှတ် ( ၉) တိုင်းဗဟိုလေ့ကျင့်ရေးသင်တန်းကျောင်းကို AAက ယနေ့ဖေဖော်ဝါရီလ ၂၇ ရက်နေ့တွင် အပြီးသတ်သိမ်းပိုက်လိုက်ပြီ ဖြစ်ကြောင်း AB News က စုံစမ်းသိရသည်။

ရက္ခိုင့်တပ်တော်က မင်းပြားမြို့နယ်ရှိ စစ်ကောင်စီ၏ လေ့ကျင့်ရေးသင်တန်းကျောင်းကို ဖေဖော်ဝါရီလ ၁၈ ရက်နေ့က စတင်ထိုးစစ်ဆင်တိုက်ခိုက်ခဲ့ရာ ၉ ရက်ကြာသည်ထိ စခန်းအစိတ်ပိုင်းများစွာကိုသိမ်းပိုက်နိုင်ခဲ့ပြီး စကစဖက်မှ ကြည်း၊ရေ၊လေအသုံးပြုပြီး တိုက်ခိုက်ခဲ့မှုကြောင့် ၂ ဖက်စစ်ရေးအပြင်အထန်ဖြစ်ပွားခဲ့သည်။

ယနေ့ ၁၀ ရက်မြောက်နေ့ နံနက် ၁၀ နာရီ ၁၅ မိနစ်တွင် ၎င်းကုန်းကို အပြီးသတ်သိမ်းပိုက်နိုင်ခဲ့ပြီး မင်းပြားမြို့နယ်သည် စစ်ကောင်စီကင်းစင်နယ်မြေဖြစ်သွားပြီဖြစ်ကြောင်း ဒေသခံတစ်ဦးက AB News သို့အတည်ပြုပြောသည်။

” ဒီနေ့ ၁၀နာရီ လောက်မှာပဲ AA က သိမ်းပိုက်လိုက်ပြီ၊၊ စကစတပ်ဖွဲ့ဝင်တွေအများအပြားသေသွားတယ်လို့ သိရတယ်၊၊ စကစတွေမရှိတော့ဘူး၊၊ မင်းပြားမြို့က စကစတွေရဲ့ ကင်းစင်နယ်မြေ ဖြစ်သွားပါပြီ”ဟု ဆိုသည်။

ပြီးခဲ့သည့်ဇန်နဝါရီလကပင် စစ်ကောင်စီ၏ မင်းပြားအခြေစိုက် ၃၇၉၊ ၃၈၀၊ ၅၄၁ အပါအဝင် ကျိန်းတောင်တပ်ရင်းတို့ကို ရက္ခိုင့်တပ်တော်က နေ့ညမနား ထိုးစစ်ဆင်ချေမှုန်းနိုင်ခဲ့ပြီးနောက် အမှတ် ( ၉) တိုင်းဗဟို လေ့ကျင်းရေးသင်တန်းကျောင်းကိုလည်း ယနေ့ ဖေဖော်ဝါရီ ၂၇ရက်နေ့တွင်အလုံးစုံသိမ်းပိုက်ထားပြီဖြစ်ကြောင်း သိရသည်။

လက်ရှိတွင် မင်းပြားမြို့သည် ရက္ခိုင့်တပ်တော်ထိန်းချုပ်ထားသော မြို့တစ်မြို့ဖြစ်လာသော်လည်း စစ်ရှုံးနေသည့်  မင်းအောင်လှိုင် ဦးဆောင် စစ်ကောင်စီအဖွဲ့မှ  ဂျက်ဖိုက်တာ တိုက်ခိုက်ရေးလေယာဥ်၊ Y-12 ဗုံးကြဲလေယာဥ်၊ Mi-35 တိုက်ခိုက်ရေး ရဟတ်ယာဥ်၊ Mi-17 ထောက်ပို့ ရဟတ်ယာဥ် နှင့် ဟတ်စကီးတို့ဖြင့် လာရောက်တိုက်ခိုက်လျက်ရှိကြောင်း တွေ့ရသည်။

အမှတ် ( ၉) တိုင်းဗဟိုလေ့ကျင့်ရေးသင်တန်းကျောင်းသည် စစ်ကောင်စီ၏ အဓိက လက်နက်အင်အားအကောင်းဆုံးနှင့် အခိုင်အမာ စနစ်တကျတည်ဆောက်ထားသည့် ဗျူဟာကုန်းကြီးတစ်ခုဖြစ်သည်။

စစ်ကောင်စီတပ်ဖွဲ့ဝင်များ လက်ကျန်ရှိနေသေးသည့် ဘူးသီးတောင်၊မောင်တော၊ ပုဏ္ဏားကျွန်း၊ ရမ်းဗြဲမြို့တို့ကို အပြီးသတ်သိမ်းပိုက်နိုင်ရေးအတွက် ရက္ခိုင့်တပ်တော်က ဆက်လက်ချေမှုန်းလျက်ရှိကြောင်း AA ထုတ်ပြန်ချက်အရ သိရသည်။

Website
www.arakanbaynews.com    

Facebook
https://www.facebook.com/arakanbaynewsinfo?mibextid=ZbWKwL