ABN-ရှိုင်းမိုး
သြဂုတ် ၁၅ရက်
သြဂုတ်လ ၁၄ရက်နေ့ နေ့လည် ၃နာရီကျော်အချိန်က မင်းပြားမြို့နယ် င/တန်ပျင်းရွာမှ အမျိုးသားတစ်ဦး အစာအဆိပ်သင့်၍ သေဆုံးခဲ့သည်ဟုသိရသည်။
သေဆုံးသူသည် မင်းပြားမြို့နယ် င/တန်ပျင်းရွာမှ အဖ ဦးရဲလှအောင်၏သား အသက် ၅၃နှစ်အရွယ် ဦးလှရွှေအောင် ဖြစ်ကြောင်းသိရသည်။
၎င်းသည် မသေဆုံးမီက မင်းပြားမြို့သို့ သွားရောက်ခဲ့ပြီး အရက်တနေကုန် သောက်နေခဲ့ကာ မာလကာသီးစားခဲ့သည်ဟု ကျေးရွာအုပ်ချုပ်ရေးမှူး ဦးမောင်သန်းကြိုင်ကပြောသည်။
“သူက တနေ့လုံးအရက်သောက်နေတာ၊ မင်းပြားမသွားခင်လည်း အရက်သောက်ခဲ့တယ်၊ မင်းပြားက ရွာကိုပြန်လာပြီး ရွာပြန်ရောက်ရင်လည်း အရက်ထပ်သောက်တယ်၊ မာလကာသီး စားခဲ့တယ်လို့လည်းပြောတယ်၊ နောက်ထပ် မြို့မှာဘာတွေစားခဲ့တာလဲကျွန်နော်တို့လဲမသိဘူး” ဟုဆိုသည်။
ထိုနေ့ နေ့လည် ၃နာရီကျော်အချိန်တွင် ရုတ်တရက်သတိမေ့သွား၍ မင်းပြားမြို့မ ဆေးရုံကြီးသို့ မိသားစုဝင်များပို့ဆောင်ပေးခဲ့သည်ဟုသိရသည်။
မင်းပြားဆေးရုံရောက်ပြီး ၄နာရီ ၁၀မိနစ်အချိန်တွင် သေဆုံးခဲ့ကြောင်း ရွာသားတစ်ဦးကပြောသည်။
“သူ ရုတ်တရက်သတိမေ့သွားတယ်၊ ဒါကြောင့် သူ့ကိုဆေးရုံးပို့ခဲ့ကြတယ်၊ ဆေးရုံးအဝကိုပဲရောက်တယ်၊ အသက် မရှိတော့ဘူး၊ ဆရာဝန်စစ်ဆေးတာကတော့ မလာကာသီးစားပြီး အရက်သောက်တယ်။ ဒါကြောင့် သေဆုံးခဲ့ရတယ်လို့” ပြောသည်ဟု၎င်းကဆိုသည်။
ဦးလှရွှေအောင်မှာ သားသမီး ၄ယောက်ရှိသည်ဟုသိရသည်။