AB News – ဇန်နဝါရီ ၂၊ ၂၀၂၄
ရက္ခိုင်ပြည်၊ မင်းပြားမြို့နယ် ရာမောင်တံတားအနီးရှိ သင်္ချိုင်းတောင်ကုန်းမှ ဒုရဲအုပ် ၁ ဦးသည် AAထံအလင်းဝင်လာခဲ့ကြောင်း AB News မှ စုံစမ်းသိရှိရသည်။
အလင်းဝင်ရောက်လာသူမှာ မင်းပြားမြို့နယ် မှ အသက် ၄၀ အရွယ် ဒုရဲအုပ်အဆင့်ရှိသူ တစ်ဦး ဖြစ်သည်။
၎င်းသည် ယမန်နေ့ ဇန်နဝါရီလ ၁ ရက်နေ့ နံနက် ၈ နာရီအချိန်တွင် စကစ လက်အောက်ခံ သင်္ချိုင်းတောင်ကုန်းမှ ဆင်းပြေးလာပြီး ရက္ခိုင့်တပ်တော်ထံ အလင်းဝင်ရောက်လာခဲ့ကြောင်း ဒေသခံ ၁ ဦးက AB News သို့ပြောသည်။
“၈ နာရီကျော်လောက်မှာ တောင်ကုန်းပေါ်ကဆင်းပြေးလာတယ်။ AA ဆီအလင်းဝင်မယ်လို့ ပြောတယ်” ဟု ဆိုသည်။
အကြမ်းဖက် စစ်ကောင်စီ အဖွဲ့က ဒုရဲအုပ်ထွက်ပြေးချိန်အတွင်း သေနတ်ဖြင့် လှမ်းပစ်ခဲ့သည့်အတွက်ကြောင့် အသက်လုထွက်ပြေးခဲ့ရသည်။
ရာမောင်တံတားထိပ် သင်္ချိုင်းတောင်ကုန်းမှ စကစ တပ်သားထွက်ပြေးမှု ၃ ကြိမ်ထက်မနည်းရှိခဲ့ပြီး ရက္ခိုင့်တပ်တော်ထံ အလင်းဝင်ရောက်သူများလည်း ရှိကြောင်း ဒေသခံများပြောပြချက်အရ သိရသည်။
ရာမောင်တံတားဖက်မှ ကမ်းနီအထိ တောင်တန်းတစ်လျှောက်တွင် စစ်ကောင်စီ တပ်စခန်းကုန်းများ ၁၀ ကျော်ရှိပြီး ၎င်းတို့၏စခန်းအချို့ကိုလည်း ရက္ခိုင့်တပ်တော် သိမ်းပိုက်ထားသည်။
ပြီးခဲ့သည့် ဒီဇင်ဘာလ ၂၉ ရက်နေ့တွင်လည်း ရသေ့တောင်အခြေစိုက် တပ်ရင်း၊ တပ်မများမှ လက်နက်ကြီးပစ်သူများအပါအဝင် စကစ တပ်ဖွဲ့ ၃ ဦးထက်မနည်း ရက္ခိုင့်တပ်တော်ထံ အလင်း ဝင်ရောက်လာ ခဲ့ကြောင်း သိရသည်။
မင်းပြားအခြေစိုက် စစ်ကောင်စီ စခန်းကုန်းများမှ ဗိုလ်ကြီးများက လက်အောက်ငယ်သားများကို အနိုင်ကျင့် ဗိုလ်ကျနေမှုရှိနေခြင်း၊ စားနပ်ရိက္ခာ အလုံအလောက်မရရှိခြင်း၊ တပ်တွင်းများတွင် ခိုက်ရန်မကြာခဏဖြစ်ပွားနေခြင်းများကြောင့် စကစ တပ်သားများ တပ်ပြေးမှုပိုများလာကြောင်း စုံစမ်းသိရှိရသည်။
လက်နက်ချအညံ့ခံသောသူတိုင်း အသက်ချမ်းသာရာရမည်ဖြစ်ပြီး မိသားစု၊ ဆွေမျိုးများနှင့် တွေ့ဆုံခွင့်ရရန် အာမခံချက်ပေးကြောင်း AA ကပြောထားသည်။