AB News – နိုဝင်ဘာ ၁၄၊ ၂၀၂၃
ရခိုင်ပြည်၊ မင်းပြားမြို့ရှိ ကျိန်းတောင် ကျိန်းတောင်မှ လက်နက်ကြီး ၊ လက်နက်ငယ် ပစ်ခတ်နေပြီး တန်းတောင်မြောင်မှ စက်သေနပ်များ ဆက်တိုက်ပစ်ခတ်နေကြောင်း သတင်း ရရှိသည်။
ကျိန်းတောင်၌တပ်စွဲထားသည့် စကစ တပ်ရင်းသည် ပြည်သူများသို့ ဦးတည်ပစ်ခတ်နေကြောင်း သိရသည်။
ထို့အပြင် ကျိန်းတောင်နှင့် တစ်ဆက်တည်းတည်ရှိသော စကစ တန်းတောင်မြောင်တို့မှလည်း ပြည်သူများအား ကြောက်လန့်စေရန် ပစ်ခတ်နေကြောင်း မြို့ခံများကပြောသည်။
၎င်းတပ်ရင်းများ သည် ယနေ့ နိုဝင်ဘာလ ၁၄ ရက် ညနေ ၈ နာရီ ၅ မိနစ်ခန့်က လက်နက်ကြီး များပစ်ခတ်နေကြောင်း မြို့ခံတစ်ဦးက AB News သို့ပြောသည်။
“လက်နက်ကြီးက ၃ ချက်ရှိသွားပြီ၊ လက်နက်ငယ်တော့ ၄၀ ကျော်လောက်ပစ်တယ်၊ တစ်ခြားကုန်းကလည်း စက်သေနပ်တွေနဲ့ ခြောက်လှန့်ပြီးပစ်နေတယ်” ဟု ဆိုသည်။
ယခုလိုပစ်ခတ်နေမှုကြောင့် ပြည်သူများစိုးရိမ်ထိတ်လန့်နေရပြီး ဗုံးခိုကျင်းများတွင် ပုန်းဝှက်နေကြရသည် ဟု သိရသည်။
စကစ တပ်ဖွဲ့ဝင်များသည် တိုက်ပွဲ ဖြစ်ပွားခြင်းမရှိဘဲ ယခုလို ယမ်းသပ်ပစ်ခတ်နေခြင်းပြည်သူများအတွက် အလွန်အန္တရာယ်ရှိကြောင်း မြို့ခံများကပြောသည်။
ယမန်နေ့ကလည်း မင်းပြားကျိန်းတောင်တပ်ရင်းမှ လက်နက်ကြီးကျည်ပစ်ခတ်မှုကြောင့် အရပ်သား ၄ ဦးဒဏ်ရာရရှိခဲ့ကြောင်းတွေ့ရသည်။
အလားတူ ကျောက်တော်မြို့နယ်၊ ရသေ့တောင်မြို့နယ်တို့တွင်လက်နက်ကြီးကျည်ထိမှန်၍ အရပ်သား တစ်ချို့သေဆုံးပြီး၊ ဒဏ်ရာရရှိသူများလည်း ရှိခဲ့သည်။