ဘူးသီးတောင်မြိုနယ် ကွန်တိုင်အုပ်စု ဝါချိလ့်မြောက် (မူဆလင်) ရွာတွင် ဆင်းနင်း၍ အသက် ၁၈ အရွယ် လူငယ်တစ်ဦးသေဆုံးသွားကြောင်းသိရသည်။
သေဆုံးသွားသူမှာ အဖ ဦးမာမစ်ဆုလ်တာန်၏သား ဇိုက်တူဆောန် အသက် ၁၈ ဖြစ်ပြီး ၂၀၂၂ ဒီဇင်ဘာလ ၃၁ ရက်နေ့ ည ၁၁နာရီ ၁၅ မိနစ်က တောဆင်ရိုင်းနင်း၍ ပွဲချင်းပြီးသေဆုံးသွားခဲ့ကြောင်း သိရသည်။
သေဆုံးသွားခဲ့သည့် ဇိုက်တူဆောန်မှာ စံညှင်းဝေ(မူဆလင်) ရွာတွင် အငှားလုပ်နေပြီး၊ တဲမှ ရွာကိုအပြန်လမ်းတွင် ဆင်နင်းခံရ၍ သေဆုံးသွားခဲ့ခြင်းဖြစ်ကြောင်း စံညှင်းဝေရွာမှ ရွာသားတစ်ဦးက ABN သို့ပြောသည်။
” ကျွန်တော်တိုရွာကမဟုတ်ပါဘူး၊ ဝါချီလ့်မြောက်(မူဆလင်) ရွာကပါ၊ ကျွန်တော်တို့ရွာမှာ အလုပ်လာလုပ်နေတာပါ၊ သူက နေ့တိုင်း ရွာကိုစောစော ရောက်ပါတယ်၊ ဒါပေမယ့် အဲဒီနေ့ကတော့ ၁၁ နာရီကျော်လောက်မှ လာပါတယ်၊ အလာလမ်းမှာ တောရိုင်းဆင် နင်းခံရလို့ သေသွားတာပါ” ဟု ၎င်းကပြောသည်။
ဒီဇင်ဘာလ ၃၀ ရက်နေ့ ည ၂ နာရီကျော်ခန့်ကလည်း ဘူးသီးတောင်မြို့နယ် ကျောက်တော်ကြပ်ပြင်ချေ(မူဆလင်) ရွာမှ အသက် ၅၀ ကျော်လူကြီးတစ်ဦးမှာ တောဆင်ရိုင်းတစ်ကောင်လိုက်၍ ဒဏ်ရာအပြင်းအထန်ရခဲ့ကြောင်း သိရသည်။
” လူကတော့ အသက်အန္တရာယ်တော့ မရှိခဲ့ပါဘူး ဒါပေမယ့် ဒဏ်ရာရလာတာတော့ အရမ်းများပါတယ်၊ အခုတော့ ဆေးကုသမှု ခံယူနေပါတယ် ” ဟု ၎င်းကဆက်ပြောသည်။
ဘူးသီးတောင်မြို့နယ်တွင် နတ်ရာကုန်းအုပ်စု၊ ကျောက်တော်ကြပ်ပြင်ချေအုပ်စု၊ အုပ်ထောင်အုပ်စုနှင့် စံညှင်းရွာအုပ်စုတို့တွင် တောဆင်ရိုင်း အန္တရာယ်ကို မကြာခဏ ကြုံတွေ့နေရကြောင်း ဒေသခံများက ပြောသည်။
တောဆင်ရိုင်းအန္တရာယ်မှာ အရင်ကထက်ပိုများလာသည့်အတွက် ဒေသခံပြည်သူများမှာ တောထဲတောင်ထဲသို့ မသွားရဲကြတော့ဘဲ ရှိနေကြကြောင်း သိရသည်။
