ABN-မေအိအိအောင်
သြဂုတ် ၄ ရက်
စစ်ကောင်စီက ပုဒ်မ ၂ ခုဖြင့်တရားစွဲခံထားရသည့် ကျောက်တော်မြို့နယ်၊ ကာဒီရွာမှ ဆန်စက်ပိုင်ရှင် လွတ်ငြိမ်းချမ်းသာဖြင့် ပြန်လည်လွတ်မြောက်လာကြောင်း မိသားစုဝင်များကပြောသည်။
အဆိုပါ ဆန်စက်ပိုင်ရှင်ဦးလှမောင်သန်းမှာ ပြီးခဲ့သည့် သြဂုတ်လ ၂ ရက်နေ့ ညနေ ၆ နာရီကျော်ခန့်တွင် စစ်ကောင်စီ၏ လွတ်ငြိမ်းချမ်းသာဖြင့် စစ်တွေမြို့ အကျဉ်းထောင်မှ လွတ်မြောက်လာကြောင်း ဇနီးဖြစ်သူက ပြောသည်။
“သြဂုတ်လ ၂ ရက်နေ့ကပါ။ အဲ့နေ့ညနေ ၆ နာရီကျော်မှာ လွတ်ငြိမ်းချမ်းသာနဲ့ လွတ်လာခဲ့တာပါ။ သူကတော့ နေတော့သိပ်မကောင်းဘူး” ဟုပြောသည်။
ဦးလှမောင်သန်းမှာ စစ်ကောင်စီက မတရားအသင်းဆက်သွယ်မှု ၁၇ (၁)နှင့် စစ်ပုန်ကန်မှု ဥပဒေ ပုဒ်မ ၁၃၁ ဖြင့် တရားစွဲဆိုခံထားရသူဖြစ်သည်။
ဦးလှမောင်သန်းကို ပြီးခဲ့သည် ၂၀၂၂ ခုနှစ် အောက်တိုဘာလ ၂ ရက်နေ့တွင် ကျောက်တော်မြို့နယ်၊ စစ်ကောင်စီ၏ ကန်စောက်အခြေစိုက် ခမရ ၅၃၉ တပ်ရင်းမှ တပ်ရင်းမှူးက ဦးလှမောင်သန်းနှင့် ၎င်း၏အဖော်ဖြစ်သူကို ဖမ်းဆီးခဲ့ခြင်းဖြစ်သည်။
ဆန်စက်ပိုင်ရှင် ဦးလှမောင်သန်းမှာ လွတ်ငြိမ်းချမ်းသာဖြင့်လွတ်မြောက်လာသော်လည်း ၎င်၏အဖော်ဖြစ်သူ ကိုမောင်သက်စိုးမှာ လွတ်ငြိမ်းချမ်းသာခွင့်တွင် မပါကြောင်းစုံစမ်းသိရှိရသည်။
မတရားအသင်းဆက်သွယ်မှု ဥပဒေပုဒ်မဖြင့် ဖမ်းဆီးခံခဲ့ရသူများမှာ ရက္ခိုင့်တပ်တော်နှင့် ဆက်စပ်မှုရှိသည်ဟု စွပ်စွဲချက်ဖြင့် ဖမ်းဆီး တရားစွဲခံခဲ့ရသူများဖြစ်ပြီး မလွတ်မြောက်သေးဘဲ အချုပ်ထောင်ထဲတွင် များစွာ ကျန်ရှိနေသေးသည်ကိုတွေ့ရသည်။