ABN-ရှိုင်းမိုး
ပုဏ္ဏားကျွန်းမြို့နယ်တွင် စစ်ကျန် ဗုံးပေါက်ကွဲ၍ စစ်ဘေးရှောင်စခန်းတွင်နေထိုင်သည့် ကလေးငယ် ၁ဦးသေဆုံးပြီး ၂ဦးဒဏ်ရာရရှိသည်ဟုသိရသည်။
ယနေ့ နံနက် ၁၁ နာရီကျော်အချိန်က ယိုးတရုတ်ရွာရှိ ရထားဘူတာစစ်ဘေးရှောင်စခန်းတွင် ဗုံးတစ်လုံးကို ကလေးငယ်များက ရရှိ၍ ထုခွဲကစားရာမှ ပေါက်ကွဲရခြင်းဖြစ်ကြောင်းသိရသည်။
ထိုဗုံးသီးပေါက်ကွဲမှုကြောင့် ကလေးငယ် ၁ဦးမှာ ပွဲချင်းပြီးသေဆုံးပြီး၊ ၂ ဦးမှာပြင်းထန်ဒဏ်ရာရရှိသွားသည်ဟုသိရှိရသည်။
ဒဏ်ရာရရှိသွားသော ကလေးငယ် ၂ဦးမှာ ယိုးတရုတ်ဆေးရုံးတွင် ၁ဦးထားရှိခဲ့ပြီး နောက်တစ်ဦးကို ပုဏ္ဏားကျွန်းဆေးရုံးသို့ယူဆောင်ခဲ့ကြောင်း ဒေသခံတစ်ဦးက ပြောသည်။
“၃ယောက်မှာ ၁ယောက်သေပါတယ်၊ ၂ယောက်ဒဏ်ရာရပါတယ်၊ ယိုးတရုတ်ဆေးရုံမှာ တစ်ယောက်ထားခဲ့ပါတယ်၊ နောက်တစ်ယောက်ကို ပုဏ္ဏားကျွန်းဆေးရုံသို့ယူလာပါတယ်” ဟုဆိုသည်။
ကလေးငယ်များ၏ အချက်အလက်ကို ABNမှစုံစမ်းနေဆဲဖြစ်သည်။
ထိုရထားဘူတာ စစ်ဘေးရှောင်စခန်းတွင် တစ်ကျော့ပြန်တိုက်ပွဲပြင်းထန်သည့်အချိန်က စစ်ကောင်စီတပ်စွဲနေထိုင်ခဲ့ကြောင်းသိရှိရသည်။
