AB News- ဒီဇင်ဘာ၂၉၊ ၂၀၂၃
ရက္ခိုင်ပြည်၊ ပုဏ္ဏားကျွန်းမြို့ အခြေစိုက် ၅၅၀ တပ်ရင်းက ပစ်ခတ်သောလက်နက်ကြီးကျည်ထိပြီး အမျိုးသား ၂ ဦးဒဏ်ရာရရှိခဲ့ကြောင်း သိရသည်။
ဒဏ်ရာရရှိသွားသူများမှာ ပုဏ္ဏားကျွန်းမြို့ ရွာဟောင်းရပ်ကွက် ဂူဝမှ အဖ ဦးဖြူသာထွန်း၏သား အသက် ၄၃ နှစ်အရွယ် ဦးသိန်းစိုးဝင်း ( ဝမ်းဗိုက် ချက် ဒဏ်ရာ)၊ ဦးဦးရွှေသိန်း၏သား အသက် ၂၈ နှစ်အရွယ် ဦးပေါက်စ ( ခြေထောက်ဒဏ်ရာ )တို့ဖြစ်သည်။
အကြမ်းဖက်စစ်ကောင်စီ အဖွဲ့သည် ယမန်နေ့ ဒီဇင်ဘာလ ၂၈ ရက် နံနက် ၁၂ နာရီတွင် လက်နက်ကြီးကျည် ၈ လုံးထက်မနည်း ပစ်ခတ်ခဲ့ရာ မြို့ပေါ်ရပ်ကွက်သို့ ကျရောက်ပေါက်ကွဲ ဒဏ်ရာရရှိသွားခဲ့ကြောင်း ဒေသခံတစ်ဦးက AB News သို့ ပြောသည်။
“၅၅၀ တပ်ရင်းကပစ်တာပါ၊ ရပ်ကွက်ထဲကိုလှမ်းပစ်တာ ခြံအနားမှာလာပေါက်ကွဲတယ် ၊ လူ ၂ ယောက်ဒဏ်ရာရသွားတယ်၊ အိမ်တစ်ဆောင်လဲပြိုသွားတယ်” ဟုဆိုသည်။
၎င်းတို့၏နေအိမ် ၂ ဆောင်မှာ အိမ်ချင်းကပ်ဖြစ်သောကြောင့် စစ်ကောင်စီကပစ်ခတ်သောလက်နက်ကြီးကျည်သည် ခြံအနီးတွင်ကျရောက်ဲပေါက်ကွဲ ပြီး ဦးသိန်းစိုးဝင်း နေအိမ်မှာ ပြိုထွက်သွားခဲ့ကြောင်း သိရသည်။
ထို့အပြင် ယမန်နေ့၊ နံနက် ၁၁ နာရီ ၃၀မိနစ်အချိန်ခန့်၌ ရက္ခိုင်ပြည်၊ ပုဏ္ဏားကျွန်းမြို့နယ်၊ ရန်ကုန်-စစ်တွေကားလမ်းမရှိရာ ဓါတ်အားခွဲစက်ရုံအရှေ့တွင် ရက္ခိုင့်တပ်တော် (AA) နှင့် စစ်ကောင်စီတပ်ဖွဲ့ဝင်များနှင့် ထိတွေ့တိုက်ပွဲ ဖြစ်ပွားခဲ့ကြောင်း ညီနောင် ၃ ဖွဲ့ကထုတ်ပြန်ထားသည်။
ဦးပေါက်စ၏ ခြေထောက်တွင် မိုင်းစကို ခွဲစိတ်ကုသရန်လိုအပ်နေကြောင်း သိရသည်။
စစ်ကောင်စီက အပြစ်မဲ့ ပြည်သူများကို လက်နက်ကြီးဖြင့် ပစ်ခတ်နေခြင်းသည် စစ်ရာဇဝတ်မှုကျူးလွန် ခြင်းဖြစ်သည် ဟု မြို့ခံတစ်ဦးကပြောသည်။
“တိုက်ပွဲနဲ့မသက်ဆိုင်တဲ့ပြည်သူတွေကိုပစ်ခတ်တယ်။ ဆိုတော့ ဒါက စစ်ရာဇဝတ်မှုကျူးလွန်တာပါ၊ ဒဏ်ရာရရှိတဲ့သူတွေကို ဆေးခန်းပို့ရင်လည်း တားမြစ်တာတွေရှိတယ်၊ တကယ်တော့ပြည်သူတွေပဲအသက်ဆုံးရှုံးရတာလေ၊ ဒါကမဖြစ်သင့်ဘူးပေါ့” ဟု ဆိုသည်။
လက်ရှိတွင် စစ်ကောင်စီ၏အကြမ်းဖက် စစ်ရာဇဝတ်မှုကျူးလွန်မှုကြောင့် ရက္ခိုင်ပြည်သူများမှာ အသက်အိုးအိမ်လုံခြုံမှုကင်းမဲ့လာခြင်း၊ စစ်ဘေးရှောင်နေရာများ၌ လက်နက်ကျည်ထိမှန်မည်ကို စိုးရိမ်ထိတ်လန့်နေရခြင်းများမြင့်တက်လျက်ရှိနေသည်။