AB News – ဒီဇင်ဘာ ၈၊ ၂၀၂၃
ချင်းပြည်၊ ပလက်ဝမြို့ထဲသို့ အကြမ်းဖက် စကစ အဖွဲ့မှ လက်နက်ကြီး ပစ်ခတ်ခဲ့မှုကြောင့် ဆေးရုံးကြီးအနီးတောင်ဖက်ရှိ ဝန်ထမ်းနေဆောင်တွင် ကျရောက်ပေါက်ကွဲခဲ့ရာ ဆေးရုံဝန်ထမ်းအမျိုးသမီး၏ ကလေးငယ်တစ်ဦး ဒဏ်ရာရရှိသွားခဲ့ကြောင်း သိရသည်။
လက်နက်ကြီးကျည်စထိမှန်သွားသူမှာ အသက် ၆ နှစ်အရွယ်ဖြစ်ပြီး နာမည်ကိုကား မသိရှိရသေးပေ။
ပလက်ဝအရှေ့ဖက်ကမ်း အခြေစိုက် ၂၈၉ တပ်ရင်းမှ ယနေ့ နံနက် ၁ဝ နာရီ ၄၈ မိနစ်က လက်နက်ကြီးပစ်ခတ်ခဲ့မှုကြောင့် ဆေးရုံးဝန်ထမ်းအဆောင် အနီးတွင် ကျရောက် ပေါက်ကွဲခဲ့ရာ
ခေါင်မိုးပွင့်သွားပြီး ကလေးငယ်တစ်ဦး ခြေထောက်၌ ဒဏ်ရာ ရရှိသွားခဲ့ကြောင်း ဒေသခံတစ်ဦးက AB News သို့ပြောသည်။
” ဒီ ပလက်ဝအခြေစိုက် ၂၈၉ တပ်ရင်းက ပစ်တာပါ၊ ဝန်ထမ်းနေတဲ့အဆောင်အနီးမှာပေါက်ကွဲသွားတယ်၊ ခေါင်းမိုးပွင့်ထွက်သွားပြီး အမျိုးသမီးငယ်တစ်ဦး ဒဏ်ရာရသွားတယ်” ဟု ဆိုသည်။
ဒဏ်ရာရရှိသူအား ပလက်ဝမြို့ ပြည်သူ့ဆေးရုံကြီးတွင် အရေးပေါ်ဆေးကုသမှုခံယူနေရကြောင်း စုံစမ်းသိရှိရသည်။
၎င်းကိစ္စအား ဆက်လက်အတည်ပြုရန် AB News ကစုံစမ်းနေဆဲဖြစ်ပြီး ဆက်လက်ဖော်ပြပေးသွားမည် ဖြစ်သည်။
ပလက်ဝမြို့ပေါ်ဆေးရုံသို့ လက်နက်ကြီးကျည်ကျရောက်ခဲ့သည့်အတွက် ဒေသခံပြည်သူတစ်ချို့ ထွက်ပြေးနေကြရကြောင်း သိရသည်။
ယင်းအပြင် ဒီဇင်ဘာလ ၄ ရက်နေ့ ည ၁၁ နာရီ ၅၀ မိနစ်တွင် ရဟတ်ယာဥ်ဖြင့် ဗုံး ၆ လုံးကြဲချခဲ့ရာ ပလက်ဝမြို့နယ် စက်ပိုက်ပြင်ရွာမှ အသက် ၄၆ နှစ်အရွယ် ဦးသန်းမောင် နှင့် ဇာတိကိုင်းရွာမှ စစ်ဘေးရှောင်နေသော အမည်မသိအမျိုးသားတစ်ဦး ဒဏ်ရာရရှိခဲ့သည်။
စစ်ကောင်စီသည် လူနေအိမ်များသို့ လက်နက်ကြီးဖြင့် လှမ်းပစ်ခြင်း၊ ဂျက်လေယာဥ်များဖြင့် ဗုံးကြဲချခြင်း၊ ဒရုန်းများဖြင့် ကင်းထောက်ဗုံးချခြင်းများပြုလုပ်လာသည့်အပြင် ဆေးရုံများသို့ ပစ်မှတ်ထားလာခြင်း တွေ့ရှိရသည်။