AB News – မတ်လ ၆ ၊ ၂၀၂၄
ရက္ခိုင်ပြည်၊ တောင်ကုတ်မြို့၊ ခူးတိုက်နယ်တွင် ရွာ ၂ရွာမှ သားဖ ၃ ဦး အပါအဝင်ရွာသား ၄ ဦးကို အကြမ်းဖက်စစ်ကောင်စီအဖွဲ့က ဖမ်းဆီးသွားခဲ့ကြောင်း ဒေသခံများထံမှ စုံစမ်းသိရှိရသည်။
ဖမ်းဆီးခံခဲ့ရသူများမှာ တဲမောက်ရွာမှအဖ ဦးကျော်လှ၏သား မောင်လုံးချေနှင့် ချောင်းသုံးခွရွာမှ သားဖ ၃ ဦး (အမည်စုံစမ်းဆဲ) ဖြစ်ပြီး မောင်လုံးချေမှာ ပြန်လည်လွတ်မြောက်လာကြောင်း သိရသည်။
ငပလီအခြေစိုက် ၅၅ တပ်ရင်းမှ အင်အား ၃၃ ဦးပါသည့် အကြမ်းဖက်စစ်ကောင်စီအဖွဲ့သည် ယနေ့ မတ်လ ၆ ရက် နေ့လည် ၂ နာရီကျော်တွင် မူးတိုက်နယ်မှ ခူးတိုက်နယ် ချောင်းသုံးခွရွာသို့ဝင်လာပြီး သားဖ ၃ ဦးကိုဖမ်းဆီးသွားခဲ့ကြောင်း ဒေသခံတစ်ဦးက AB News သို့ပြောသည်။
“သူတို့က ရွာထဲကို ဝင်လာတယ်။ ပြီးတော့ အိမ်မှာရှိနေတဲ့ သားဖ သုံးယောက်ကိုဖမ်းသွားတယ်။ ရွာသားတွေလည်း ကြောက်ပြီး ပုန်းနေကြတယ်” ဟုဆိုသည်။
အလားတူ အင်အား ၃၀ ခန့်ရှိသော စကစတို့သည် ညနေ ၄ နာရီကျော်တွင် တဲမောက်ရွာသို့ဝင်လာပြီး ရွာသား မောင်လုံးအား ဖမ်းဆီးသွားခဲ့သည်။
ဖမ်းဆီးခံရသူများအား နေပူထဲတွင် နေလှန်းထားကာ နှိပ်စက်မှုများရှိကြောင်းလည်း သိရသည်။
တောင်ကုတ်၊ သံတွဲ၊ ကျောက်ဖြူ၊ အမ်းတို့တွင် အကြမ်းဖက်စကစအဖွဲ့သည် ပြည်သူများကို နေ့စဥ်ရက်ဆက်ဖမ်းဆီးမှုများရှိနေသည်။
တောင်ကုတ်မြို့နယ်တွင် ယနေ့ နေ့လည်က ရက္ခိုင့်တပ်တော်နှင့် စစ်ကောင်စီအဖွဲ့တို့ကြား တိုက်ပွဲ ဖြစ်ပွားခဲ့သည်ဟုလည်း သိရသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL