ABN-ဟိန်းထွန်း
စက်တင်ဘာ ၁၃ ရက်
ရခိုင်ပြည်၊ မြို့တော်စစ်တွေမှ ဘူးသီးတောင်၊ မောင်တော သို့ သွားသည့် ကုန်ကားများအား စစ်ကောင်စီ၏ အငူမော်စစ်ဆေးရေးဂိတ်၊ အင်းဒင်စစ်ဆေးရေးဂိတ် နှင့် သုံးမိုင်စစ်ဆေးရေးဂိတ်များက ကုန်တင်ကားများကို စစ်ဆေးပြီး စစ်တွေသို့ ပြန်လွှတ်နေကြောင်း သိရသည်။
အငူမော် နှင့် မောင်တောသို့ သွားသည့်လမ်း၌ စကစနယ်ခြားစောင့်စစ်ဆေးရေးဂိတ် ၃ ခုက ကားသမားများကို စက်တင်ဘာလ ၁၁ ရက်နေ့ မနက်ပိုင်း ၁၀ နာရီ အချိန်မှ စပြီး ရေသန့် နှင့်မုန့်ဖာ ၂ မျိုးကိုသာ သွားလာခွင့်ပေးပြီး အခြားမည်သည့် ကုန်ပစ္စည်းကိုမှတင်သွင်းခွင့်မပေးကြောင်း စကစ တပ်ဖွဲ့ဝင်များပြောသည်ဟု အမည်မဖော်လိုသည့် ကားဂိတ်ပိုင်ရှင်တစ်ဦးက ABN သို့ပြောသည်။
“ဂိတ် ၃ ခုကအဓိကထားပြီးစစ်ဆေးပါတယ်၊ အထုတ်တွေဖွင့်တယ်၊ ရေသန့်ဘူးနဲ့ မုန့်ဖာတွေပါတဲ့ကားတွေဆိုသွားခွင့်ပြုတယ်၊ အိမ်ဆောက်ပစ္စည်းတွေ၊ သံချောင်းတွေ၊ မီးစက်တွေ၊ ဆီတွေပါရင်သွားခွင့်မပြုပါဘူး၊ စစ်တွေသို့ပြန်လွှတ်ပါတယ်၊ ကျနော်တို့ဘာပစ္စည်းတွေတင်ပို့ရမှာလဲ၊ အသွားအပြန်စရိတ်ကုန်ကျတယ် “ဟု ဆိုသည်။
စစ်တွေရေချမ်းပြင်ဆိပ်မှ အငူမော်ဆိပ်ကမ်းသို့ ကုန်စည်ပို့နေသည့်ကားသမားများမှာ ကုန်ကားတစ်စီးတင်ဆောင်ခစရိတ် ၂ သိန်းကျော်အထိရှိနေသဖြင့် ကုန်ကားများကို သွားလာခွင့်မပြုဘဲ ပြန်လွှတ်နေသည့်အတွက် လမ်းစရိတ်များကုန်ကျမှုအခက်အခဲတွေ့နေရကြောင်းသိရသည်။
စစ်တပ်စစ်ဆေးရေးဂိတ်များက မည်သည့်အကြောင်းကိစ္စဖြင့်တားမြစ်နေသည်ကိုတိတိကျကျမသိရသည့်အပြင် တင်ပို့၍ မရသည့် ကုန်ပစ္စည်း စာရင်းကိုလည်း ထုတ်ဖော်ထားခြင်းမရှိဟု ကုန်ပစ္စည်းတင်ကားဂိတ်ပိုင်ရှင်က ဆက်ပြောသည်။
၎င်းဂိတ်များက တားမြစ်ကုန်ပစ္စည်းများကို စာထုတ်၍ သေသေချာချာလုပ်ဆောင်လျှင် ၎င်းတို့ဖက်မှလည်း တင်ပို့၍မရသည့်ကုန်များကို ရှောင်ရှားနိုင်မည်ဖြစ်ကြောင်း၎င်းကဆက်၍ ပြောသည်။
“တားမြစ်ကုန်တွေကို သေချာသတ်မှတ်ပေးစေချင်ပါတယ်၊ ကျနော်တို့ဖက်ကလည်းထိန်းလို့ရတာပေါ့၊ အခုက ဟိုကုန်ကိုလည်းပါးစပ်နဲ့တားမြစ်တယ်၊ ဒီကုန်ဆိုရင်လည်း ပါးစပ်နဲ့တားမြစ်တယ်၊စာရွက်ထုတ်ပေးဆိုရင်လည်းမပေးဘူး၊ တင်ပို့မယ့်ကုန်တောင်မရှိတော့ဘူး “ဟု ဆိုသည်။
ဂိတ် ၃ ခုမှ စကစအဖွဲ့ဝင်များသည် တစ်ချို့ကုန်ကားများကိုဆိုလျှင် ငွေကြေးပိုပေးလျှင် သွားလာခွင့်ရနေရပြီး မရှိဆင်းရဲသူများ အသက်မွေးဝမ်းကျောင်းအနေဖြင့်ကားမောင်းသမားလုပ်ကိုင်နေရသူများမှာ ငွေကြေးမပေးနိုင်ကာ အခက်အခဲတွေ့နေရကြောင်း တွေ့ရသည်။
ယခုလိုစစ်ဆေးပြီးပြန်လွှတ်နေမှုကြောင့် မောင်တော နှင့် ဘူးသီးတောင်ဖက်သို့စီးဆင်းရာကုန်စည်တစ်ချို့ရပ်တန့်လာနိုင်သည့်အခြေအနေတွင်ရှိနေပြီး စားဝတ်နေရေးခက်ခဲ ကျပ်တည်းလာနိုင်ကြောင်း ချိန်ကလိန်ကျေးရွာမှ အမျိုးသမီးတစ်ဦးက ABN သို့ပြောသည်။
“စားသောက်ကုန်တွေကအစ စစ်ဆေးလာပါတယ်၊ ဆန်တွေလည်းစစ်ဆေးပါတယ်၊ ကျမတို့ဘယ်လိုဝယ်ယူရမလဲမသိတော့ဘူး၊ အခုလိုထပ်ပြီးစစ်ဆေးလာရင် စားဝတ်နေရေးပိုင်းမှာ အခက်အခဲရှိလာနိုင်တယ်” ဟု ဆိုသည်။
ရသေ့တောင် နှင့် စစ်တွေမှ အဓိကသယ်ယူနေသည့် ကုန်စည်များသည် မောင်တောသို့အချိန်မှီတင်ပို့နိုင်ခြင်းနည်းပါးလာသည့်အတွက် ကားသမားများနှင့် ပြည်သူများသည် လွန်စွာအခက်အခဲကြုံလာနေကြောင်း သိရသည်။
ထိုလမ်းကိုအသုံးပြုမှီခိုနေရသည့် ရွာပေါင်း ၅၀ ကျော်မှပြည်သူများသည် စားဝတ်နေရေးအခက်အခဲရှိလာမှု၊ စီးပွားရေးကျဆင်းလာမှု၊ ပညာရေး နှင့် ကူးသန်းရောင်းဝယ်ရေးပိုင်းတွင် အခက်ကြုံလာရမည်ဖြစ်သည်။
လက်ရှိတွင် ခရီးသွားပြည်သူများကို စကစ စစ်ဆေးရေးဂိတ်များက သြဂုတ်လအတွင်းမှနေပြီး စတင်စစ်ဆေးမှုများတင်းမာလာခြင်း၊ ပိတ်ဆို့နေမှုများ ထပ်မံပြုလုပ်လာနေသည်ကို တွေ့ရသည်။