AB News – မတ်လ ၁၀၊ ၂၀၂၄
ရက္ခိုင်ပြည်၊ စစ်တွေမြို့ကို အကြမ်းဖက် စစ်ကောင်စီအဖွဲ့က လက်နက်ကြီးဖြင့် တတိယအကြိမ်မြောက် ပစ်ခတ်၍ ၈ ဦးထက်မနည်း ပြင်းထန်ဒဏ်ရာရရှိသွားခဲ့ကြောင်း သတင်းရရှိသည်။
ယနေ့မတ်လ ၉ ရက်၊ ည ၁၁ နာရီ ၂၀ ကျော်အချိန်တွင်အကြမ်းဖက်စစ်ကောင်စီ၏ စစ်တွေအခြေစိုက် အမှတ် ၁၂ ရဲတပ်ရင်းမှ လက်နက်ကြီးတစ်လုံးသည် ကသဲရပ်ကွက်သို့ ပစ်ခတ်ခဲ့သည်။
ထိုသို့ပစ်ခတ်ခဲ့မှုကြောင့် ၎င်းရပ်ကွက်အထဲတွင် ကျရောက်ပေါက်ကွဲကာ ဒဏ်ရာရရှိသူများရှိခဲ့ကြောင်း အမျိုးသား ၁ ဦးက AB News သို့ပြောသည်။
” အမှတ် ၁၂ ရဲတပ်ရင်းကပစ်တာပါ။ မြို့ထဲကိုပစ်သံကြားလိုက်ပါတယ်။ အဲ့ဒီရပ်ကွက်မှ သွားကျတယ်။ ထိခိုက်ဒဏ်ရာရတဲ့သူတွေလည်းအများကြီး ရှိတယ် ” ဟု ဆိုသည်။
အကြမ်းဖက်စစ်ကောင်စီ၏ လက်နက်ကြီးများဖြင့် ရည်ရွယ်ချက်ရှိရှိ ပစ်ခတ်မှုကြောင့် မြို့ခံပြည်သူများ၏ အသက်အိုးအိမ်လုံခြုံမှုသည်လည်း ကင်းမဲ့လာရသည်။
ပြင်းထန်ဒဏ်ရာရရှိသူများကို စစ်တွေမြို့ ပြည်သူ့ဆေးရုံကြီးသို့ အရေးပေါ်ပို့ဆောင်နေရကြောင်း သိရသည်။
လက်ရှိတွင် ထိခိုက်သေဆုံးမှု/ရှိမရှိကို AB News က အတည်ပြုနိုင်ရန်အတွက် ဆက်လက်စုံစမ်းနေဆဲဖြစ်သည်။
စစ်ကောင်စီအဖွဲ့က စစ်တွေမြို့ကို အဝင်/အထွက်ပိတ်ဆို့ထားခြင်း၊ လမ်းသွားလမ်းလာသူများကို စစ်ဆေးမေးမြန်းခြင်းနှင့် ငွေညှစ်မှုများပြုလုပ်နေကြောင်းသိရသည်။
ပြီးခဲ့သည့် ဖေဖော်ဝါရီလ ၂၉ရက် နံနက် ၈ နာရီ ၁၀ မိနစ်တွင် စစ်တွေမြို့၊ ပွိုင့် ရေတပ်စခန်းအနီး၌ ကျောက်ချထားသည့် စစ်သင်္ဘောက စစ်တွေမြို့မဈေးကို ရည်ရွယ်ချက်ရှိရှိ ပစ်ခဲ့သည့်အတွက်
အရပ်သား ၁၂ ဦး သေဆုံးခဲ့ပြီး ၈၀ကျော် ဒဏ်ရာရရှိခဲ့သည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL