ပုဏ္ဏားကျွန်း ဒေသခံများ စစ်ဘေး တိမ်းရှောင်
AB News – သြဂုတ် ၂၀၊ ၂၀၂၅
နွယ်စိုး
စစ်ကော်မရှင်တပ်၏ လက်နက်ကြီးပစ်ခတ်မှုအန္တရာယ်နှင့် ပင်လယ်ပြင်တွင် စစ်သင်္ဘောများ ရောက်ရှိနေသည့်သတင်းကြောင့် ပုဏ္ဏားကျွန်းမြို့နယ်ရှိ ကျေးရွာများမှ ဒေသခံများသည် ဘေးလွတ်ရာသို့ ထွက်ပြေးတိမ်းရှောင်နေကြရသည်။
စစ်ဘေးရှောင်ရသည့် ကျေးရွာများတွင် တန်ပတ်လှန်း၊ ပဒေသာ၊ ဆင်အင်းကြီး၊ ဒီပါရုံ၊ ကွမ်းတောင်၊ ငှက်ကြီးကျွန်းနှင့် အလယ်ကျွန်းတို့ ပါဝင်ကြောင်း သိရသည်။
” စစ်တွေက လက်နက်ကြီးတွေ ပစ်ခတ်တာတွေရှိတယ်။လေကြောင်းအန္တရာယ်တွေကိုလည်း စိုးရိမ်ရတဲ့ အခြေအနေဖြစ်တယ်။ နောက်ပြီး စစ်တွေပင်လယ်ပြင်မှာ စစ်သင်္ဘောတွေ စတင်လှုပ်ရှားနေတဲ့သတင်းကြားလို့ စစ်ဘေးရှောင်တာပါ” ဟု ဒေသခံတစ်ဦးက ပြောသည်။
ထို့အပြင် အခြားဒေသခံတစ်ဦးကလည်း “စစ်တွေနဲ့ နီးတော့ လက်နက်ကြီးတွေ ထိမှာကို ကြောက်ရတယ်။ စစ်ကြောင်းတွေလည်း အသွားအလာများလာလို့ ထွက်ပြေးလာကြရတာ” ဟု ဆိုသည်။
ပုဏ္ဏားကျွန်းမြို့သည် စစ်ကော်မရှင် နှင့် အာရက္ခတပ်တော် (AA) တို့အကြား တိုက်ပွဲများပြင်းထန်နေသည့် စစ်တွေမြို့နှင့် နီးကပ်စွာတည်ရှိသည်။
ဖေဖော်ဝါရီ ၂၁ ရက်နေ့တွင် AA က ပုဏ္ဏားကျွန်းအခြေစိုက် ခမရ ၅၅၀ တပ်ရင်းကို ထိုးစစ်ဆင်တိုက်ခိုက်ခဲ့ပြီး မတ်လ ၄ ရက်နေ့တွင် အပြီးသတ် သိမ်းပိုက်နိုင်ခဲ့သော်လည်း ဒေသခံများသည် မြို့ထဲသို့ ပြန်လည်ဝင်ရောက်ခွင့် မရရှိကြသေးပေ။
လက်ရှိတွင် စစ်တွေနှင့် ပုဏ္ဏားကျွန်းမြို့နယ်တို့တွင် နှစ်ဖက်အကြား စစ်ရေးတင်းမာမှုများ ဆက်လက်ရှိနေပြီး မကြာခဏ အပြန်အလှန် ပစ်ခတ်မှုများလည်း ရှိနေသည်။