AB News – ဒီဇင်ဘာ ၁၅၊ ၂၀၂၃
ရက္ခိုင်ပြည်တွင် စစ်ကောင်စီအဖွဲ့ ပစ်ခတ်သည့် လက်နက်ကြီးကျည်ထိမှန်ပြီး မြောက်ဦးမြို့မှ ဘုန်းတော်ကြီး ၁ပါးနှင့် ၊ လက်နက်ငယ်ကျည်ထိမှန်ပြီးကျောက်တော်မြို့နယ်မှ အမျိုးသား ၁ဦး ထိခိုက်ဒဏ်ရာ ရရှိခဲ့ကြောင်း AB News မှ စုံစမ်းသိရှိရသည်။
ပြီးခဲ့သည့် ဒီဇင်ဘာလ ၁၃ရက်၊ နေ့လည် ၃နာရီ ၂၀မိနစ်အချိန်တွင် မြောက်ဦးမြို့အခြေစိုက် ခမရ ၅၄၀တပ်ရင်းမှ ပစ်ခတ်သည့် လက်နက်ကြီးကျည် ကျရောက်ပေါက်ကွဲပြီး မြောက်ဦးမြို့၊ ရွှေဂူတောင်ရပ်ကွက်၊ အောင်သပြေတောရကျောင်းတိုက်မှ အရှင်အဂ္ဂသာမိ ၇၉နှစ်၏ ညာဘက်ပေါင်ရင်းတွင် ထိခိုက်ဒဏ်ရာရရှိခဲ့သည်။
နိုဝင်ဘာလ ၂၇ရက်၊ ညဥ့်၁၀နာရီကျော်အချိန်တွင် စစ်ကောင်စီအဖွဲ့ ခမရ ၃၇၆ တပ်ရင်းမှ လက်နက်ငယ်ဖြင့် ပစ်ခတ်သောကြောင့် ကျောက်တော်မြို့နယ်၊ ပြင်လှကျေးရွာမှ ဦးအောင်နိုင်ချေ ၃၅နှစ်၏ ဘယ်ဘက်လက်နှင့် ဘယ်ဘက်နံရိုးဘေးတွင် ကျည်ထိမှန်ပြီး ပြင်းထန်စွာ ဒဏ်ရာရရှိခဲ့ကြောင်း သိရှိရသည်။
အကြမ်းဖက် စစ်ကောင်စီ၏ လက်နက်ကြီး၊ လက်နက်ငယ်ဖြင့် ရည်ရွယ်ချက်ရှိရှိ ပစ်ခတ်နေသောကြောင့် ရက္ခိုင်ပြည် မြို့နယ် အများအပြားတွင် သေဆုံးသူ ၄၀ ကျော်ထိရှိလာခဲ့ပြီး ဒဏ်ရာရရှိသူ ၇၀ ကျော် ရှိလာနေကြောင်း တွေ့ရသည်။