ကျောက်တော် တပ်မ စကခ (၉) မှ နိုဝင်ဘာ ၈ ရက်နေ့က ဖမ်းဆီးသွားသည့် ဓာတ်ပုံဆရာ ဦးစောမိုးကျော်ကို ကျောက်တော်မြို့မရဲစခန်းတွင် ချုပ်ထားကြောင်းစုံစမ်းသိရှိရသည်။
အဖ ဦးစံရွှေ၏သား ဦးစောမိုးကျော်မှာ နိုဝင်ဘာလ ၈ ရက်နေ့က မင်းပြားမှ စစ်တွေ့သို့သွားရာလမ်းရှိ စစ်ကောင်စီတပ် စစ်ဆေးရေးဂိတ်တွင် စစ်ဆေးခံရပြီးနောက် ဖမ်းဆီးခံခဲ့ရခြင်းဖြစ်သည်။
၎င်းမှာ စကခ ၉ မှ ဖမ်းသွားပြီးနောက် မိသားစုနှင့် ဆက်သွယ်မှု လုံးဝမရှိဘဲ ရှိနေခဲ့ကာ ယခု ကျောက်တော်မြို့မရဲစခန်းတွင် ရောက်ရှိနေသည်ကို မိသားစုများအား ဆက်သွယ်၍ ပြောကြားခြင်း မရှိသေးကြောင်း သိရသည်။
ကျောက်တော်မြို့မ ရဲစခန်းတွင် ရောက်ရှိနေသည်မှာ ၄ ရက်ခန့်ကြာပြီဖြစ်ကြောင်းလည်း ခိုင်လုံသည့် သတင်းရင်းမြစ်ပေးပို့ချက်အရ သိရသည်။
ဦးစောမိုးကျော်မှာ မင်းပြားမြို့ဇာတိဖြစ်ပြီး စစ်တွေမြို့တွင်အခြေချနေထိုင်သူဖြစ်ပြီး အလှဓာတ်ပုံနှင့် ပွဲလမ်းသဘင်ပုံများကို ရိုက်ကူးလေ့ရှိသော ဓာတ်ပုံဆရာတစ်ဦးဖြစ်ကြောင်း ၎င်း၏ ဖေ့စ်ဘုတ်ကို လေ့လာချက်အရ သိရသည်။
နောက်ထပ် မင်းပြားမြို့နယ်မှ ဆယ်တန်းနှစ်ဟောင်းကျောင်းသူတစ်ဦးနှင့် ၎င်းငှားစီလာသည့် ဆိုင်ကယ် ကယ်ရီသမားတစ်ဦးတို့မှာလည်း မောင်တောကြိမ်ချောင်း စစ်ဆေးရဲတွင် အဖမ်းခံရပြီးနောက် ၁ လကျော်ကြာသည်အထိ မိသားစုနှင့် အဆက် အဆက်အသွယ် မရရှိသေးကြောင်း သိရသည်။
