ABN-ကိုဟိန်းထွန်း
ရခိုင်ပြည်၊ ဂွမြို့နယ်၊ ဆင်ကူးကျေးရွာ၏အနောက်ဖက် ဆပ်သွားချောင်းဖျားနားတွင် ရဟန်း ၈၀ ကျော်နှင့် တောရဆောက်တည်နေသည့် ဆရာတော်ကို ဂွမြို့နယ် ရပ်ကျေးသံဃနာယကဥက္ကဋ္ဌ ဦးပညာဒီပက နှင်ထုတ်ကြောင်းသိရသည်။
တောရဆောက်တည်နေသည့်က ကဝိဓဇဆရာတော်မှာ ဂွမြို့နယ် ဂျိုင်ကောက်ရွာတွင်မွေးဖွားသည့်ရခိုင်လူမျိုးဖြစ်သည်။
မိမိမြေဖြစ်သော ဂွမြို့နယ်တွင် သာသနာပြုရန်အတွက် စာသင်တိုက် ဆောက်လုပ်မည်ကို ရပ်ကျေးသံဃနာယကဥက္ကဋ္ဌ သို့ဦးတိုက်လျှောက်ထားခဲ့ပြီး ၎င်းတို့က ဆောက်လို့ရနိုင်ကြောင်းကတိပေးပြီးမှ ယခုလို စာဖြင့်နှင်ထုတ်ကြောင်း ဆရာတော်ကဝိဓဇက ABN သို့မိန့်သည်။
“စာသင်တိုက်ဆောက်ဖို့အတွက် ရပ်ကျေးသံဃနာယက ဥက္ကဋ္ဌကို ဦးတိုက်လျှောက်ပါတယ်၊ သူတို့ကလည်း ဆောက်လို့ရတယ်လို့ကတိပေးတယ်၊ ဓနိ ၊ မိုးကာနဲ့ယာယီတဲသဘောမျိုးဆောက်ပါတယ်
ဝါဆိုလို့ရအောင်အတွက်ပါ၊ ၁ပတ်လောက်ကြာတော့ ၎င်းတို့က ကျနော်တို့ခွင့်ပြုချက်မရပဲနဲ့ကျူးကျော်ကျောင်းဆောက်တယ်၊ အတင်းသမုတ်တယ် ဆိုပြီးအကြောင်းပြချက်နဲ့ ၇ ရက်အတွင်း သံဃာတွေထွက်သွားဆိုပြီး သံဃနာယကတံဆိပ်တုံးစာနဲ့ နှင်ထုတ်တယ်” ဟု မိန့်သည်။
လက်ရှိတောရဆောက်တည်နေသည့် ရဟန်း၊ သံဃာများနေထိုင်ရန်အတွက် ကျောင်းတကာ များက မိုးမကျမီ အဆောင်များကို အမြန်ဆောက်စေလိုကြောင်းသိရသည်။
အဆိုပါကျောင်းဆောက်လုပ်ခြင်းကို နာလိုသည့်လူနှင့် ၊ မနာလိုသည့်လူများရှိနိုင်သော်လည်း မိမိမွေးရပ်မြေတွင်ကျောင်းဆောက်၍ နှင်ထုတ်ခံရခြင်းသည် နိုင်ငံတကာဥပဒေရော့ လူ့အခွင့်ရေးအရရော့ တရားမျှတမှုမရှိကြောင်းဆရာတော်က ဆက်၍ မိန့်သည်။
“ကျောင်းဆောက်တာနဲ့ပတ်သတ်လို့ နာလိုတဲ့သူရှိသလို မနာလိုတဲ့သူတွေရှိမယ်လို့ထင်ပါတယ်၊ ၊ရခိုင်မိဘနှစ်ပါးက ဆင်းသက်လာတဲ့ မွေးရပ်မြေပဲ၊ ဘယ်တော့မှထွက်သွားမှာမဟုတ်ပါဘူး၊ကိုယ့်ဇာတိမွေးရပ်မြေမှာ အခုလိုနှင်ထုတ်ခံရတာက နိုင်ငံတကာ ဥပဒေအရရော့ လူ့အခွင့်ရေးအရရော့ တရားမျှတမှုရှိပါ့မလား” ဟု မိန့်သည်။
၎င်းတောရကျောင်းတိုက်ရှိ ရဟန်း သာမဏေ ၈၀ ကျော်သည် သစ်ရိပ်၊ ဝါးရိပ်အောက်များတွင်သီတင်းသုံးနေထိုင်လျက်ရှိကြောင်းသိရသည်။
ထိုအကြာင်းအရာများ မှန်၊ မမှန်အတည်ပြုလိုသည့်အတွက်ကြောင့် ABN မှ ရပ်ကျေးသံဃနာယကအဖွဲ့သို့ ဆက်သွယ်မေးမြန်းခဲ့ရာ ဦးပညာဒိပက ယခုလိုမိန့်သည်။
“သူတို့တွေကိုစာပို့ထားတယ်၊ စာမှာပါတဲ့အတိုင်းပဲ “ဟု မိန့်သည်။
၎င်းတောရကျောင်းတွင် ဗုဒ္ဓဘာသာသာသနာပြုရန်အတွက် ရခိုင်၊ ကရင်၊ ပလောင်၊ ဝ၊ ရှမ်း၊ လားဟူး၊ အခါ၊ ပအို့ဝ်၊ ဗမာ၊ တိုင်းရင်း
သား ရဟန်း သာမဏေများသည် ဗုဒ္ဓစာပေသင်ကြားနေကြောင်းသိရသည်။