ABN-ဟိန်းထွန်း
စက်တင်ဘာ ၂ ရက်
ရခိုင်ပြည်၊ ပုဏ္ဏားကျွန်းမြို့နယ်၊ ဂဏန်းတောင်စစ်ဘေးရှောင်စခန်းတွင် စားနပ်ရိက္ခာများအရေးတကြီးလိုအပ်နေကြောင်း သိရသည်။
၎င်းစခန်းတွင် စားဝတ်နေရေးမဖူလုံသည့်အတွက်ကြောင့် စစ်ဘေးရှောင်များသည် အနီးအနားရှိရွာများသို့သွား၍ ပျိုးစိုက်ခြင်း၊ မြောင်းတူးခြင်းများ လုပ်ကိုင်နေရသော်လည်း လုပ်အားခရသည့်ငွေကြေးမှာ နည်းပါးသည့်အတွက် အခက်အခဲဖြစ်နေရကြောင်း စခန်းတာဝန်ခံ ဦးကျော်နိုင်က ပြောသည်။
“ကျနော်တို့က အနီးအနားကရွာတွေကိုသွားပြီး ကြုံရာကျဗန်းလုပ်ရပါတယ်၊ ပျိုးစိုက်တဲ့သူစိုက်၊ မြောင်းတူးတဲ့သူတူးပြီး အလုပ်လုပ်နေရတယ်၊ လုပ်အားခရတဲ့ ပိုက်ဆံကလည်းနည်းတော့ စားဝတ်နေရေးအခက်အခဲတွေ ဖြစ်လာတယ်” ဟု ဆိုသည်။
စစ်ဘေးရှောင်အများစုသည် အလုပ်လက်မဲ့ဖြစ်နေလျှက်ရှိနေကာ စားဝတ်နေရေးမဖူလုံမှုများကြောင့် အလုပ်သွားရှာရန်အတွက် ဆိုင်ကယ် ဆီစရိတ်များကုန်ကျခြင်းများ ၊ ကုန်စျေးနူန်းမြင့်မားမူများနှင့်ရင်ဆိုင်နေရကြောင်း သိရသည်။
ထိုစခန်းတွင် အိမ်ထောင်စုအရေအတွက် ၁၂၉ စုရှိပြီး လူဦးရေ အရေအတွက်မှာ ၅၄၇ ဦး ရှိကြောင်း သိရသည်။
၎င်းထဲတွင် မသန်စွမ်းသူ ၇ ဦးရှိနေကာ နားမကြာသူ၊ မျက်စိကွယ်နေသူ၊ လေဖြတ်နေသူ နှင့် မွေးရာပါကိုယ်လက်အင်္ဂါ ချို့ယွင်းနေသူများလည်းရှိကြောင်း သိရသည်။
အလုပ်အကိုင်ရှားပါးလာခြင်းနှင့် တစ်နေ့တာဝင်ငွေ နည်းပါလာသည့်အတွက် အလုပ်လက်မဲ့ဖြစ်ကာ ကူညီနိုင်သည့်အဖွဲ့အစည်းများမှ ထောက်ပံ့ပေးစေချင်ကြောင်း ၎င်း မှ ဆက်၍ပြောသည်။
“အလုပ်ကလဲမရှိဘူး၊ တစ်နေ့လုပ်လို့ ရတဲ့ပိုက်ဆံကလည်း လုံလောက်မှုမရှိဖြစ်နေပါတယ်၊ အလုပ်လက်မဲ့ဖြစ်နေသူတွေက များပါတယ်၊ ကူညီနိုင်တဲ့အဖွဲ့အစည်းတွေက ကူညီပေးစေချင်ပါတယ် ” ဟုဆိုသည်။
ကျောင်းသား/ ကျောင်းသူတစ်ချို့မှာလည်း ငွေကြေးမပြေလည်သည့်အတွက် ကျူရှင်ခ မပေးနိုင်သည့် မိသားစုလည်းရှိနေကြောင်းသိရသည်။
လက်ရှိတွင် ရခိုင်ရှိစစ်ဘေးရှောင်စခန်းအများစုတွင် စားနပ်ရိက္ခာအဆင်မပြေမှုများစွာ ရှိနေသည့်အပြင် နိုင်ငံတာကာမှ လူသားချင်းစာနာမှုဆိုင်ရာ ထောက်ပံ့ပေးသည့် အဖွဲ့အစည်းများမှလည်း ကူညီထောက်ပံ့ပေးမှု အားနည်းနေကြောင်း တွေ့ရသည်။