ABN-နွယ်စိုး
ရခိုင်ပြည်၊ ကျောက်ဖြူမြို့နယ် ဝမျှော်လမ်းကွေ့တွင် ရမ်းဗြဲမြို့ဘက်ကလာသော ဆိုင်ကယ်နှင့် ကျောက်ဖြူမြို့ဘက်မှလာသည့်သုံးဘီး နှင့်မျက်နှာချင်းဆိုင် တိုက်မိခဲ့ရာ ၁ ဦးမှာ ဒဏ်ရာပြင်းထန်စွာရရှိခဲ့ကြောင်းသိရသည်။
ဆိုင်ကယ်တိုက်ခံရသူမှာ ကျောက်ဖြူမြို့နယ် လိပ်တင်ရွာက ဦးမောင်မောင်ဖြစ်သည်။
၎င်းသည် ခရီးသည် ၃ ဦးနှင့် မေလ ၃ရက်နေ့တွင်ကျောက်ဖြူမြို့နယ် လိပ်တင်ရွာမှ ရမ်းဗြဲဘက်သို့ ထွက်သွားခဲ့ရာ ရမ်းဗြဲမြို့နယ် စည်ပင်ရွာဖက်မှလာသည့် ဆိုင်ကယ်နှင့် ဝမျှော်လမ်းကွေ့တွင် မျက်နှာချင်းတိုက်မိခဲ့ပြီး ဒဏ်ရာရရှိကြောင်း ကျောက်ဖြူဒေသခံ ၁ ဦးက ABN သို့ပြောသည်။
“ဆိုင်ကယ်တိုက်တာကတော့ ၆ နာရီလောက်ကဖြစ်ပါတယ်၊ လူ ၃ ယောက်တင်လာတဲ့သုံးဘီးက ကျောက်ဖြူကနေ ရမ်းဗြဲဖက်သို့သွားတယ်၊ ရမ်းဗြဲဖက်ကလာတဲ့ဆိုင်ကယ်နဲ့ ဝမျှော်လမ်းကွေ့မှာ မျက်နှာချင်းဆိုင်တိုက်ပါတယ်၊ သုံးဘီးမောင်းတဲ့သူပါးမှာ ဒဏ်ရာရသွားတယ်” ဟုဆိုသည်။
သုံးဘီးပိုင်ရှင်မှာ ဒဏ်ရာပြင်းထန်ခဲ့သည့်အတွက် ကျောက်ဖြူပြည်သူ့ဆေးရုံကြီးတွင် ဆေးကုသမှုခံယူနေကြာင်းသိရသည်။
ထို့အပြင် ပြီးခဲ့သည့် ဧပြီလအတွင်းကလည်း ကျောက်ဖြူတွင်ယာဥ်တိုက်မှုကြောင့် လူ ၃ ဦးသေဆုံးခဲ့သည်။
