ABN – ရှိုင်းမိုး
ဇွန် ၆ ရက်
ကျောက်ဖြူမြို့တွင် AA နှင့်ဆက်စပ်၍ မတရားအသင်းဆက်သွယ်မှုပုဒ်မ ၁၇ ( ၁ ) ဖြင့်တရားစွဲဆိုခံထားရသူများကို ဇွန်လ ၂ ရက်နေ့ နံနက် ၁၀ နာရီအချိန်ခန့်တွင် ၂၂ ကြိမ်မြောက်ရုံးထုတ်ရာတွင် စစ်ကောင်စီဖက်မှ တရားလိုရောက် မလာကြောင်း သိရသည်။
စစ်ကောင်စီဖက်မှ တရားလိုလုပ်ပြီးတရားစွဲဆိုထားသည့် တရားလို ၂ဦးမှာ ဗိုလ်ကြီး ရှိုင်းထက်အောင်နှင့် ဗိုလ်အဆင့်ရှိသူ တစ်ဦးတို့ဖြစ်ကြသည်။
“တရားလိုမရောက်ပါဘူး၊ ၂၀ကြိမ်မြောက်တုန်းက ၁ ယောက်ရောက်ပါတယ်၊ ဒါပေမယ့် ဒီအကြိမ် တစ်ယောက်မှ မရောက်ပါဘူ၊ ” ဟုအမှုနှင့် ဆက်စပ်သည့်မိသားစုဝင်တစ်ဦးကပြောသည်။
မေလ ၂၃ရက်နေ့က ၂၁ကြိမ်မြောက်ရုံးထုတ်ခဲ့သော်လည်း တရားလိုမရောက်ဟုသိရသည်။
ပုဒ်မ ၁၇/၁ဖြင့် တရားစွဲဆိုခံထားရသည့် ကျောက်ဖြူမြို့၊ စေတီတောင်ရပ်ကွက်မှ ရပ်ကွက်အုပ်ချုပ်ရေးမှူး ဦးဝင်းမောင်အပါအဝင် ၄ ဦးကို ရုံးထုတ်စစ်ဆေးခဲ့သည်ဟုသိရသည်။
အုပ်ချုပ်ရေးမှူး ဦးဝင်းမောင်ကို ၂၀၂၂ နိုဝင်ဘာလ ၂၂ ရက်နေ့ ည ၈နာရီအချိန်တွင် အရပ်ဝတ်ဖြင့် လက်နက်ကိုင်ဆောင်ထားသည့် စစ်ကောင်စီတပ်သား ၆ဦးက ၎င်း၏နေအိမ်ကို ဝင်ရောက်ကာ မျက်နှာကိုအဝတ်ဖြင့်စည်း၍ ဖမ်းခေါ်သွားခဲ့ခြင်းဖြစ်သည်။
ကျောက်ဖြူတွင် AA နှင့်ဆက်စပ်သည်ဟု စွပ်စွဲကာ ဖမ်းဆီးချုပ်နှောင်ခံထားရသူ ၆၀ ခန့်ထိ ရှိနေပြီး၊ အချို့ကို ရုံးထုတ်စစ်ဆေးသော်လည်း တရားလိုမရောက်၍ အမှုကြန့်ကြာနေကြရသည်။
တောင်ကုတ်မြို့နယ်မှ ဖမ်းဆီးထားသော ဒေသခံ ၁၀ ကျော်ကိုလည်း သံတွဲ မြို့နယ်တရားရုံးတွင် ရုံးထုတ်စစ်ဆေးနေသည်ဟုသိရသည်။