ရခိုင်ပြည်၊ ကျောက်ဖြူမြို့တွင် လာမည့် ဇန်နဝါရီလ ၄ ရက်နေ့တွင် လွတ်လပ်ရေးနေ့အထိမ်းအမှတ်အဖြစ် ရခိုင်ရှိလက်နက်ကိုင်အဖွဲအစည်းများအနေဖြင့် စစ်ဆေးမှုတစုံတရာ ခံယူစရာမလိုဘဲ လွတ်လပ်စွာ ဝင်ထွက်သွားလာနိုင်ကြောင်း ကျောက်ဖြူထွေအုပ်က ပြောဆိုလိုက်သည်။
ယမန်နေ့ ဒီဇင်ဘာလ ၃၁ ရက်နေ့ မွန်းတည့် ၁၀ နာရီ ၃၀ ခန့်တွင် ကျောက်ဖြူ အထွေထွေအုပ်ချုပ်ရေးမှူးရုံး၌ ပြုလုပ်ခဲ့သည့် အစည်းအဝေးတွင် ကျောက်ဖြူအထွေထွေအုပ်ချုပ်ရေးမှူး ဦးမျိုးမင်းထွဋ် က ထုတ်ပြန်ပြောဆိုလိုက်ခြင်းဖြစ်ကြောင်း သိရသည်။
လာမည့် ဇန်နဝါရီလ ၄ ရက်နေ့တွင်ကျရောက်မည့် မြန်မာ့လွတ်လပ်ရေးနေ့အတွက် ကျောက်ဖြူမြို့တွင် ရှိုးပွဲများဖြင့် ဖျော်ဖြေပွဲများဖြင့် ကျင်းပရန် စီစဥ်နေကြောင်း သိရသည်။
ထို့အပြင် ကျောက်ဖြူမြို့မှ ကျောက်တစ်လုံးဘုရား စစ်ဆေးရေးဂိတ်မှ စစ်ဆေးမှုများကို ဇန်နဝါရီလ ၃ ရက်နေ့နှင့် ၄ ရက်နေ့တို့တွင် ရပ်တန့်ထားမည်ဖြစ်ပြီး ထိုနေ့တွင် အရပ်သားပြည်သူများအပါအဝင် လက်နက်ကိုင်အဖွဲ့အစည်းများအနေဖြင့် လွတ်လွတ်လပ်လပ် ပျော်ပျော်ရွှင်ရွှင် မြို့အတွင်းသို့ ဝင်ထွက်သွားလာနိုင်ကြကြောင်း ထိုအစည်းအဝေးတွင် ထွေအုပ် ဦးမျိုးမင်းထွဋ် က ပြောကြားခဲ့ခြင်းဖြစ်သည်။
မြန်မာ့ လွတ်လပ်ရေးနေ့အထိမ်းအမှတ်နေ့အဖြစ် ရှိုးပွဲများကို ဇန်နဝါရီလ ၃၊ ၄ ရက်နေ့တို့တွင် နှစ်ရက်ကြာ ကျင်းပမည်ဖြစ်ကြောင်း သိရသည်။
ယနေ့ ဇန်နဝါရီလ ၁ ရက်နေ့တွင်လည်း ကျောက်ဖြူမြို့ ဘောလုံးကွင်းတွင် ရပ်ကွက်ပေါင်းစုံ ဘောလုံးပွဲကို စစ်ကောင်စီတပ်မှ ဦးစီးကျင်းပလျက်ရှိနေပြီး ဘောလုံးကွင်းပတ်လည်တွင်လည်း စစ်ကောင်စီတပ်သားများက လုံခြုံရေးယူထားကြောင်း ဒေသခံများ၏ သတင်းပေးပို့ချက်အရ သိရသည်။
ဇန်နဝါရီလ ၄ ရက်နေ့တွင်ကျရောက်မည့် မြန်မာ့လွတ်လပ်ရေးနေ့အတွက် စစ်တွေ၊ တောင်ကုတ်၊ သံတွဲ၊ ဂွနှင့် ရခိုင်ပြည်ရှိ မြိုနယ်အချို့တွင်လည်း မြန်မာ့လွတ်လပ်ရေးနေ့ကို စစ်ကောင်စီတပ်မှ ဦးစီးကျင်းပသွားမည်ဖြစ်ကြောင်း သိရှိရသည်။
