ABN-မေအိအိအောင်
ရခိုင်ပြည် ကျောက်တော်မြို့နယ်ရှိ ညောင်ချောင်းနှင့် မဟာမုနိ စစ်ဘေးရှောင်စခန်းများတွင် ကယ်ဆယ်ရေး ဆန် အထောက်အပံ့ မရရှိသည်မှာ ၂ လရှိပြီဖြစ်ကြောင်း စခန်းတာဝန်ခံများ ပြောကြားချက် အရသိရသည်။
ညောင်ချောင်းစစ်ဘေးရှောင်စခန်းတွင် အိမ်ထောင်စု ၇၀၂ ဦးနှင့် လူဦးရေ စုစုပေါင်း ၃၀၄၁ ရှိကာ ထိုစခန်းသည် နိုင်ငံတကာနှင့် ပြည်တွင်းအဖွဲ့အစည်းများ၏ ရိက္ခာထောက်ပံ့မှု အကူအညီဖြင့် စစ်ဘေးရှောင်နေသည့် စခန်းတစ်ခုဖြစ်သည်။
“ဆန်အထောက်အပံ့တွေမရောက်ပါဘူး။ မရောက်တာ ဒီလနဲ့ ဆို ၂ လရှိပါပြီ။ အထောက်အပံ့လာမယ်လို့လည်း ပြောသံမကြားပါဘူး” ဟု ညောင်ချောင် စစ်ဘေးရှောင်စခန်းတာဝန်ခံ ဦးသိန်းဝင်းကပြောသည်။
ပြီးခဲ့သည့် ၂၀၂၂ ခုနှစ် ၁၂ လပိုင်းအထိ အထောက်အပံ့များရရှိခဲ့ပြီး ထိုစစ်ဘေးရှောင်စခန်းအား နီပွန်ဖောင်ဒေးရှင်းနှင့် WHO စသည့်အဖွဲများက ဆန် နှင့် ငွေသားများ အကူညီပေးခဲ့ကြောင်း သူကပြောသည်။
“ပြီးခဲ့တဲ့နှစ် ၁၂ လပိုင်းအထိတော့ အကူအညီတွေ လာပေးပါတယ်။ WHO က လူတစ်ယောက်ကို ငွေကျပ် ၂၁၀၀၀ ပေးပါတယ်။ နီပွန်ဖောင်ဒေရှန်းကတော့ တစ်ဦးကို ဆန် ၂ တောင်းစသဖြင့်ပေးခဲ့ပါတယ်” ဟုသူကပြောသည်။.
အလားတူ ကျောက်တော်ရှိ မဟာမုနိ စစ်ဘေးရှောင်စခန်းတွင်လည်း ဆန် အထောက်အပံ့မရသည်မှာ ၂ လရှိပြီဖြစ်ကြောင်း စခန်းမှ တာဝန်ရှိသူ တစ်ဦးဖြစ်သည့် ဦးကျော်ညွှန့်မောင်က ABN ကိုပြောသည်။
“ကျွန်တော်တို့ဖက်မှာလည်း ဆန် ထောက်ပံမှုမရပါဘူး။ ထောက်ပံ့မှုမရတာ ၂ လရှိပါပြီ။ အယင်တုန်းကတော့ နီပွန်ဖောင်ဒေရှန်းက ထောက်ပံ့ပါတယ်” ဟု ပြောသည်။
လက်ရှိတွင် ထိုစစ်ဘေးရှောင်စခန်း၌ အိမ်ထောင်စု ၄၃၂ နှင့် လူဦးရေ ၁၇၉၉ ဦးရှိကြောင်း စခန်းတာဝန်ခံ ပြောကြားချက်အရ သိရသည်။
ယခုနှစ် မိုးရာသီက မိုးနည်းပါးခဲ့သည့်အတွက်ကြောင့် ရခိုင်ရှိ စစ်ဘေးရှောင်စခန်းအများစုတွင် ရေမလုံလောက်မှုနှင့် မသန့်ရှင်းသန့်ရေများကို သုံးစွဲ နေရကြောင်း သိရသည်။
