ABN-သူရမောင်

ဖေဖော်ဝါရီ ၁၈ ရက်

အိန္ဒိယနိုင်ငံ အရှေ့မြောက်ဘက်မှ ရွာတစ်ရွာရှိ ရဲစခန်းရှေ့  အပြင်ဘက်တွင် အသက် ၁၉ နှစ်အရွယ် နူရီဂျာကာတန်မှာ သူမ၏ ၆ လအရွယ် ကလေးငယ်ကိုပွေ့ချီလျက် စိုးရိမ်စိတ်ကြီးစွာဖြင့် ရပ်နေသည်။ ထိုသို့ နေပူကြီးထဲ ရဲစခန်းရှေ့တွင် ရပ်နေရခြင်းမှာ ဖမ်းဆီးခံထားရပြီး တရားစွဲခံထားရသည့် ရုံးချိန်းထုတ်လာမည့် သူမ၏ခင်ပွန်းကို စောင့်နေခြင်းဖြစ်သည်။

တစ်နာရီခန့်စောင့်ပြီးသည့်အခါ ရဲဗန်ကားထဲသို့ခေါ်ဆောင်သွားခဲ့သည့် သူမ၏ခင်ပွန်း အဘာအလီကို စက္ကန့်အနည်းငယ်မျှသာ မြင်လိုက်ရပြီးနောက် ရဲအရာရှိကြီးက ကားတံခါးကို ခပ်ကြမ်းကြမ်းဆောင့်ပိတ်လိုက်သည်။

“ဆရာရယ်၊ ကျေးဇူးပြုပြီးတော့ ကျွန်မယောင်္ကျားကို လွှတ်ပေးပါနော်။ အဲလိုမှ မဟုတ်ဘူးဆိုရင်လဲ ကျွန်မကိုပါ တစ်ခါတည်း အချုပ်ထဲ ဖမ်းထားလိုက်ပါတော့ရှင်” ဟု တောင်းတောင်းပန်ပန် ပြောဆိုလိုက်သည်။

အိန္ဒိယနိုင်ငံ အရှေ့မြောက်ဘက်၊ အက်ဆမ်ပြည်နယ်၊ မိုရီဂါအွန်ခရိုင်တရားရုံးသို့ ရုံးချိန်းထုတ်ရန်ပြင်ဆင်နေသည့် ရဲအရာရှိအား နူရီဂျာကာတန်မှာ သူ့ကလေးကို ပွေ့ချီးကာ ခင်ပွန်းသည်လွတ်မြောက်ရေးအတွက် တောင်းဆိုနေခြင်းဖြစ်သည်။

ကာတန်ခင်ပွန်း အလီမှာ အသက် ၁၈ နှစ်မပြည့်သေးသည့် မိန်းခလေးငယ်များကို လက်ထပ်ယူထားပြီး ပြီးခဲ့သည့်နှစ်ပတ်ခန့်အကြာက အမ်ဆမ်ပြည်နယ် အရှေ့မြောက်ပိုင်းတွင် ဖမ်းဆီးခံထားခဲ့ရသည့် အမျိုးသား (ဟိန္ဒူ၊ မူဆလင်) ၃၀၀၀ ဦးရေထဲမှ တစ်ဦးဖြစ်သည်။

တရားရုံးချိန်းထုတ်သွားသည့် ရဲဗန်ကားမှာ ထွက်ခွာသွားလေပြီဖြစ်သည့်အတွက်ကြောင့် ကာတန်အပါအဝင် အသက် ၁၈ နှစ်မပြည့်မီက အိမ်ထောင်ပြုခဲ့ကြသည့် ရာချီသည့် အမျိုးသမီးများမှာလည်း ဝေဒနာမီး တောက်လောင်လျက် ကျန်ရှိနေခဲ့ရလေသည်။ ယခုအချိန်တွင် အရွယ်ရောက်နေကြလေပြီဖြစ်သည့် ထိုအမျိုးသမီးများက သူတို့မိသား စုများမှာ ပြိုကွဲသွားပြီးဖြစ်ကြောင်း၊ အကူအညီမဲ့စွာ ကျန်ရစ်ခဲ့လေပြီ ဖြစ်ကြောင်း ပြောကြသည်။

ကာတန်မှာ သူ့မအပေါ် ဂရုစိုက်ပေးနိုင်သည့် အလီနှင့် သူမအသက် ၁၇ နှစ်ပြည့် ၂၀၂၁ ခုနှစ်တွင် အားကိုးယုံကြည်စွာနှင့် ခိုးရာလိုက်ပြေးခဲ့ခြင်းဖြစ်သည်။ တစ်နေ့ကို ရူပီး ၄၀၀ (၅ ဒေါ်လာ)ဝင်ငွေရှိသည့် အလီမှာ မိသားစုကို လုပ်ကိုင်ကျွေးမွေးနေရသူ တစ်ဦး ဖြစ်သကဲ့သို့ သူတို့ဇနီးမောင်နှံတွင်လည်း ပြီးခဲ့သည့် ၆ လကတည်းက ကလေးငယ် တစ်ဦး ထွန်းကားခဲ့ပြီးဖြစ်သည်။

“အခုတော့ ကျွန်မတို့ကို ထမင်းကျွေးမဲ့သူ မရှိတော့ဘူး။ ဘယ်လိုဆက်ပြီးတော့ အသက်ရှင်ရတော့မှာလဲ မသိတော့ပါဘူး” ဟုကာတန်ကပြောသည်။

၁၉ နှစ်အရွယ် နူရီဂျာကာတန်မှာ သူ့မယောက္ခမအိမ်သို့ သွားရောက်မှီခိုကာ ထမင်းစား နေရသည်။

ဤကဲ့သို့ တင်းကျပ်သည့် ဆောင်ရွက်ချက်ကို လူဦးရေ ၃၅ သန်းနေထိုင်ပြီး အသက်မပြည့်သေးမီ အိမ်ထောင်အများဆုံးကျသည့် နေရာတစ်ခုဖြစ်သည့် မိုရီဂါအွန် ခရိုင်တွင် လုပ်ဆောင်လိုက်ခြင်းဖြစ်သည်။ အာသမ်ဒေသမှ အသက်မပြည့်မီ လက်ထပ်ခွင့်ကို ၂၀၂၀ ခုနှစ်က ၁၃၈ ခုသာ မှတ်ပုံတင်ခဲ့ပြီး  ၂၀၂၁ ခုနှစ်က ၁၅၅ ခုထိ မှတ်ပုံတင်ခဲ့ကြကြောင်း the National Crime Records Bureau (NCRB) က ထုတ်ပြန်ခဲ့သည်။

အိန္ဒိယတွင် အမျိုးသားများမှာ အသက် ၂၁ နှစ်၊ အမျိုးသမီးများမှာ ၁၈ နှစ်တွင် လက်ထပ်နိုင်ကြောင်း တရားဝင်ထုတ်ပြန်ထားသည်။ အထူးသဖြင့် ကျေးလက်ဒေသ များတွင် ဆင်းရဲမွဲတေမှု၊ ပညာမတတ်မြောက်မှုနှင့် ကျင့်ဝတ်သိက္ခာများ ထိမ်းသိမ်း ရသည်ဟူသည့် အချက်များမှာ နိုင်ငံတဝှမ်း အသက်မပြည့်မီအိမ်ထောင်ပြုမှု၏ အကြောင်းပြချက်များ ဖြစ်နေသည်။

 ယူနီဆက်ဖ်၏ ခန့်မှန်းချက်အရ အိန္ဒိယနိုင်ငံတွင် အသက် ၁၈ နှစ်အောက် မိန်းကလေး အနည်းဆုံး ၁ ဒသမ ၅ သန်းခန့်သည် နှစ်စဉ် လက်ထပ်ကြပြီး ကမ္ဘာပေါ်တွင် ကလေးသတို့သမီး အရေအတွက် အများဆုံးနေထိုင်ရာ နေရာ ဖြစ်သကဲ့သို့ ကမ္ဘာလုံးဆိုင်ရာ စုစုပေါင်းလူဦးရေ၏ သုံးပုံတစ်ပုံခန့်ရှိသည်။ အိန္ဒိယနိုင်ငံ အမျိုးသားကျန်းမာရေးနှင့် မိသားစု မှတ်တမ်းအရ အာသမ်ဒေသတွင် ၃၁ ရာခိုင်နှုန်းသော လက်ထပ်ထိမ်းမြှားမှုသည် တားမြစ်ထားသည့် အသက်အရွယ်အုပ်စုတွင် ပါဝင်နေ ကြောင်း ဖော်ပြထားသည်။

အိန္ဒိယနိုင်ငံ၊ ဂူဝါဟာတီမှ မြို့ငယ်တစ်ခုတွင် မိန်းကလေးများမှာ သူတို့၏ မိခင်များနှင့်အတူ အင်န်ဂျီအိုလုပ်သားတစ်ဦးမှ ပို့ချသင်ကြားပေးသည့် အသက်မပြည့်မီ အိမ်ထောင်ပြုခြင်းဆိုင်ရာ ပညာပေးသင်တန်းကို တက်ရောက်ကြသည်။

ပြည်နယ်အစိုးရကလည်း လာမည့် ၂၀၂၆ ခုနှစ်တွင် အသက်မပြည့်မီ လက်ထပ် ခြင်းဆိုင်ရာ ကိစ္စများကို အပြီးသတ် အမြစ်ဖြတ်တော့မည်ဖြစ်ကြောင်း ပြီးခဲ့သည့်လက ထုတ်ပြန်ပြောဆိုလိုက်သည်။

အချို့ဒေသများတွင် ဆယ်ကျော်သက် ကိုယ်ဝန်ဆောင်များမှာ ၂၆ ရာခိုင်နှုန်းထိ ရှိနေကြောင်း အာသမ်မှ  AVY Krishnaမှ ရဲအမှုဆောင်ဒါရိုက်တာက ပြောသည်။

“ဒီလိုအိမ်ထောင်ကျတာတွေက လူမှုရေးအရ မကောင်းတဲ့လုပ်ရပ်တစ်ခု ဖြစ်နေတာပါ။ ရလာဒ်ကတော့ လူသေနှုန်း မြင့်မားလာတာပါပဲ” ဟု ပြောသည်။

မိသားစုများအကြား ထိုကိစ္စနှင့် ပတ်သက်ပြီး ပြည်နယ်တစ်ဝှမ်းရှိ ရဲစခန်းများရှေ့တွင် အမျိုးသမီးများ ငိုယိုရသည်အထိ ဖမ်းဆီးမှုများ ဖြစ်ပေါ်လာစဉ် ရှေ့နေများနှင့် တက်ကြွလှုပ်ရှားသူများထံမှလည်း လုံခြုံရေးအရ ဒဏ်ခတ်အရေးယူမှုများ၊ စစ်ဆေး မှုများ ရှိလာခဲ့သည်။

အသက် ၁၄ နှစ်နှင့် ၁၈ နှစ်ကြား မိန်းကလေးများကို လက်ထပ်မှုဖြင့် တရားစွဲခံထားရသည့် အချို့အမျိုးသားများကို ကလေးလက်ထပ်ခြင်းကို တားမြစ်သည့် ဥပဒေအရ ထောင်ဒဏ် ၂ နှစ်အထိ ချမှတ်ခံထားရသည်။ ၁၄ နှစ်အောက်ကလေးများကို လက်ထပ်သည်ဟု စွပ်စွဲခံထားရသည့် အခြားအမျိုးသားများမှာ ကလေးများကို လိင်ပိုင်းဆိုင်ရာပြစ်မှုများမှ ကာကွယ်ပေးသည့် ပိုမိုတင်းကျပ်သည့် ဥပေဒေဖြင့် တရားစွဲဆိုခံထားရသည်။ ထိုပြစ်မှုသည် အာမခံမရသည့် ပြစ်ဒဏ်ဖြစ်ပြီး ထောင်ဒဏ် ၇နှစ်ကနေ တစ်သက်တစ်ကျွန်းအထိ ချမှတ်နိုင်သည်။

အသက် ၅၀ အရွယ်ရှိသည့် ရက်ဟာရာနီ မိုဒယ်လ်က ရဲများဖမ်းဆီးခံခဲ့ရသည့် သူ့မသား၏ ဓာတ်ပုံကို ပြသခဲ့သည်။

အာသမ်ရဲများက အထက်ဖော်ပြပါ ဥပဒေနှစ်ရပ်အရ အမျိုးသမီးများ၏ လုပ်ဆောင်ချက်များကို တရားဝင် တားဆီးခဲ့သည်။ သို့သော် ပြည်နယ်မြို့တော်ဖြစ်သည့် Guwahatiရှိ အထက်တရားရုံးက ဖမ်းဆီးထားသူများအား စစ်ဆေးမေးမြန်းခဲ့သည်။

“အခုအချိန်မှာ အချုပ်ခန်းထဲမှာ စစ်ဆေးမေးမြန်းမှုတွေဟာ အရေးမဟုတ်ပါဘူး” ဟု တရားရုံးကပြောခဲ့သည်။

အချို့ကမူ အစိုးရအနေဖြင့် ထိုသို့ဖမ်းဆီးနေမှုအစား အသိပညာပေးလှုပ်ရှားမှုများကို တိုးမြှင့်လုပ်ဆောင်သင့်ကြောင်း ပြောကြသည်။

“အထက်တရားရုံးရဲ့  ထုတ်ပြန်ချက်အရတော့ ဖမ်းဆီးခံထားရသူတွေဟာ နောက်ဆုံး စံပြတွေပဲ ဖြစ်သင့်ပါတယ်။ မျှော်လင့်မထားတာက ပြဿနာကိုဖြေရှင်းဖို့ ဖမ်းဆီးမှုကြီး လုပ်ဖို့ ဆုံးဖြတ်လိုက်တာပါ။ လူထုကြားမှာ ဘာမှ အသိပေးပြောကြားတာမရှိဘဲနဲ့ကို လုပ်ခဲ့တာပါ” ဟု အကြီးတန်းရှေ့နေ အင်ရှုမင် ဘိုရာက ပြောသည်။

ပြည်နယ်တွင်းရှိ တက်ကြွလှုပ်ရှားသူများနှင့် နိုင်ငံရေး ပြိုင်ဘက်များက အိန္ဒိယ ဝန်ကြီးချုပ် နရင်ဒရာမိုဒီ ပါတီဖြစ်သည်ံ့ Bharatiya Janata Party (BJP)ကို စွပ်စွဲပြောဆိုခဲ့ ကြသည်။

ရက်ဟာရာနီ မိုဒယ်လ်က အစိုးရအနေဖြင့် ထိုသို့လုပ်ဆောင်ခြင်းမှာ မှန်ကန်ကြောင်း ပြောကြားခဲ့သည်။

အိမ်နီးချင်း ဘင်္ဂလားဒေ့ရှ်မှ ပြောင်းရွှေ့လာခဲ့သည့် လူမျိုးစုများအား အာဏာပိုင်များက မူဆလင်များအပေါ် ခွဲခြားဆက်ဆံသည်ဟု ပြောဆိုချက်များတွင် နိုင်ငံသားဖြစ်ခွင့် မှတ်ပုံတင်ခြင်းအပါအဝင်၊ ကိစ္စအများအပြားကို အာဏာပိုင်များက ဘေးဖယ်ထားကြ သည်ဟု ဝေဖန်သူများက ပြောသည်။

“ဘာသာတိုင်းက လူတွေက ဒီကလေးထိမ်းမြားလက်ထပ်မှုနဲ့ ပတ်သက်နေတယ် ဆိုတာကို ကျွန်တော်တို့ တွေ့ရပါတယ်။ လူ့အဖွဲ့အစည်းကို ကျွန်တော်တို့ ဒီလိုမျိုး ဆုံးဖြတ်ချက်ချလို့ မရပါဘူး။ ဘာသာရေးနဲ့ မျိုးရိုးဇာတ်တွေကို ကြည့်လို့မရပါဘူး။ စစ်ဆေးမှုကိုဘဲ အာရုံစိုက်ထားရမယ်၊ ပြီးတော့ ဒီပြဿနာကို တရားနည်းလမ်းကျကျ ဖြေရှင်းရမယ်” ဟု ဟာစီနာအမီ တက်ကြွလှုပ်ရှားသူများနှင့် ရှေ့နေများကပြောသည်။

အရာရှိများက စွပ်စွဲချက်များနှင့်ပတ်သက်ပြီး ငြင်းဆိုခဲ့ကြသည်။ ထို့အပြင် နောက်ထပ် အမျိုးသား ရာချီ၍လည်း ဖမ်းဆီးထားကြောင်း ပြောကြားခဲ့သေးသည်။

အမီက ဖမ်းဆီးမှုများမှာ အာသမ်လူ့အဖွဲ့အစည်းတွင် လုပ်ဆောင်ချက်များထက် ပိုမိုအန္တရာယ်များကြောင်း ပြောသည်။ ဖမ်းဆီးခံရသူများ၏ ဇနီးအများစုမှာ ပညာမတတ်ခြင်း၊ အလုပ်အကိုင်မရှိခြင်းနှင့် ဆင်းရဲသည့်မိသားစုများမှ ဆင်းသက်လာသူ များဖြစ်ကာ သူတို့၏ ခင်ပွန်းများအား မှီခိုအားထားနေကြရသည်။

“အခုအချိန်ကစပြီးတော့ အသက်မပြည့်ဘဲ လက်ထပ်တဲ့သူ ဘယ်သူ့ကိုမဆို အပြစ်ပေး ရမှာပါ။ အဟောင်းတွေဆိုရင်တော့ အပြစ်ပေးလို့ မသင့်တော်ဘူးလေ” ဟု သူမက ပြောသည်။

AP သတင်းဌာနတွင် ဖော်ပြသည့် Indian child marriage crackdown leaves families in anguish သတင်းဆောင်းပါးကို ABN သတင်းဌာနမှ သူရမောင် ဘာသာပြန်ထားသည်။

#ABN

#ဘာသာပြန်နိုင်ငံခြားသတင်းဆောင်းပါး