AB News – မတ် ၉၊ ၂၀၂၆
စစ်ကိုင်းတိုင်း၊ ယင်းမာပင်ခရိုင်၊ တပ်ရင်း ၂၀ တွင် တပ်သားအမျိုးသမီးတစ်ဦးအား လိင်ပိုင်းဆိုင်ရာအကြမ်းဖက်မှုနှင့် လူအခွင့်အရေးကျူးလွန်မှုများကို တပ်ရင်း ၂၀ နှင့် သက်ဆိုင်ရာ အစုအဖွဲ့များမှ တာဝန်ယူဖြေရှင်းပေးရန် အရပ်ဖက်အဖွဲ့ အစည်း ၁၄၉ ဖွဲ့မှ တောင်းဆိုလိုက်သည်။
ပြီးခဲ့သည့် ၂၀၂၅ ခုနှစ်၊ ဒီဇင်ဘာလကုန်ပိုင်းတွင် ယင်းမာပင်ခရိုင် PDF တပ်ရင်း ၂၀ မှ အသက် ၂၅ နှစ်အရွယ် မူဆလင်အမျိုးသမီး တပ်သား တစ်ဦးသည် တပ်ရင်းခွင့်ပြုချက် မပါဘဲ အလှူထွက်ခံခြင်းကြောင့် အပြစ်ပေးချုပ်နှောင်ခံခဲ့ရပြီး မုဒိန်းမှုပါ ကျူးလွန်ခံခဲ့ရသည်။
အရပ်ဖက်အဖွဲ့အစည်းများ၏ တောင်းဆိုချက် ၃ ခုမှာ
၁။ တပ်ရင်းမှူး ရန်ရှင်းအောင်၊ မုဒိန်းမှုကျုးလွန်သူ အပါအဝင် အခြားကျုးလွန်သူများ၊ ပါဝင်ပတ်သက်သူများအားလုံးကို တော်လှန်ရေး အဖွဲ့အစည်းများ၏ တရားစီရင်ရေးစနစ်အရ အမြန်ဆုံး စုံစမ်းစစ်ဆေးပြီး အရေးယူပေးရန်။ လိုအပ်ပါက လွတ်လပ်သည့် စုံစမ်းစစ်ဆေးရေးအဖွဲ့/ကော်မရှင်မှတဆင့် စုံစမ်းရန်။
၂။ နစ်နာသူ အမျိုးသမီး၊ ၎င်း၏ အမျိုးသားနှင့် သမီးငယ်လေးတို့အား တပ်ရင်း၏ ဖိအားပေးမှုများမှ ကင်းလွတ်သော ဘေးကင်းရာနေရာသို့ အမြန်ဆုံး ရွှေ့ပြောင်းစောင့်ရှောက်ပေးရန်။
၃။ အလားတူဖြစ်ရပ်များကို ထိရောက်စွာ အရေးမယူနိုင်ခဲ့သည့်အတွက် ယခုလို ဖြစ်စဉ်မျိုး ထပ်မံ ဖြစ်ပွားနေခြင်းဖြစ်ပြီး အမျိုးသားညီညွတ်ရေးအစိုးရအနေဖြင့် တော်လှန်ရေးကာလ ၅နှစ်အတွင်း ကျူးလွန်ခံခဲ့ရသော အမျိုးသမီးနှင့် ကလေးငယ်များအတွက် တရားမျှတမှု၊ အရေးယူမှု အမြန်ဆုံး ဖော်ဆောင်ပေးပြီး အမျိုးသမီးများအပေါ် အကြမ်းဖကအမှုတားဆီးရေးမူဝါဒများနှင့် တော်လှန်ရေး အဖွဲ့အစည်းများအတွင်း မည်သည့် ဘာသာဝင်၊ မည်သည့် လူမျိုးကိုမဆို ခွဲခြားဆက်ဆံခြင်းမပြုရေး မူဝါဒများကို လက်တွေ့ကျကျအကောင်အထည်ဖော်ရန် တို့ဖြစ်သည်။
ယင်းအပြင် တော်လှန်ရေးအင်အားစုများအတွင်း ယခုကဲ့သို့ လိင်၊ အမျိုးဘာသာ အခြေပြုပြီး ခွဲခြားဆက်ဆံဖိနှိပ်ခြင်းများကို ဆန့်ကျင်ရန် အရေးကြီးကြောင်း ဆိုသည်။
ပုံ – TM Media
#စစ်ကိုင်း #ယင်းမာပင်ခရိုင် #တပ်ရင်း_တပ်ရင်း၂၀ #အမျိုးသမီးတပ်သား # လိင်ပိုင်းဆိုင်ရာအကြမ်းဖက်မှု #တရားမျှတရေး #အရပ်ဖက်အဖွဲ့အစည်း