ABN-နွယ်စိုး

ဇူလိုင် ၈ ရက်

ပြီးခဲ့သည့် ဇူလိုင်လ ၅ ရက်နေ့က ဘင်္ဂလားဒေ့ရ်ှနိုင်ငံရှိ မူဆလင် ဒုက္ခသည်စခန်းကို ICC အပြည်ပြည်ဆိုင်ရာရာဇဝတ်မှုခုံရုံး၏ ရှေ့နေ Karim AA Khan လာရောက်ပြီး နာရီပိုင်းအကြာတွင် စခန်းအတွင်း ပစ်ခတ်မှုများဖြစ်ပွားခဲ့ကာ မူဆလင် ဒုက္ခသည် ၅ ဦးသေဆုံးခဲ့ကြောင်း ရဲတပ်ဖွဲဝင်များက ပြောကြားခဲ့သည်။

အဆိုပါပစ်ခတ်မှုဖြစ်ပွားရခြင်းအကြောင်းရင်းများမှာ စခန်းအတွင်း ပြိုင်ဖက်များ​​ဖြစ်ကြ​သော ARSAမူဆလင်လွတ်မြောက်ရေးတပ်နှင့် RSOမူဆလင်သွေးစည်းညီညွတ်ရေးအဖွဲ့နှစ်ခု အပြန်အလှန် တိုက်ခတ်ခဲ့ခြင်းကြောင့် ဖြစ်သည်။

သေဆုံးသွားသူ ငါးဦးသည် ARSA အဖွဲ့ဝင်များ ဖြစ်ကြပြီး ထိုသေဆုံးသူများထဲတွင် ARSA တပ်မှူးတဦးပါဝင်သည်ဟု စခန်းလုံခြုံရေးယူထားသော ရဲတပ်ရင်း ပြောခွင့်ရသူ Faruq Ahmed က ပြောကြားခဲ့သည်။

ပစ်ခတ်မှုများဖြစ်ပွားပြီးနောက် စခန်းအတွင်း လုံခြုံရေးများကို တင်းကြပ်ထားကြောင်း သိရသည်။

ထို့အပြင် ပစ်ခတ်မှုမဖြစ်ပွားမီ ဒုက္ခသည်စခန်းခေါင်းဆောင်တဦးဖြစ်သော Ebadullah အသတ်ခံရပြီး နာရီပိုင်းအတွင်း၌ ပစ်ခတ်မှုများ​ဖြစ်ပွားခဲ့သည်ဟု ရဲတပ်ဖွဲဝင်များကပြောကြားခဲ့သည်။

အသက် ၂၇နှစ်အရွယ် Ebadullah သည် ကြာသပတေးနေ့က စခန်းကိုလာရောက်ခဲ့သည့် ICC ရှေ့နေ Karim A.A Khan နှင့် အခြား ဒုက္ခသည်များ တွေ့နိုင်အောင် စီစဉ်ပေးခဲ့သူတစ်ဦးဖြစ်သည်။

စခန်းသို့လာရောက်ခဲ့သည့် ICC ရှေ့နေအနေဖြင့် စခန်းခေါင်းဆောင် Ebadullah အပါအဝင် ငါးဦးအသတ်ခံရသည့် ကိစ္စနှင့်ပတ်သက်၍ တစုံတရာပတ်သက်မှုမရှိဟု မြို့တော်ဒါကာတွင် သတင်းထောက်များကို ပြောကြားခဲ့သည်။