AB News- ဖေဖော်ဝါရီ ၇၊ ၂၀၂၆
ဘင်္ဂလားဒေ့ရှ်နိုင်ငံတွင် အသက်အန္တရာယ် အလွန်စိုးရိမ်ရသည့် နီပါ (Nipah) ဗိုင်းရပ်စ် ကူးစက်ခံရမှုကြောင့် လူနာတစ်ဦး သေဆုံးသွားပြီဖြစ်ကြောင်း ကမ္ဘာ့ကျန်းမာရေးအဖွဲ့ (WHO) က ယနေ့ ဖေဖော်ဝါရီ ၇ ရက်တွင် အတည်ပြုထုတ်ပြန်လိုက်သည်။
သို့သော်လည်း အဆိုပါရောဂါမှာ နိုင်ငံတကာသို့ ပျံ့နှံ့သွားနိုင်ခြေမှာမူ အလွန်နည်းပါးနေဆဲ ဖြစ်သည်ဟု ဆိုသည်။
ဘင်္ဂလားဒေ့ရှ်နိုင်ငံ၊ Naogaon ခရိုင်တွင် နေထိုင်သည့် အသက် ၄၀ မှ ၅၀ နှစ်ကြား အမျိုးသမီးတစ်ဦးသည် စွံပလွန်သီးဖျော်ရည်ကို သောက်သုံးခဲ့ရာမှ ကူးစက်ခံရကာ သေဆုံးသွားခြင်း ဖြစ်သည်။
ထိုအသီးဖျော်ရည်သောက်သုံးခဲ့ပြီး ဇန်နဝါရီ ၂၁ ရက်တွင် ဖျားနာခြင်းနှင့် အာရုံကြောဆိုင်ရာ ရောဂါလက္ခဏာများ စတင်ခံစားခဲ့ရကာ ဆေးရုံတက်ပြီးနောက် သေဆုံးသွားခြင်းဖြစ်သည်။
ဓာတ်ခွဲခန်းစစ်ဆေးချက်အရ အဆိုပါအမျိုးသမီးကို ဇန်နဝါရီ ၂၉ ရက်တွင် နီပါဗိုင်းရပ်စ်ပိုး ရှိကြောင်း အတည်ပြုခဲ့သည်။
အဆိုပါ သေဆုံးသူနှင့် ထိတွေ့ခဲ့သူ ၃၅ ဦးကို စစ်ဆေးခဲ့ရာတွင် နောက်ထပ် ကူးစက်ခံရသူ မတွေ့ရှိရသေးကြောင်း သိရပြီး အိမ်နီးချင်း အိန္ဒိယနိုင်ငံ၊ အနောက်ဘင်္ဂလားပြည်နယ်တွင်လည်း ယခင်အပတ်က ကူးစက်မှု နှစ်ခုရှိခဲ့ခြင်းကြောင့် အရှေ့တောင်အာရှနိုင်ငံအချို့ရှိ လေဆိပ်များတွင် ကျန်းမာရေးစစ်ဆေးမှုများ တင်းကျပ်ထားသော်လည်း ခရီးသွားလာမှု ကန့်သတ်ရန် မလိုအပ်သေးကြောင်း WHO က ဆိုသည်။
နီပါဗိုင်းရပ်စ်သည် လင်းနို့နှင့် ဝက်တို့မှတစ်ဆင့် လူထံသို့ ကူးစက်တတ်ပြီး ရောဂါရှိသူ၏ ကိုယ်ခန္ဓာအရည်များမှတစ်ဆင့်လည်း လူအချင်းချင်း ကူးစက်နိုင်သည်။
အဆိုပါ ဗိုင်းရပ်စ်သည် သေဆုံးမှုနှုန်း ၄၀ ရာခိုင်နှုန်းမှ ၇၅ ရာခိုင်နှုန်းအထိ ရှိပြီး သေဆုံးမှုနှုန်း အလွန်မြင့်မားသည်။
လက်ရှိအချိန်ထိ အဆိုပါရောဂါအတွက် သီးသန့်ကာကွယ်ဆေး (သို့မဟုတ်) ဆေးဝါး မရှိသေးသော်လည်း လင်းနို့များ နားခိုလေ့ရှိသည့် သစ်ပင်များမှ ရရှိသော စွံပလွန်ရည်/ထန်းရည်များကို အစိမ်းသောက်ခြင်းမှ ရှောင်ကြဉ်ခြင်းဖြင့် ကာကွယ်နိုင်သည်။
ဘင်္ဂလားဒေ့ရှ်တွင် ၂၀၀၁ ခုနှစ်မှစ၍ ယခုအထိ နီပါဗိုင်းရပ်စ် ကူးစက်မှု ၃၄၈ ခုခန့် ရှိခဲ့ပြီး ထက်ဝက်ခန့်မှာ ထန်းလျက်ရည်/စွံပလွန်ရည်အစိမ်း သောက်သုံးရာမှတစ်ဆင့် ဖြစ်ပွားခဲ့ခြင်း ဖြစ်သည်။
WHO အကြီးအကဲ Tedros Adhanom Ghebreyesus က ၎င်းရောဂါကို “ရှားပါးသော်လည်း ပြင်းထန်သောရောဂါ” ဟု သတ်မှတ်ထားပြီး အာဏာပိုင်များအနေဖြင့် စောင့်ကြည့်စစ်ဆေးမှုများ တိုးမြှင့်လုပ်ဆောင်နေကြောင်း ပြောကြားခဲ့သည်။