ABN-ရှိုင်းမိုး

ဇွန် ၃၀ရက်

ပြင်သစ်နိုင်ငံတွင် ဆယ်ကျော်သက်အရွယ် လူငယ်တစ်ယောက်ကို ရဲတပ်ဖွဲ့က ပစ်ခတ်ခဲ့ရာမှစ၍ ဆန္ဒပြပွဲများမှတဆင့် နိုင်ငံတစ်ဝန်း အဓိကရုဏ်းများ ပျံ့နှံလာကာ ဇွန်လ ၂၉ ရက်နေ့ ညည့်အချိန်ထိ ဆန္ဒပြသူ ၆၆၇ ယောက်ကိုရဲတပ်ဖွဲ့က ဖမ်းဆီးထားကြောင်း အာဏာပိုင်များက ယနေ့ နံနက်ပိုင်းက ထုတ်ပြန်ပြောကြားသည်။

ပြီးခဲ့သည့် ဇွန်လ ၂၇ ရက်နေ့က အသက် ၁၇ နှစ်အရွယ် နာဟဲလ်ကို ရဲတပ်ဖွဲ့က သေနတ်ဖြင့်ပစ်ခတ်၍ သေဆုံးသွားခဲ့ရာမှစ၍ နိုင်ငံတဝန်းတွင် အဓိကရုဏ်းများဖြစ်ပွားနေခြင်းဖြစ်သည်။

ထိုအဓိကရုဏ်းများအတွင်း ဇွန်လ၂၉ ရက်နေ့ညည့်အချိန်ထိ လူပေါင်း ၆၆၇ ယောက်ကို ဖမ်းဆီးခဲ့ပြီး လုံခြုံ​ရေးတပ်ဖွဲ့ဝင် ၂၄၉ယောက် ထိခိုက် ဒဏ်ရာရရှိခဲ့ကြောင်း ပြည်ထဲရေးဝန်ကြီး ဂျီရယ်ဒါမာနင်က ဆိုသည်။

အကြမ်းဖက်မှုများကို ကိုင်တွယ်ရန် လုံခြုံရေးတပ်ဖွဲ့ဝင် ၉၀၀၀ မှ ၄၀၀၀၀ အထိ တိုးမြှင့်ထားပြီး အဓိကရုဏ်းကို ပြတ်ပြတ် သားသား ကိုင်တွယ်သွားမည်ဖြစ်ကြောင်း၊ ဆန္ဒပြသူများအနေဖြင့် မိမိနေအိမ်များသို့ ပြန်ကြရန်နှင့် အရေးပေါ်အခြေအနေ ကြေညာရန်မလိုအပ်သေးကြောင်း ၎င်းက ဆက်လက်ပြောကြားသည်။

မြို့တော်ပါရီတွင် ဖြစ်ပွားခဲ့သည့် အဓိကရုဏ်းများအတွင်း ရဲတပ်ဖွဲ့က ဆန္ဒပြသူများကို မျက်ရည်ယိုဗုံးများဖောက်ခွဲ၍ လူစုခွဲခြင်း၊ ဆန္ဒပြသူများက လုံခြုံရေးအဖွဲ့ ဝင်များကို မီးရူး၊ မီးပန်းများနှင့်ပစ်ပေါက်ခြင်း၊ အမှိုက်ပုံးများ၊ ကားများကို မီးရှို့ခြင်းကဲ့သို့ အကြမ်းဖက်မှုများ ဖြစ်ပေါ်ခဲ့ပြီး မြို့လယ်ရှိစျေးဆိုင်များကို ဖျက်ဆီးလုယက်မှုများ ဖြစ်ပွားခဲ့သည်။

ယင်းကဲ့သို့ အဓိကရုဏ်းများသည် ပဲရစ်မြို့အပြင် တူးလော့စ်၊ လိုင်ယွန်၊ ရင်းနစ်၊ ကလာမတ်၊ မာဆေးလ်၊ လိုင်လီမြို့များနှင့် ဘယ်လ်ဂျီယမ်နိုင်ငံ၊ ဘရပ်ဆဲလ်မြို့အထိ ပျံ့နှံ့ကူးစက်ခဲ့ပြီး အဆောက်အအုံနှင့် စျေးဆိုင်များ ဖျက်ဆီးခံရမှု၊ မီးရထား၊ ကားများ မီးတိုက်ခံရမှုနှင့် လူများထိခိုက်ဒဏ်ရာရမှုများရှိခဲ့သည်ဟု ရဲတပ်ဖွဲ့က ထုတ်ပြန်သည်။