ရက္ခိုင်ပြည်၊ သံတွဲမြို့နယ် ရေစင်ရွာအနီးသို့ AA ကထိုးစစ်ဆင်တိုက်ခိုက်နေသည့်အတွက် ၂ ဖက်စစ်ရေးပြင်းထန်နေပြီး ရွှေလှေစစ်ကြောင်းကို ဦးဆောင်နေသည့် ၅၅ တပ်ရင်းမှူး ခွန်မျိုးလွင်ဦး နေပြည်တော်သို့ ထွက်ပြေးသွားကြောင်း AB News ကစုံစမ်းသိရှိရသည်။
ယနေ့ မေလ ၁၄ ရက်၊ နံနက် ၈ နာရီကျော်တွင် အာရက္ခတပ်တော်က ရေစင်ရွာအနီးရှိ အင်အား ၆၀ ခန့်ရှိသည့် စစ်ကောင်စီတပ်သားများကို ထိုးစစ်ဆင်တိုက်ခိုက်ခဲ့ရာ တိုက်ပွဲ ပြင်းထန်ခဲ့ကြောင်း ဒေသခံတစ်ဦးက AB News သို့ပြောသည်။
“၈ နာရီလောက်မှာ AA က ရေစင်ရွာအနီးက စစ်ကောင်စီတပ်သားတွေကို တိုက်ခိုက်တယ်။ ပြေးတဲ့ကောင်တွေပြေး၊ သေတဲ့ကောင်သေသွားတယ်။ တိုက်ပွဲက ပြင်းလာနေတယ်။ တပ်ရင်းမှူးလည်း နေပြည်တော်ကို ထွက်ပြေးသွားတယ်လို့ သိရတယ် ” ဟုဆိုသည်။
သံတွဲတွင် AA တိုက်ခိုက်နေသည့် စစ်ကောင်စီတပ်သားများမှာ ပြီးခဲ့သည့် မေလ ၁၂၊ ၁၃ ရက်နေ့က ပင်လယ်ဖက်မှ ဇက်နေဗီဖြင့် ငပလီသို့ စစ်ကူ ရောက်လာသည့် တပ်သားများဖြစ်ကြောင်း သိရသည်။
အဆိုပါရွှေလှေစစ်ကြောင်းကို ဦးဆောင်နေသည့် တပ်ရင်းမှူးမှာ ငပလီခြေစိုက် ခလရ( ၅၅ ) တပ်ရင်းမှ ခွန်မျိုးလွင်ဦး ဖြစ်ကြောင်း သိရသည်။
၎င်းတပ်ရင်းမှူးသည် နေပြည်တော်သို့ သင်တန်းတက်ရန်ခေါ်ဆောင်ခြင်းခံရသည်ဟု သတင်းများထွက်ပေါ်နေသော်လည်း စစ်ရေးကာလပြင်းထန်နေသည့်အချိန်တွင် ထွက်ပြေးသွားခြင်းဖြစ်ကြောင်း ဒေသခံများပြောပြချက်အရသိရသည်။
သံတွဲတိုက်ပွဲအတွင်း AAထိုးစစ်ကြောင့် စစ်ကောင်စီတပ်သား ၆၀ ကျော်ထက်မနည်းသေဆုံးသွားပြီဖြစ်ကြောင်း သိရသည်။
AA က ရေစင်ရွာနှင့် ၁၂ မိုင်ခန့်သာရှိသော သံတွဲ မြို့အနီးသို့ထိ ထိုးစစ်ဆင်တိုက်ခိုက်လာသည့်အတွက် စစ်ကောင်စီ၏ တပ်ရင်းများ၊ နေဗီများမှ လက်နက်ကြီးဖြင့် အနီးအနားရှိရွာများသို့ နေ့စဉ်ရက်ဆက် ပစ်ခတ်နေကြောင်း ဒေသခံများထံမှသိရသည်။
ယမန်နေ့ကလည်း အကြမ်းဖက် စစ်ကောင်စီက လက်နက်ကြီးဖြင့် ပစ်ခတ်ခဲ့မှုကြောင့် အောက်နတ်မော်ရွာမှ ပြည်သူ ၄ ဦး ပြင်းထန်ဒဏ်ရာရရှိခဲ့ကြောင်း သိရသည်။