AB News-ဧပြီ ၄၊ ၂၀၂၅
ရက္ခိုင်တွင် စစ်ကောင်စီ၏ လေကြောင်းနှင့် လက်နက်ကြီးအန္တရာယ်များကြောင့် လူစုလူဝေးဖြင့် သင်္ကြန်ပွဲတော် မကျင်းပရန် အာရက္ခပြည်သူ့အစိုးရမှ ထုတ်ပြန်ချက် ၆ ချက်ကို ယမန်နေ့ မတ်လ ၃ ရက်နေ့တွင် ထုတ်ပြန်ပြောဆိုလိုက်သည်ဟု သိရသည်။
ငလျင်ဒဏ်ကြောင့် ထိခိုက် သေဆုံးမှုများကို ပြန်လည် ကုစားနိုင်ရေး လူသားချင်းစာနာထောက်ထားရေးဆိုင်ရာ ယာယီအပစ်ခတ်ရပ်စဲကြောင်း AA အပါအဝင် တော်လှန်ရေးတပ်ဖွဲ့များက ထုတ်ပြန်ကြေညာထားပြီးဖြစ်သော်လည်း အကြမ်းဖက် စစ်ကောင်စီက လေကြောင်းနှင့် လက်နက်ကြီးမးေဖြင့် အဆက်မပြတ် ပစ်ခတ်တိုက်ခိုက်လျက်ရှိသောကြောငံ့ ယခုကဲ့သို့ ထုတ်ပြန်ခြင်းဖြစ်ကြောင်း စုံစမ်းသိရသည်။
ရက္ခိုင်တွင် သင်္ကြန်ကာလအတွင်း အောက်ပါ စည်းကမ်း ၆ ချက်ကို လိုက်နာကြပါရန် အာရက္ခပြည်သူတို့အား အာရက္ခပြည်သူ့တော်လှန်ရေးအစိုးက ဒေသအလိုက် ထုတ်ပြန်လိုက်ကြောင်း သိရသည်။
၎င်းထုတ်ပြန်ချက် ၆ ချက်မှာ-
(၁) လူအရေအတွက် အများအပြား စီးနှင်းလိုက်ပါလာသည့် ကားများဖြင့် မြို့ပေါ်များတွင် လှည့်ပတ်ခြင်း၊ ရေကစားခြင်း မပြုလုပ်ရ။
(၂) တစ်မြို့နှင့်တစ်မြို့၊ တစ်ရွာနန့်တစ်ရွာ ကားများဖြင့်ကခုန်လှည့်ပတ်ပြီး သွားလာ၍ ရေကစားခြင်းများ မပြုလုပ်ရ။
(၃) လူစုလူဝေးဖြစ်စေသည့် သင်္ကြန်မဏ္ဍပ်များပြုလုပ်၍ ရေကစားခြင်း မပြုလုပ်ရ။
(၄) လူစု လူဝေးဖြစ်စေသည့် Show ပွဲများဖြင့် ကျင်းပခြင်း မပြုလုပ်ရ။
(၅) ဘုန်းကြီးကျောင်းများ၌ ဥပုသ်သီလဆောက်တည်ခြင်း၊ အလှူအတန်းများပြုလုပ်ခြင်းများအား လူစုလူဝေးများဖြင့် မပြုလုပ်ရ။
(၆) ပြည်သူများ၏ လုံခြုံရေးကို လေးစားလိုက်နာသောအားဖြင့် မြို့၊ ရွာများအတွင်း၌ ဆောင်းဘောက်များ ဆူညံစွာဖွင့်ခြင်း၊ လူမှုပတ်ဝန်း ကျင်ကို အသံ၊ အပြုအမူများဖြင့် အနှောင့်အယှက်ဖြစ်စီသည့် လုပ် ရပ်များကို မပြုလုပ်ရ စသည့် အချက်များ ပါဝင်သည်။
အထက်ပါစည်းကမ်းသတ်မှတ်ချက်များကို အာရက္ခပြည်သူ့အစိုးရမှ သက်ဆိုင်ရာ စစ်ဒေသ၊ မြို့၊ ရွာရှိ အုပ်ချုပ်ရေးဌာနများသို့ ညွှန်ကြားထားပြီး ၎င်းဌာနများမှ တစ်ဆင့် ပြည်သူများသို့ ထပ်မံအကြောင်းကြား နေကြောင်း သိရသည်။
ထို့အပြင် ချမှတ်ထားသည့် စည်းကမ်းချက်များအပေါ် ပြည်သူများ လိုက်နာမှု အခြေအနေများကိုလည်း သက်ဆိုင်ရာဌာနများမှ စောင့်ကြည့်ပေးရန်လည်း လမ်းညွှန်ထားသည်။
ဓာတ်ပုံ-ယခင်နှစ်က ULA/AA က ဦးစီးကျင်းပခဲ့သည့် ဇီးချောင်းသင်္ကြန်ပွဲအားတွေ့ရစဥ်/ABN