AB News – သြဂုတ် ၆၊ ၂၀၂၅
ဒေဝီ
ရက္ခိုင်ပြည်၊ မြောက်ဦးမြို့နယ်၊ ဝေသာလီကျေးရွာတွင် လက်ပစ်ဗုံးသီးကို ဆော့ကစားရာမှ ပေါက်ကွဲ၍ ၃ နှစ်အရွယ် ကလေး ၁ ဦး သေဆုံးပြီး ၄ ဦး အပြင်းအထန် ဒဏ်ရာရသွားကြောင်း AB News မှ စုံစမ်းသိရသည်။
ပြီးခဲ့သည့် သြဂုတ်လ ၃ ရက်နေ့က မြောက်ဦးမြို့၊ ဝေသာလီကျေးရွာတွင် လက်ပစ်ဗုံးကို ဆော့ကစားရာမှ ပေါက်ကွဲကာ ကလေးငယ် ၁ ဦးသေဆုံးပြီး ၄ ဦးဒဏ်ရာရခဲ့သည်။
ဗုံးထိမှန်ကာ သေဆုံးသွားသည့် ကလေးငယ်မှာ အသက် ၃ နှစ်အရွယ် မောင်မျိုးမြတ်ဖြိုးဖြစ်သည်။
”လက်ပစ်ဗုံးကွဲသံတော့ကြားလိုက်တယ်။ နောက်မှ ကလေးတွေဆော့လို့ ပေါက်ကွဲတာမှန်းသိတယ်။ ကလေးက ငယ်ငယ်လေးရှိသေးတယ်။ မိဘတွေရဲ့ ဂရုစိုက်မှု ပေါ့ဆလို့ ဖြစ်သွားတာ ဖြစ်တယ်” ဟု ဒေသခံ ၁ ဦးက ပြောသည်။
အဆိုပါဖြစ်စဥ်တွင် သေဆုံးသွားသည့် ကလေးငယ်အပါအဝင် ကလေးငယ် ၄ ဦးသည် ကျေးရွာအတွင်းရှိ နေအိမ် ၁ အိမ်က ရရှိလာသည့် လက်ပစ်ဗုံး ၁ လုံးကို ဆော့ကစားရာမှ ပေါက်ကွဲမှုဖြစ်ခဲ့ကြောင်း သိရသည်။
ဒဏ်ရာရရှိသွားသည့် ကလေးငယ်များကို ဆေးကုသမှုပေးထား၍ မစိုးရိမ်ရတော့ကြောင်း သိရသည်။
အာရက္ခတပ်တော်ထိန်းချုပ်ထားသည့် ဒေသများ၌ စစ်ကျန် မိုင်းများ၊ လက်ပစ်ဗုံးများ၊ စစ်လက်နက်များကြောင့် ရက္ခိုင်ဒေသခံပြည်သူများမှာ ထိခိုက်သေဆုံးမှုများ မကြာခဏ ဖြစ်ပွားလျက်ရှိသည်။