AB News-ဧပြီ ၃၊ ၂၀၂၅
ရက္ခိုင်ပြည်၊ မောင်တောမြို့ မေယုတောင်ခြေအနီးအနားတွင် ဒေသခံအမျိုးသားတစ်ဦး ပျောက်ဆုံးသွားကြောင်း AB News မှ စုံစမ်းသိရသည်။
ပျောက်ဆုံးသွားသည့် အမျိုးသားမှာ မောင်တောမြို့ နယ်၊ ကိုင်းကြီး (မြို) ကျေးရွာမှ အသက် ၆၈ နှစ်အရွယ် ဦးမောင်လှစိန် ဖြစ်သည်။
မတ်လ ၃၀ ရက်၊ နေ့လည် ၂ နာရီခန့်တွင် ဦးမောင်လှစိန်သည် ကိုင်ကြီး (မြို) ကျေးရွာ၏ အရှေ့ဖက်သို့ ညှပ်ကွင်း(ကိုင်း) ထောင်ရန် သွားစဥ် ပျောက်ဆုံးသွားကြောင်း မိသားစုဝင်များက ပြောသည်။
မတ်လ ၃၁ ရက်နေ့တွင် ဦးမောင်လှစိန်ကို သွားရှာစဥ် မေယုတောင်ခြေအနီး သေနတ်ပစ်ဖောက်သည့် အသံ အချက် ၂၀ ခန့် ကြားခဲ့ရကြောင်း ကိုင်ကြီးကျေးရွာသားများက ဆိုကြသည်။
လက်ရှိတွင် ပျောက်ဆုံးနေသည့် ဦးမောင်လှစိန်ကို အာရက္ခတပ်တော် နှင့် ဒေသခံများပူးပေါင်း၍ လိုက်လှံရှာဖွယ်နေကြောင်း သိရှိရသည်။
ပျောက်ဆုံးသွားသည့် အမျိုးသားကို မူဆလင်အကြမ်းဖက်အဖွဲ့ တစ်ဖွဲ့ ဖမ်းဆီးခေါ်ဆောင်သွားနိုင်ကြောင်း ကျေးရွာသားများမှ ပြောဆိုကြသည်။
၂၀၂၄ ဒီဇင်ဘာ ၅ ရက်ကလည်း ဘူးသီးတောင်မြိုနယ်၊ ဆင်စွယ်ရ(ဒိုင်းနက်)ကျေးရွာကို ARSA အဖွဲ့က ဝင်ရောက်တိုက်ခိုက်ခဲ့ပြီး အသက် ၁၆ နှစ်အရွယ် အမျိုးသမီးငယ် တစ်ဦး သတ်ဖြတ်ခံခဲ့ရကာ အမျိုးသား ၅ ဦးကိုလည်း ဖမ်းဆီးခေါ်ဆောင်သွားခဲ့သည်။ထို့အပြင် နေအိမ် ၂ ဆောင်ကိုလည်း မီးရှိဖျက်ဆီးခဲ့သည်။
အလားတူ ၂၀၂၅ ခုနှစ်၊ ဇန်နဝါရီ ၄ ရက်နေ့ကလည်း မောင်တောမှ ရသေ့တောင်၊ စေတီပြင်ရွာသို့ သွားသည့် တုတ်တုတ်သုံးဘီး တစ်စီးကို ARSA အဖွဲမှတိုက်ခိုက်ခဲ့သဖြင့် အမျိုးသား ၁ ဦးသေဆုံးပြီး ၂ ဦး ဒဏ်ရာရရှိခဲ့သည်။