AB News – နိုဝင်ဘာ ၁၇၊ ၂၀၂၅
နွယ်စိုး
ရက္ခိုင်ပြည်၊ မောင်တောမြို့နယ်တွင် ဓာတ်ဆီဖြည့်စဥ် မီးလောင်မှု ဖြစ်ပွားခဲ့မှုကြောင့် ပြင်းထန် ဒဏ်ရာများ ရရှိခဲ့သည့် အမျိုးသား ၂ ဦး အနက် ၁ ဦးသည် နိုဝင်ဘာလ ၁၆ ရက်နေ့ ည ၈ နာရီခွဲခန့်တွင် ဆေးကုသမှု ခံယူနေစဥ်အတွင်း သေဆုံးသွားကြောင်း စုံစမ်းသိရှိရသည်။
သေဆုံးသွားသူမှာ မောင်တောမြို့နယ်၊ လောင်းဒုံကျေးရွာမှ အသက် ၃၃ နှစ်အရွယ် ဦးကျော်မိုးလှိုင် ဖြစ်သည်။
၎င်းသည် ခန္ဓာကိုယ်အနှံ့အပြားတွင် ပြင်းထန်သော မီးလောင်ဒဏ်ရာများဖြင့် ဆေးရုံ၌ ဆေးကုသမှု ခံယူနေစဥ် သေဆုံးသွားခြင်းဖြစ်ကြောင်း မိသားစုဝင်များက ပြောသည်။
ဦးကျော်မိုးလှိုင်၏ မိသားစုဝင်တစ်ဦးက “မနေ့ည ၈ နာရီခွဲလောက်က သေဆုံးသွားတာပါ။ သူ မသေခင် စကားတွေ ပြောနေခဲ့သေးတယ်၊၊ ရုတ်တရက် အသက်ရှူ ကြပ်တယ်ဆိုပြီး ထအော်တယ်။ ဆရာဝန်က ကျောက်ကပ် အစားထိုးရမယ် ပြောနေရင်းနဲ့ သေဆုံးသွားတာပါ” ဟု ဆိုသည်။
အဆိုပါ မီးလောင်မှုဖြစ်စဥ်သည် နိုဝင်ဘာလ ၁၅ ရက်နေ့၊ ညနေ ၄ နာရီခွဲခန့်တွင် မောင်တောမြို့နယ်၊ လောင်းဒုံ ကျေးရွာရှိ ဓာတ်ဆီဆိုင်တစ်ဆိုင်တွင် ဖြစ်ပွားခဲ့ခြင်းဖြစ်သည်။
၎င်းတို့နှစ်ဦးသည် ဓာတ်ဆီဆိုင်တွင် ဆီဖြည့်နေစဥ် ဓာတ်ဆီဗူးမှောက်ကျကာ မြေပြင်သို့ စီးကျခဲ့ပြီး အနီးရှိ မီးပုံထဲသို့ ကူးစက်၍ ရုတ်တရက် မီးတောက်လောင် ခြင်းဖြစ်ကြောင်း မိသားစုဝင်များ ပြောပြချက် အရသိရသည်။
မီးလောင်မှုကြောင့် လောင်းဒုံကျေးရွာမှ ဦးကျော်မိုးလှိုင်မှာ ခန္ဓာကိုယ်အနှံ့အပြားတွင် ပြင်းထန်ဒဏ်ရာများ ရရှိခဲ့ပြီး ကြိမ်ချောင်းကျေးရွာမှ မောင်ဖြိုးဝင်းမှာမူ ဘယ်ဘက်ခြေထောက်နှင့် ညာဘက်လက်တို့တွင် ဒဏ်ရာရရှိခဲ့ကြောင်း သိရသည်။
လက်ရှိတွင် သေဆုံးသူ၏ ရုပ်အလောင်းကို သင်္ဂြိုလ်ရန် ပြင်ဆင်နေကြောင်း သိရသည်။