ABN-မေအိအိအောင်
သြဂုတ် ၄ ရက်
ပဲခူးတိုင်းတွင် စစ်ကောင်စီကပစ်သည့် လက်နက်ကြီးကျည်ကြောင့် ဆယ်တန်းကျောင်းသား တစ်ဦးအပါအဝင် ၂ ဦးသေဆုံးပြီး မိသားစုဝင် ၃ ဦးထိခိုက်ဒဏ်ရာရရှိခဲ့ကြောင်း KNUဗဟိုက သတင်းထုတ်ပြန်ထားသည်။
ပြီးခဲ့သည့် သြဂုတ်လ ၂ ရက်နေ့နှင့် ၃ ရက်နေ့တွင် ပဲခူးတိုင်း ကျောက်ကြီးမြို့နယ်နှင့် မုန်းမြို့နယ် အတွင်းကို စစ်ကောင်စီတပ်က လက်နက်ကြီးများဖြင့် ပစ်ခတ်ခဲ့ခြင်းဖြစ်သည်။
အဆိုပါမြို့နယ်အတွင်း လက်နက်ကြီးပစ်ခတ်ခဲ့သည့် စစ်ကောင်စီတပ်မှာ ခမရ (၅၉၉)နှင့် ခမရ(၂၇၄)တပ်တို့ဖြစ်သည်။
စစ်ကောင်စီက လက်နက်ကြီးနှင့် ပစ်ခတ်ခဲ့၍ မုန်းမြို့နယ်မှ အရပ်သားတစ်ဦး သေဆုံးပြီး (၃)ဦးဒဏ်ရာရကာ ကျောက်ကြီးမြို့နယ်မှ ဆယ်တန်းကျောင်းသားတစ်ဦး သေဆုံးခဲ့သည်။
သြဂုတ်လ ၂ ရက်နေ့ နေ့လည်ပိုင်းတွင် စစ်ကောင်စီတပ်၏ ခမရ (၅၉၉)တပ်မှ ပစ်သည့် (၈၁)မမ လက်နက်ကြီး ၁ လုံးမှာ မုန်းမြို့နယ် မွေတွင်းကျေးရွာရှိ နေအိမ်တစ်လုံးအပေါ် ကျရောက်ပေါက်ကွဲခဲ့ကြောင်း သိရသည်။
လက်နက်ကြီး ကျရောက်ပေါက်ကွဲ၍ ယင်းနေအိမ်မှ အသက် ၇၁ နှစ်အရွယ် ဦးတင်ဦး၊ အသက် ၃၉ နှစ်အရွယ် မဇင်မာဝင်း နှင့် အသက် ၆ နှစ်အရွယ် ချစ်ဖုန်းသွယ်တို့ ထိခိုက်ဒဏ်ရာ ရရှိခဲ့ပြီး အသက် ၃၇ နှစ်အရွယ် မသီတာအေးမှာ လက်နက်ကြီးဒဏ်ရာကြောင့် နေရာမှာပင် သေဆုံးခဲ့ကြောင်း သိရသည်။
ယင်းအပြင် ယမန်နေ့ ဩဂုတ် ၃ ရက်နေ့ နံနက်ပိုင်းတွင် စစ်ကောင်စီတပ်၏ ခမရ (၂၇၄)မှ ကျောက်ကြီးမြို့နယ် သမင်အင်းကုန်းကျေးရွာအတွင်းသို့ လက်နက်ကြီးများဖြင့် ပစ်ခတ်ခဲ့ရာ အသက် ၁၆ နှစ်အရွယ် ဆယ်တန်းကျောင်းသား ပိုင်စိုးသူ၏ ဦးခေါင်းတွင် လက်နက်ကြီးကျည်စ ထိမှန်၍ သေဆုံးခဲ့ရကြောင်း သိရသည်။
အလားတူ ယမန်နေ့ သြဂုတ်လ ၃ ရက်နေ့တွင်ပင် တနင်္သာရီတိုင်း၊ တနင်္သာရီမြို့နယ်အတွင်းသို့ စစ်ကောင်စီတပ်က လက်နက်ကြီးဖြင့်ပစ်ခတ်၍ အမျိုးသားတစ်ဦးနှင့် အမျိုးသမီးတစ်ဦး ထိခိုက်ဒဏ်ရာရရှိခဲ့ပြီး နေအိမ် ၆ လုံးပျက်စီးခဲ့ကြောင်းသိရသည်။
ပြီးခဲ့သည့် ဇူလိုင်လ ၂၉ ရက်နေ့တွင် ရှမ်းပြည်နယ်၊ လွယ်ကုန်းကျေးရွာကို စစ်ကောင်စီက လက်နက်ကြီးများဖြင့်ပစ်ခတ်၍ အမျိုးသမီး တစ်ဦးသေဆုံးကာ ၂ ဦးဒဏ်ရာရရှိခဲ့သည်။