AB News – ဧပြီ ၃၀ ၊ ၂၀၂၅
တအာင်းပြည်၊ တပ်မဟာ (၂) နယ်မြေ၊ နောင်ချိုမြို့နယ်၊ တောင်ခမ်းကျေးရွာအနီးရှိ (၉၀၂) စစ်ကောင်စီတပ်စခန်းကို (TNLA) က ဝင်ရောက်တိုက်ခိုက်စဉ် စစ်ကောင်စီတပ်က အဆိပ်ငွေ့ဗုံး ၁၁ လုံး ကြဲချပြီး လက်နက်ကြီး ၂၆ လုံးဖြင့် ပစ်ခတ်ခဲ့ကြောင်း TNLA က ထုတ်ပြန်သည်။
ဧပြီ ၂၉ ရက်နေ့ နံနက် ၈ နာရီမှ ညနေ ၃ နာရီ ၄၀ မိနစ်အထိ ကြာမြင့်ခဲ့သော တိုက်ပွဲအတွင်း စစ်ကောင်စီ၏ ၉၀၂ နှင့် ၄၅၃ တပ်ရင်းများက ၁၂၀ မမ လက်နက်ကြီးများဖြင့်လည်း အပြင်းအထန် ပစ်ခတ်ခဲ့ကြောင်း ဆိုသည်။
ဧပြီလကုန်အထိ အပစ်ရပ်စဲရေးကို တိုးမြှင့်ထားသော စစ်ကောင်စီသည် PSLF/TNLA ထိန်းချုပ်နယ်မြေများတွင် စစ်အင်အားဖြည့်တင်းခြင်း၊ ထိုးစစ်ဆင်ခြင်းနှင့် တိုက်ပွဲများ ဆင်နွှဲခြင်းမရှိသည့် ပြည်သူများနေထိုင်ရာ ဒေသများကို လေကြောင်းမှ ဗုံးကြဲတိုက်ခိုက်မှုများ လုပ်ဆောင်နေကြောင်း ထုတ်ပြန်ချက်အရ သိရသည်။
ပြီးခဲ့သည့် ဧပြီ ၂၄ ရက်နေ့ကလည်း စစ်ကောင်စီသည် နောင်ချိုမြို့ကို အဆိပ်ငွေ့ဗုံး ၈ လုံးနှင့် ဗုံး ၂၇ လုံး ကြဲချခဲ့သေးသည်။
ထို့ပြင် အပစ်ရပ်စဲထားသော စစ်ကောင်စီသည် မြန်မာနိုင်ငံတစ်ဝန်း တိုက်ပွဲများဖြစ်ပွားနေသည့် ဒေသများမှ ပြည်သူများနေထိုင်ရာ နေရာများကို လက်နက်ကြီးဖြင့် ပစ်ခတ်ခြင်း နှင့် လေကြောင်းမှ ဗုံးကြဲတိုက်ခိုက်မှုများ ဆက်လက်လုပ်ဆောင်နေသောကြောင့် ဒေသခံပြည်သူ ထိခိုက်သေဆုံးမှုများ ရှိနေကြောင်းလည်း သိရသည်။