AB News – နိုဝင်ဘာ ၃ ရက်
စစ်ရေးအဖက်ဖက်မှ ရှူံးနိမ့်နေသည့် မြန်မာ့တပ်မတော်သည် ညီနောင်မဟာမိတ် ၃ ဖွဲ့အား ပြန်လည်ချေမှုန်းသွားမည်ဖြစ်ကြောင်း စကစ စစ်ခေါင်းဆောင် မင်းအောင်လှိုင်က ပြောဆိုလိုက်သည်။
ရှမ်းမြောက် ဒေသတိုက်ပွဲအတွင်း စစ်ရေး၊ နိုင်ငံရေး အဖက်ဖက်မှ အနုတ်လက္ခဏာထွက်ရှိနေသည့် စစ်ကောင်စီတပ်သားများအတွက် ပြန်လည်ချေမှုန်းသွားမည်ဖြစ်ကြောင်း နိုဝင်ဘာလ ၂ ရက်နေ့က ပြောကြားလိုက်ခြင်းဖြစ်သည်။
“မိမိတို့အနေနဲ့ တိုင်းရင်းသားအချင်းချင်းယုံကြည်မှုထားပြီး ဆောင်ရွက်ပေးခဲ့တာတွေ၊ သို့ပေမယ့်လည်း မိမိတို့အပေါ် တိုက်ခိုက်မှုတွေ ဆောင်ရွက်လာတဲ့အတွက် မိမိတို့အနေနဲ့ တန်ပြန် ချေမှုန်းမှုတွေကို ဆက်လက်လုပ်ဆောင်သွားမယ်” ဟု စစ်ကောင်စီပိုင် မြန်မာ့အလင်းသတင်းစာတွင် ဖော်ပြထားသည်ကို တွေ့ရသည်။
မင်းအောင်လှိုင် ပြောရာတွင် MNDAA နှင့် TNLA တို့အဓိကပြောဆိုထားပြီး AA ကိုဖော်ညွှန်းထားခြင်းမရှိကြောင်း တွေ့ရသည်။
အောက်တိုဘာ ၂၃ ရက်နေ့ကလည်း စစ်ကောင်စီ၏ ဝါဒဖြန့်ချီရေးခေါင်းဆောင် ဇော်မင်းထွန်းသည် အွန်လိုင်းငွေလိမ်လုပ်ငန်းသည် ရှမ်းပြည်နယ်ရှိ လက်နက်ကိုင်တပ်ဖွဲ့များရှိရာ ဝ နှင့် မိုင်းလားတို့တွင် အများဆုံးရှိနေပြီး ၎င်းထဲတွင် မြန်မာစစ်တပ်ဖက်မှ တစ်ဦးမှမပါဝင်ကြောင်း လိမ်လည်ထားသည်ကို တွေ့ရသည်။
ထို့အပြင်ကိုးကန့်၊ “ဝ”၊ မိုင်းလားတို့တွင် မှုးယစ်ဆေးသုံးစွဲသူများ နှင့်ငွေလိမ်ဂိုဏ်းများကို တိုင်းရင်းသားလက်နက်အဖွဲ့များလုပ်ကိုင်နေသည် ဟု ဝါဒဖြန့်ချီထားသည်။
စစ်ကောင်စီတပ်ဖွဲ့ဝင်များ အကျဆုံးများနေခြင်း၊ စခန်းများလက်လွှတ် ဆုံးရှူံးမှုများလာခြင်း၊ တပ်တွင်းအထက် အောက်စီးဆင်းမှု ပျက်ပြားလာခြင်း၊ အပြစ်မဲ့ပြည်သူများကို ဖမ်းဆီးသတ်ဖြတ်လာခြင်း နှင့် တပ်တွင်းပြေးမှုများ ပိုများလာသည့်အတွက် ညီနောင် ၃ ဖွဲ့အား တန်ပြန်ချေမှုန်းသွားမည်ဖြစ်ကြောင်း သိရသည်။
Operation ၁၀၂၇ စစ်ဆင်ရေးတွင် ပူးပေါင်းတိုက်ပွဲဝင်နေသည့် MNDAA၊ TNLA ၊ AA အပါအဝင် အခြားမဟာမိတ် အဖွဲ့အစည်းများသည် ၎င်းတို့ရည်မှန်းထားသည့် စစ်အာဏာရှင်စနစ် အမြစ်ပြတ်ချေမှုန်းရေးကို တစိုက်မတ်မတ် တိုက်ပွဲဝင်သွားမည်ဖြစ်ကြောင်း ပြောဆိုထားသည်။