ရက္ခိုင်ပြည်၊ မြေပုံမြို့နယ် စစ်ကောင်စီ၏ စညှင်းအခြေစိုက် ပွိုင့် ၂၅၇ စခန်းကို အာရက္ခတပ်တော်က အပြီးသတ်သိမ်းပိုက်လိုက်ပြီ ဖြစ်ကြောင်း ဒေသခံများက ပြောသည်။
၎င်းစခန်းကို ပြီးခဲ့သည့် ဧပြီလ ၁၀ ရက် ညနေ ၅ နာရီတွင် အာရက္ခတပ်တော်နေ့၌ အပြီးသတ်သိမ်းပိုက်နိုင်ခဲ့ပြီး တောဟိန်းတောင်ဗျူဟာကိုလည်း ဆက်လက်ထိုးစစ်ဆင်တိုက်ခိုက်နေကြောင်းဒေသခံတစ်ဦးက AB News သို့ပြောသည်။
” AA က ဧပြီလ ၁၀ ရက်နေ့မှာ သိမ်းပိုက်လိုက်ပါတယ်။ စစ်ကောင်စီတပ်သားတွေ ထွက်ပြေးသွားတာတွေရှိတယ်။ တောင်ဟိန်းတောင်ဗျူဟာကိုလည်း AA ကထိုးစစ်ဆင်နေတယ်” ဟု ဆိုသည်။
စညှင်းကျေးရွာ၏ အရှေ့ဖက် မီတာ ၁၅၀၀ ခန့်အကွာရှိ စစ်ကောင်စီ၏ ပွိုင့် ၂၅၇ စခန်းကို ဧပြီလ ၂ ရက် နံနက် ၆ နာရီ မိနစ် ၂၀ တွင် အာရက္ခတပ်တော်ကစတင် ထိုးစစ်ဆင်တိုက်ခိုက်ခဲ့ကြောင်း AA ကဆိုသည်။
၎င်းစခန်းသည် စစ်ကောင်စီ ရှေ့တန်းအမှတ် ၅ စစ်ဆင်ရေးကွပ်ကဲမှုဌာနချုပ်၏ အောက်တွင်ရှိသော နည်းဗျူးဟာ အမှတ် ၃ စခန်းဖြစ်ကြောင်း ထုတ်ပြန်ချက်တွင်ပါရှိသည်။
လက်ရှိတွင်လည်း အမ်းမြို့နယ် ကဇုကိုင်းအနီးရှိ တောဟိန်းတောင်ဗျူဟာအပါအဝင်၊ အနောက်ပိုင်းတိုင်း စစ်ဌာနချုပ်ကိုလည်း AA ကတိုက်ခိုက်နေကြောင်း ဒေသခံများပြောပြချက်အရသိရသည်။
မတ်လ နှင့် ဧပြီလအတွင်းမှာ အာရက္ခတပ်တော်သည် အမ်း – သံတွဲမြို့နယ် ၂ ခုအား ထိုးစစ်ဆင်တိုက်ခိုက်လာသည့်အတွက် စစ်မျက်နှာပိုမိုကျယ်ပြန့်လာသည်ကိုတွေ့ရသည်။
ဘူးသီးတောင်၊ မောင်တောရှိ စစ်ကောင်စီစခန်းများကိုလည်း အပြီးသတ်သိမ်းပိုက်နိုင်ရေး ကြိုးစားလျက်ရှိကြောင်း AAကဆိုထားသည်။