AB News – နိုဝင်ဘာ ၂၊ ၂၀၂၅
ဆိုဖီ
စစ်ကော်မရှင် ထိန်းချုပ်ဆဲနယ်မြေဖြစ်သော စစ်တွေမြို့ပေါ်တွင် ရက္ခိုင်အဆိုတော်များပါဝင်မည့် တန်ဆောင်တိုင်ပွဲတော်ကို နိုဝင်ဘာလ ၄ ရက်နေ့မှ ၅ ရက်နေ့အထိ စည်ကားသိုက်မြိုက်စွာ ကျင်းပရန် စကမ ပြင်ဆင်နေကြောင်း ဒေသခံများက AB News သို့ ပြောသည်။
ဒေသခံ တစ်ဦးက ”စစ်တွေမြို့ ဝန်ကြီးချုပ် ဦးဆောင်ပြီး လုပ်နေတာပါ။ စတိတ်ရှိုးပွဲတွေ၊ ဝင်္ကဘာကွင်းတွေ၊ ဆီမီးပူဇော်ပွဲတွေလည်း ပြင်ဆင်နေတာ တွေ့ရပါတယ်။ ရက္ခိုင်အဆိုတော်တွေ ပါဝင်မယ်လို့ သိရတယ်” ဟု ဆိုသည်။
အဆိုပါပွဲတော်ကို လောကနန္ဒာစေတီတော်မြတ်၊ အတုလမာရဇိန် ပြည်လုံးချမ်းသာ ဘုရားကြီး (ဝင်္ကဘာကွင်း) နှင့် ကိုရီးယားဆိပ်ကမ်းရှိ ရန်ပြေမာန်ပြေ ဘုရားရင်ပြင်တို့တွင် ကျင်းပမည်ဖြစ်ကြောင်း သိရသည်။
ပွဲတော်အတွက် စတိတ်ရှိုးစင်များ ဆောက်လုပ်ပြင်ဆင်နေပြီး ရက္ခိုင်အဆိုတော်ကြီးများ နှင့် ဂီတအဖွဲ့အစည်းများ ပါဝင်ဖျော်ဖြေမည်ဖြစ်ကြောင်း သိရသည်။
စကမ သည် စစ်တွေမြို့တွင်းရှိ အရပ်သားပြည်သူများအား အခြားမြို့နယ်များသို့ ထွက်ခွာခွင့် လုံးဝမပြုဘဲ ပိတ်ပင်ထားပြီး၊ ထွက်ပြေးရန် ကြိုးပမ်းသူများကိုလည်း လိုက်လံဖမ်းဆီးမှုများ ပြုလုပ်လျက်ရှိကြောင်း သိရသည်။
တစ်ဖက်တွင်လည်း အာဏာသိမ်း စကမသည် အာရက္ခတပ်တော် (AA) ထိန်းချုပ်ထားသော မြို့ရွာများကို လေကြောင်းဖြင့် နေ့စဥ်ရက်ဆက် ဗုံးကြဲတိုက်ခိုက်မှုများ ဆက်လက် လုပ်ဆောင်လျက်ရှိသည်။
ပြီးခဲ့သည့် အောက်တိုဘာလ ၂၉ ရက်မှ ၃၁ ရက်နေ့များအတွင်း ပုဏ္ဏားကျွန်းမြို့နယ်၊ ရသေ့တောင်မြို့နယ်၊ ကျောက်ဖြူမြို့နယ်နှင့် ပေါက်တောမြို့နယ်တို့တွင် စစ်ကောင်စီ၏ လေကြောင်းဗုံးကြဲတိုက်ခိုက်မှုများကြောင့် အရပ်သား ၁၂ ဦးထက်မနည်း သေဆုံးပြီး ၃၃ ဦးထက်မနည်း ဒဏ်ရာရရှိခဲ့ကြောင်း သိရသည်။