AB News – ဧပြီ ၁ ၊၂၀၂၅
ရက္ခိုင်ပြည်၊ မြောက်ဦးမြို့ကို အကြမ်းဖက် စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည့်အတွက် သက်ကြီးပိုင်း အမျိုးသား ၁ဦး သေဆုံးခဲ့ကြောင်း AB News ကွင်းဆင်း တွေ့ရှိရသည်။
သေဆုံးသွားသူမှာ အလယ်စျေးရပ်ကွက်၊ ဝမ်းတီးအပိုင်းမှ အဖ ဦးဦးသာကျော်၏သား အသက် ၆၆နှစ်အရွယ် ဦးအောင်ကျော်ဇံဖြစ်သည်။
ယမန်နေ့ မတ်လ ၃၁ ရက်နေ့၊ ည ၁၀ နာရီတွင် မြောက်ဦးမြို့ရှိ နေရာ ၄ ခုကို စစ်ကောင်စီမှ ဂျက်ဖိုက်တာဖြင့် Cluster ဗုံးကြဲတိုက်ခိုက်ခဲ့ရာ အလယ်ဈေးရပ်ကွက်၊ ဝမ်းတီးအပိုင်းမှ ဦးအောင်ကျော်ဇံ ဗုံးစထိမှန်ပြီး သေဆုံးခဲ့ကြောင်း မြို့ခံ ၁ဦးက AB News သို့ပြောသည်။
” မနေ့က ည ၁၀ နာရီလောက်မှာ ဝုန်းခနဲလာကြဲတာ။ အလယ်စျေးရပ်ကွက်မှာ ပေါက်ကွဲတယ်။ ဗုံးခွံထိမှန်လို့ အမျိုးသား ၁ဦး ဦးခေါင်းကွဲထွက်သွားပြီး သေဆုံးသွားခဲ့တယ်”ဟု ဆိုသည်။
သေဆုံးသွားသူ ဦးအောင်ကျော်ဇံသည် မတ်လ ၃၁ ရက်နေ့ ည ၁၀ နာရီကျော်တွင် ၎င်း၏နေအိမ်ရှေ့ လမ်းလျှောက်နေစဥ် စစ်ကောင်စီမှ ဂျက်ဖိုက်တာဖြင့် ပစ်ခတ်ခဲ့သည့် ဗုံးသီးမှ ဗုံးခွံသည် ညာဘက်ဦးခေါင်းကို ထိမှန်ပြီး ဦးခေါင်းပွင့်ထွက်သွားကာ ထိုနေရာတွင်ပင် ပွဲချင်းပြီးသေဆုံးသွားခဲ့သည်။
၎င်၏ ရုပ်အလောင်းအား ယနေ့ နေ့လယ် ၁ နာရီတွင် သဂြိုလ်သွားမည်ဖြစ်ကြောင်း သိရှိရသည်။
အလားတူ မြောက်ဦးမြို့ ၊ညောင်းပင်ဈေးရပ်ကွက်မှ အသက် ၆၀ အရွယ် ဦးသိန်းစောအောင်၏ နေအိမ်ရှေ့ ဘူးစင်အနီးတွင်လည်း စစ်ကောင်စီမှ ဂျက်ဖိုက်တာဖြင့် ပစ်ခတ်ခဲ့သည့် Cluster ဗုံး တစ်လုံးကျရောက်ပေါက်ကွဲခဲ့ကြောင်း သိရသည်။
မတ်လ ၁၈ ရက်နေ့ကလည်း မြောက်ဦးမြို့၊ သကျမာန်အောင်ဘုရား၊ ဘုန်းကြီးကျောင်းအနီး တဝိုက်ကို စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့သည်။