ABN-နွယ်စိုး
စစ်ကိုင်းတိုင်း၊ ကသာမြို့နယ် မိုးတာလေးရွာထဲ အလှူပွဲ လုပ်နေစဥ် ယမန်နေ့ ဇန်နဝါရီလ ၁၈ ရက် ညနေပိုင်းက စစ်ကောင်စီတပ်မှ လေကြောင်းတိုက်ခိုက်မှုကြောင့် ဒေသခံ ၇ဦးထက်မနည်း သေဆုံးသွားခဲ့ပြီး အလောင်းများကိုလည်း ပြန်ကောက်ယူနိုင်ခြင်းမရှိသေးဟု သိရသည်။
ယမန်နေ့ ဇန်နဝါရီလ ၁၈ ရက်ညနေပိုင်းတွင် မိုးတာလေးရွာအနီးနား၌ စစ်ကောင်စီတပ်နှင့် ပြည်သူ့ကာကွယ်ရေးတပ်တို့ကြား နှစ်ဦးနှစ်ဖက် တိုက်ပွဲဖြစ်ပွားခဲ့ပြီးနောက်ပိုင်း ရွာအထဲသို့ ဂျက်ဖိုက်တာ ၃ စီးဖြင့် မီးလောင်ဗုံးကြဲခဲ့သည့်အတွက်ကြောင့် ဒေသခံရွာသား ၇ ဦးထက်မနည်း သေဆုံးသွားခဲ့သည့် ဟုသိရသည်။
တိုက်ပွဲဖြစ်ပွားရာတွင် မိုးတာလေးရွာ၌ အလှူပွဲလုပ်နေစဥ်အတွင်း စစ်ကောင်စီတပ်မှ ရဟတ်ယာဥ်ဖြင့် တိုက်ခိုက်ခဲ့ခြင်းဖြစ်သည်။
ထို့အပြင် စစ်ကောင်စီတပ်မှ လေကြောင်းတိုက်ခိုက်မှုကြောင့် ကသာမြို့နယ်အတွင်းမှ ကျေးရွာပေါင်း ၈ ရွာမှာ ရွာသူ/ သားများမှာ ဘေးလွတ်ရာသို့ ထွက်ပြေးတိမ်းရှောင်နေကြရသည်။
ယမန်နေ့ကလည်း ရခိုင်ပြည်၊ မြောက်ဦးတွင် စစ်ကောင်စီတပ်မှ ထောင်ထားသည့် မိုင်းပေါက်ကွဲမှုကြောင့် ခမီတိုင်းရင်းသားတစ်ဦး ခြေထောက်တစ်ဖက်ပြတ်ကာ နောက်တစ်ဖက်မှာလည်း ဒဏ်ရာပြင်းထန်စွာ ရရှိခဲ့ရသည်။
စစ်ကောင်စီတပ်မှ လာမည့် ဩဂုတ်လတွင် မြန်မာတစ်နိုင်ငံလုံးဆိုင်ရာ ရွေးကောက်ပွဲကျင်းပမည်ဟု ဆိုသော်လည်း လက်ရှိအချိန်ထိ ပြည်သူလူထုအပေါ် အကြမ်းဖက်တိုက်ခိုက်သတ်ဖြတ်ကာ ဖမ်းဆီးမှုများကိုလည်း ဆက်တိုက်လုပ်ဆောင်လျက်ရှိနေသေးသည့်အတွက် ပြည်သူတစ်ရပ်လုံးအနေဖြင့် မင်းအောင်လှိုင်ဦးဆောင်သည့် စစ်အစိုးရကို အလွန်ပင် မုန်းတီးရွံရှာလျက်ရှိနေကြသည်။
