ABN-မေအိအိအောင်
ဇွန်လ ၂၈ ရက်
စစ်ကိုင်းတိုင်း၊ ပုလဲမြို့နယ်တွင် စစ်ကောင်စီမှ ဗုံးကြဲတိုက်ခိုက်မှုကြောင့် ဘုန်းကြီးတစ်ပါးနှင့် အရပ်သား ပြည်သူ ၉ ဦးသေဆုံးခဲ့ကြောင်းဒေသတွင်းသတင်းများအရသိရသည်။
ယမန်နေ့ ဇွန်လ ၂၇ ရက်နေ့ ညနေပိုင်းက စစ်ကိုင်းတိုင်း ပုလဲမြို့နယ် ညောင်ကုန်းရွာနှင့် ချင်ပြစ်ကျေးရွာကို စစ်ကောင်စီက အကြောင်းမဲ့ ဗုံး ၅ လုံးကြဲချခဲ့သည့်အတွက် ရွာအတွင်းမှ အရပ်သားပြည်သူများသေဆုံးခဲ့ရခြင်းဖြစ်သည်။
စစ်ကောင်စီတပ်က ဗုံးကြဲတိုက်ခိုက်မှုကြောင့် ဘုန်းကြီးတစ်ပါးအပြင် အမျိုးသား ၆ ဦးနှင့် အမျိုးသမီး ၃ ဦးသေဆုံးခဲ့ရသည်။
ယင်းအပြင် အသက် ၁၈ နှစ်မှ ၇၀ အကြား ပြည်သူ ၁၂ ဦးအပြင်းအထန် ဒဏ်ရာရရှိထားကြောင်းသိရသည်။
စစ်ကောင်စီတပ်၏ လေကြောင်းတိုက်ခိုက်ခံရမှုကြောင့် နေအိမ် (၁၃)လုံးနှင့် ဘုန်းကြီးကျောင်းတစ်ကျောင်းလည်း ပျက်စီးဆုံးရှုံးသွားသည်ဟု သိရသည်။
ပြီးခဲ့သည့် ဇွန်လ ၂၅ ရက်နေ့ကလည်း မွန်ပြည်နယ်၊ ရေးမြို့နယ် နှစ်ကရင်ကျေးရွာကို စစ်ကောင်စီက လေကြောင်းဖြင့် ဗုံးကြဲတိုက်ခိုက်၍ အရပ်သား တစ်ဦးသေဆုံးကာ ၄ ဦးဒဏ်ရာရရှိခဲ့သည်။